نحاس مطلي بالذهب

خودي لي يبغيك وماشي لي تبغيه ....
ديما كنت نسمع هاد الهدرة من جدة الله يرحمها فاش تايطير ليها الفريخ

وتبدا علي بالنصائح والمواعظ فاش كنت باقا صغيرة بعض المرات كانديرلها الخاطر ونجلس حداها نتصنت ليها وبعض المرات ملي كانكون تانفرج في المسلسل ديالي كانقولها تسكت الله يسمحلي منها واخا هاكاك فاش ماتت شحال بكيت عليها.
أنا سميتي لمياء بنت في عمري 18 عام خرجت من القراية العام لي داز ختكم مكلخة شويا ومكررة عامين والواليد طلع ليه الدم وحلف علي لا عاودت عتبت تما وأنا نيت لقيتها سبة تهنيت من الفياق بكري ومن معيور الأساتذة واخا هاكداك مابغيتش نبين طيحت واحد جوج دمعات ودرت راسي مضربة على الطعام واحد نص نهار كنت مخبية سقاطة تحت الناموسية.
ماعلينا خرجت من القراية و ولا همي الوحيد هو السريط النعاس والدوران كنت نحماق على التسركيل واخا الوالد عيا يسلخ في وحتى الواليدة والله ماقصرت نخرج نخرج واخا نضرب غير دورة في الحومة ولا والو...

مانكدبش عليكم كنت خفيفة مع راسي كنت نبغي نعيش نلبس لقصير نطلق شعري ندير ماكياج ولولا الواليد لي كان مزيرني وكان درت العجب كنت زوينة بلا ما تقولو شكار راسو حيت بصح مع كانو الخطاب ديما يجيو عندي وبدون مبالغة وأنا كنت نغيفوسيهم كاملين حيت في نظري مازال ماجاش فارس أحلامي لي كانتسنى.
كنت نحلم بحال جميع البنات بشي راجل يكون طويل وسيم تكون عندي لحية خفيفة وعينيه عسليين ويكون لاباس عليه الحاصول كانو خارجين علي الأفلام التركية...
حومتنا كانت حومة شعبية ماشي بزاف ولكن كان كولشي كايعرف بعضياته البنات فيها كيما يقولو المصريين زي الهم على القلب وغير لي تلقايها فرفارة وقليل لي جالسة في دارهم مثبتة ومرزنة وليني ديك المرزنة غالبا ماتلقايها مسكينة مافيها مايتشاف الله يسمحلي..ماتلومويش ولكن كانعاودليكم الواقع لي حنا عايشين فيه وحنا الزوينات ماشي ذنبنا نعانيو ديما امن حسد لي زينهم على قدهم.. الهم نرجعو لموضوعنا كيما قلت كنت بحال جميع البنات نحلم بالزواج لي غادي يخرجني من ديك الحومة لي دارت لي القوق في الراس نفس الكمامر كل نهار نصبح عليهم لمدة 18 عام تاوليت شي مرات نسى كمارتي ونتفكر ديالهم واخا كنت راسمة فارس أحلامي في خيالي ولكن كنت عارفة ماغاديش نلقاه مية في المية ختكم مكلخة ولكن واقعية واقولو سبحان الله.. 

حياتي كانت عادية بالنسبة لي ماكلة نعاس تسركيل عصا و قصص الحب كنت نشوفهم غا في الأفلام
أصلا الواليدة الله يسمحليها مامخلياني نتنفس ومرات فاش نهرب ليها ونمشي نتسكع مع بنات الحومة في الكورنيش نلقاها تبعاتني وتبدا تسلخ في في الزنقة واحد النهار كيما عادتي معمرة ودنيا بليكيت وجالسة في عتبة الدار وكانتصنت لتامر حسني سادة عيني وماجايبة للدنيا خبار شويا جات مريم بنت جارتنا وصاحبتي تاهي الله يعفو عليها فريفرة وكبيرة علي مخطوبة من عمر لي تصاحبات معاه خمس سنين ولولا خوتها لي كانو غايفلقوه كون راه تسلت شحال هادي جات عندي كاتجري وحيداتلي لي كيت من ودني
تي مالكي جايا كيف القدر المستعجل طيرتيها مني خلعة
مريم:وتي نوضي تكعدي بقيتي لي هنا كاتصنتي في الأغاني غاتخرجي على راسك
أنا:شمن نخرج على راسي سيري عطيني اليساع خليني نتكونسونطرا في الكلمات راني بغيت نحفظها
مريم:أويلي على مرضة كيف دايرة بغيتي تفقسيني نوضي تكعدي راه خالتي الزوهرة جات من الرباط ومعاها ولدها داك الأستاذ
عرفتي فاش شفتو نعلت زهري المكفس بحال كمارتك والنهار لي تلاقيت فيه بعمر
أنآ: شمن أستاذ تانتي؟واش داك السمين لي كنا نضربوه بالحجر فاش كان صغير
مريم: وايييه هو ولوكان تشوفيه وكيف ولا ياصحبتي تحوالي
أنا:حلفي لا لا مانتيقش تانشوف بعيني
مريم:إيوا زيدي قدامي تشوفي بعينيك يا حبة عيني
بالطبع هادا كان خبر مايتفلتش وختكم ناضت طايرة باش تشوف رضى السمين بو 4 عيون وكيفاش ولا
خالتي الزوهرة كانت جارتنا تاهي في الحومة عندها جوج بنات عوانس الله يستر عليهم وولد واحد لي هو هاد رضى السمين فاش وصل خمس طاشر عام صيفتاتو مو عند خالتو في الرباط وتما كمل قرايتو و عمرو ماعاود عتب في الحومة حتى لهاد النهار لي غادي يجي فيه وغادي تبدل فيه حياتي بشكل جذري.

مشينا أنا ومريم باش شوف رضى الدبدوب وفكرنا نوقفو حدا دار خالتي حليمة (تاهي جارتنا) والمصيبة لقينا البلاصة عامرة !! على زهري جيت لقيت نهاد ورباعتها شادين داك الحيط ولنفس النوايا ديالنا سبحان باش تعرفو مستوى يأس بنات حومتي
الحاصول شدينا الدور في قنت آخر وبقينا مجمهرين تما تقول شادين النوبة في سبيطار الحومة حتى خرج رضى الدبدوب كانت المفاجأة التي أبكت الملايين ..نعم عزيزي القارئ..
رضى كان كيما تخيلت فارس أحلامي تماما الخالق الناطق كيفا جرات أنا بنفسي مافاهماش المهم كنت نسمع ديك كلمة حب من النظرة الأولى في الأفلام وماكنتش نفهمها يعني كنت نعرف كين الإعجاب بالشكل عامة وحتى تعرفي على الشخصية وتعاشريها عاد يكون الحب (شفتو راني مرة مرة نولي حكيمة وكانتفلسف تبارك الله علي) ولكن عمري فكرت بلي كاين الحب زعما الحووووب ديال بصاح تاليوم فاش ششفت فارس أحلامي
خرج السي رضا ودار كرسي حدا الباب وحط رجل فوق الأخرى وبدا يقرا واحد الكتاب في ديك اللحظة البنات الطايحة فيهم كثر من النايضة ...أنا بقيت غير كانشوف كانشوف فيه وهو فاش هز راسو وشاف في دغيا حدرت راسي وماقدرتش نشوف في عينيه
داك النهار رجعت فيه للدار فاش دخلت تلقاتلي الوالدة بنفس السنفونية
فين كنتي يابنت الحرام الله يعطيك الخلا شي نهار تجيبلي شي مصيبة إيمتا نتهنا منك وتجوجي وتعطيني التيساع الناس تخرخ من كرشها الولاد وأنا نخرج الزمر و الفقايس .. بقيت كانشوف فيها بحال يلا كانتصت لشي أغنية من أغاني عبد الحليم حافظ هديك ديال: حاجة غريبة حاجة غريبة الدنيا لها طعم جديد.. ماعلينا دخلت بيتي سديت الباب وتلاحيت فوق ناموسيتي المحفرة من كثرة النعاس وبديت نحلم برضى والعرس ديالنا وشهر العسل والدخلة...تقزدرت ياكو ؟مالنا مانحلموش أنا زينة وهو زين والله يوقف راسين في الحلال قولو آمين.

فقت الصباح مع العشرة بكرت على غير العادة ماعرفت كيدرتلها مشيت للكوزينة لقيت الوالدة كاتغسل في الماعن ديال الفطور
وأنا نبوسها في حناكها ونحيدليها الماعن من يديها وقتليها غير خليني أنا نغسلهم الواليدة ماتصوروش النظرة لي كانت على وجهها
فبعد ماكنت نهز القشوع لي حنجرت فيهوم بضربات متتالية بسلاح الشطابة(الوالدة عندي شوية عنيفة دعيو معايا) كانوض بكري وكانبدا نغسل في الماعن مسحات يديها وبدات تقلب لي في راسي لا تكون في شي سخانة ولا شي عجب
السخانة مافيكش ياكما شي زبلة زبلتيها هادي؟
أنا:حشومة عليك امي جرحتي مشاعري في عوض ما تفرحي و اتشجعيني وتشدي بيدي وتزيدي بي القدام ...
الواليدة:لاوه ماطلبتي غير الساهل و نجيبلك الدقة الراكشية وندبح ليك شي عجل
أنا:إيوا هانتي بديتي تفكري الميمة يخليك ليلي
الواليدة: يخليك بالخلا أنا شامة شي ريحة ماشي هي هاديك
أنا:والله ما أنا الميمة
شافت في الواليدة واحد النظرة بحال هاديك ديال سوبيرمان لا عقلتو عليها فاش كايخرج اللايزر من عينيه وخلاتني ومشات
المهم كملت الماعن وبقيت كانضحك في خاطري وكانتفكر حبيب القلب وأنا كانشير ليه وأنا في العمارية وضربت تجفيفة فاعلة تاركة للدار وخملت بيتي كاع هادشي درو بواحد النشاط عجيب ياسلام ملي ساليت دوشت قاديت الحالة لبست واحد الكسوة مخبياها ليام الحزة بحال هاد النهار قصيرة حد الركبة درت بغوشينك وماكياج خفيف وتسنيت الواليدة حتى خرجات تقدى وأنا نسلت صيفت ميساج لمريم وقتلها نتلاقاو في المكان المعلوم... فاش تلاقينا قاتلي
هاي هاي هاي على التبوكيصة لي شافك يقول ماشي هي هادي لمياء لي الدبانة ملي دور عليها تحصل في شعكاكتها
أنا:تي سكتينا الله يعطيك الخلا طفرتيها نتي بشعكاكتك راكي غير منعساها بالترطيبات أوف باراكا علي من المعيور الصباح لله خسرتيلي المود
مريم:خسرتلك المود؟ الله يعطينا وجهك ياوجه الحديدة
بقينا واقفين وكي العادة خرج رضى حط الكرسي وبدا يقرا في الكتاب وأنا حالة في فمي على مصراعيه
شحال كان يبان كوووول فاش كان يجلس يقرا خطار وصافي ومرة مرة كان يطلع عينيه في وفاش يقشعني كانتخبا زعما واخا خفيفة حشومية, المهم بقينا سيمانة هاكدا وبدا يخرج واحد الخبر ديال خالتي الزوهرة كاتقلب على المرة لولدها داكشي علاش جات من الرباط وجابتو معاها تما أنا فشلو ركابي و فكرت فارس أحلامي غادي يطير من يدي الحومة عامرة بنات وخالتي الزوهرة ماعندهاش مع الواليدة بزاف مشيت فيها وضاعمن يدي حب حياتي.

داك النهار ماخرجتش من الدار بديت ناعسة في بيتي وسادة علي كانتصت في أغاني عبد الحليم حافظ
هاد المرة في ديك الأغنية ديال قال ايه جاى الزمان يداوينا من إييييه جاي يازمان يا زمان تداوييينا ...
تنهيدة مورا تنهيدة وأنا مجبدة من فوق الناموسية وحاسة زماني كايتسلت من يدي شوية كانسمع الدقان في الباب تقول بوليس الآداب حليت لقيت خويا الصغير أسامة غوت عليه قتلو
مالك نتا جاي فارع علي الباب يخ كي قالت مي كرشها تخرج غير الزمر
أسامة:ياك هي مابغيتيش تعرفي شكون جا عندنا
أنا:شكون غادي يجي مثلا براد بيت وتريكته تكون غير خالتي حليمة باقي غا تهز قشها وتجي تسكن عندنا
أسامة: وا لا خالتي الزووووووهرة
أنا:عاود عاود شكون؟خالتي الزوهرة؟!!!!!
فاش سمعت خالتي الزوهرة ردعت الباب في وجه أسامة ومشيت كانجري حتى ضربت صبع رجلي الصغير مع رجل الناموسية
ولكن ماعنديش الوقت للآه والآخ بديت نقاد راسي ولبس وماكييت كولشي درته في 10 الدقايق خرجت ضارباها بجرية حتى الصالون تقلت راسي وجيت داخلة بحال شي طاووس بلاتي كانحسب في نحط رجلي سلمت على الواليدة بحال يلا ست سنين ماشافتني و دزت سلمت على خالتي الزهرة بواحد الحشمة والرقة
فاش شافتني قالت:تبارك الله تبارك الله على العزبة كبرتي وزيانتي العفريتة
وأنا نجي خارجة حادرة راسي في الأرض وغير خرجت حطيت ودني حدا الباب وبديت كانتصت
داك شي ديال الثرثرة دخلتو من ودن وخرجتو من لوخرى حتى وصلت المقطع لي سمعت فيه سميت رضى حليت ودني مزيآآان
وفاش سمعت بلي رضى شافني وعجبتو وبغا يتزوجني غوت مرة وحدة
حسيت براسي وحطيت يدي فوق فمي الواليدة وخالتي زهور خرجو يجريو و شافوني لاصقة حدا الباب مالقيت مانقول
بقيت غير حالة فمي فكرت في كذبة سريعة وقتليهم بلي طوبا دازت من حدايا. 

خالتي الزوهرة بدات تضحك وقالت: ههههه وييه دوك الطوبات الله يقطع لباباهوم الجذر كايخلعو
مي بقات تخنزر في وتغدد تما عرفت راسي ديك العشية واكلة وموزعة ..مشاو رجعو للصالون وأنا مشيت طايرة للكوزينا كانوجد في آتاي وأنا فرحانة وكانغني ماتصوروش درجة فرحتي كنت غانطير ونرفرف في الفضاء
جات الوالدة دخلات لقاتني كانوجد في آتاي تخلعت وتزعزعت قاتلي
آش تاديري؟!!
هانتي كاتشوفي يا الميمة الحبيبة كانوجد آتاي لجارتنا العزيزة
الواليدة: من إيمتا ونتي كاتوجدي آتاي لشي حد!!!تي أصلا كاتعرفي ليه
أنا:وهانتي أمي ماتحبطينيش تاني تاواحد مازاد معلم
المهم غير بالسياسة والفن جريت على مي وبقيت كانوجد بقششت الكوزينة كلها زنكة زنكة قصدي باب باب وبواطة وبواطة ويالهول ماوجدت هاللوز هالبيستاش مخبي جابتو خالتي من فرنسا من الصيف لي داز ومي مخبعاه!يا ربي السلامة ..المهم صايبت كولشي وجبدت الميعنات الخاصين بل في أي بي يعني غير الشخصيات المهمة أكيد عدوزتي المستقبلية ضروري
حطيت داكشي وسط ذهول الواليدة جلست حداها كانفرغ في أتاي وأنا نحس بالقريص طالع معايا وهي تاتقول بطرف فمها:واخا يوا بنت الحرام حسابنا من بعد...
وأنا نغوت:آآآح آمي قسحتيني
الواليدة بدات تصفار وتخضار وتضحك بحال ديك الضحة تاع راس الحولي فاش تايكون يتشوط و أنا بقيت كانجهز نفسي نفسيا وجسمانيا للعصا هاد الليلة
جلسنا شربنا أتاي وبقيت أنا ساكتة وحادرة راسي شوية هدرات خالتي الزوهرة: تبارك الله تبارك الله على الزين والتباتة عرفتيني آبنتي لاش جيت هنا ياك؟
أنا بديت نتزنك ونحشم
خالتي الزوهرة: إيوا راني داكرت مع ميمتك قاتلي ضروري نسولو البنت قتليها ماقلتي عيب إيوا شنو قلتي يا ب نتي موافقة ولا ..
أنا: آه آه موافقة موآآآفقة أخالتي ...
خالتي الزوهرة سكتات وبقات تضحك وأنا عقت براسي كحلتها الخفة ديالي بانت وخرجت أصلا كانت هاديك أطول مدة نخبي فيها خفتي ماعرفت منين جاني هاد العقل...
المهم أنا نضت وكملت على برا وخليتهم يتافقو إيمتا يجي حبيبي يشوفني ويخطبوني رسميا من عند الواليد
فاش مشات خالتي زهور يمكن ليكم تخيلو مي آش دارت لي بقيت نطلبها غير وجهي ماتقربوش خفت لا تبان زروقية العين في تصور العرس.

 

كليت لي قسم الله ديك العشية وحمدت الله وشكرتو حتى خرجت منها بدون عاهات مستديمة وكاع داك العصا لي كليت فاش سخفت الواليدة قتليها :
والله آمي حتى ضرب الحبيب زي أكل الزبيب وخليها تهاوش مع راسها ودخلت بيتي ورجعت تاني نحلم بفتى أحلامي
تخيلت راسي لابسة غوب دو سواغي كحل وشيك بزاف ورافعة شعري ورضى لابس كوستيم ومع هو طويل جا يحمق
وأنا دايرة يدي في دراعه وداخلين ريسطو ياباني رآآآقي و فاش جا السرباي عطانا المينو أنا قلت للسرباي: عافاك جيبليا salade chinoise au poulet pour l'entrée و les sushis avec la sauce soja و le dessert بلاش je suis au régime ورضى فاش شافني تانكوموندي بالفرونسي زاد تزعط في وقال واووو مراتي شحال مثقفة شدلي في يدي وباسها وفاش حطولنا الماكلة هز رضى بدوك الخشبات شوية لاسالاد باش يوكلني وقالي :حبيبة قولي آآآآآآه وأنا نقول آآآآآآه ....َآآآآآآآآآآآآآآآخخخ
حسيت بالركلة طالعة معا جنابي حليت عيني لقيت البزقول ديال خويا أسامة تايركل في
تي مالكي طراشيتي نص ساعة وأنا نقولك نوضي بّا بغا يهدر معاك
أنا: تعرف دابا يا وليدي يا أسامة وكان نلحق عليك تانردك كفتة
نضت كانجري عليه وهو تايهرب وفاش شديتو سلختو بالعصا (عندن العنف في العائلة حاجة طبيعية دابا تولفو معاه)
وهو تايغوت واّمي !وا بّا! خرج الواليد لقاني تاندقدق فيه وغوت تغويتة وحدة خلاني جامدة في في بلاصتي
باراكا!!!! واش نتي باقا مابغيتيش ديري عقلك !!واش الناس كايخطبو فيك ونتي مازال كاطيري في المقلاة
دار عند الواليدة وقالها :واش هادي تصلاح لشي زواج الله يهديك.. زيدي تحركي قدامي بغيت نهدر معاك
الواليد كانت عليه الهيبة كيما نقولو يعني هدرة وحدة مايزيدش فوقها ماشي بحال الواليدة سلخيي غوتي دعي نتاحري كاع شكون داها فيك ..فاش قالي بغيت نهدر معاك تما عرفت القضية فيها محاضرة ومواعظ
دخلت جلست ساكتة وهو يهدر:
شوف آبنتي نتي راك باقا صغيرة وحتى العقل الله يجيب ماعندك حتى غرام والزواج راه مسؤوليه كبيرة ماشي غير آجي وتزوج راه تابعو شلا حوايج وخاصه الصبر والحكمة و..
مانكدبش عليكم بقيت كانتصنت حتى لكلمة الزواج راه مسؤوولية تما درت لمخي atteindre حبس
الواليد زاد في الهرود وأنا مشيييت نسرح في شي كوكب آخر حتى وصل: واش متأكدة راكي موافقة على هاد الزواج؟
أنا:آه؟ آه أبا آه والله تامتأكدة
الواليد:إيوا ملاعندي مانزيدك غير الله يكمل عليك بالخير آبنتي والله يهديك
هزيت يدي للسما وقلت:آميييييين. 

صونات خالتي الزوهرة على الواليدة باش تشد موعد باش يجيو يخطبوني رسميا؛ شتو الناس الكلاص 2 دروبا بيناتنا وتاتصوني في التيليفون الصراحة خالتي الزوهرة غاتحولات للرباط تكلاصآآات
المهم بداو التجهيزات على قدم وساق الواليدة بدات تجمع في ال ك راكيب وترمي فوق السطاح وبدات حملة النظافة والتخمال والتوجاد للشهيوات وزيد وزيد وأنا سادة على راسي في بيتي مع مريم تاتوريني الثقافة الزوجية مع هي عندها خبرة في داكشي بقات تشرحلي كيفاش...ويلي ويلي حشمت
جات مي تاتهرس علينا الباب بالدقان
توما خرجو من تما آش تاديرو نتي وياها
مريم:أوالو أخالتي غير تانوريلها كيدير للكسكسو
بقينا كانضحكو شوية خرجات مريم مشات لدارهم وبقيت أنا في بيتي كانوجد راسي لبست واحد القفطان بيض خفيف ودرت واحد المشطة سامبل و مادرت غير فوندوتان وكحل زعما بغيتو يشوفني على طبيعتي أنا أأصلا بماكياج ولا بلا بيه زينة زينة خرجت ومشيت عند مي في الكوزينة قتليها :نعاونك في شي حاجة أميمتي الحبيبة؟
الواليدة: ميمتي الحبيبة ...خلاوها المصريين اسمع كلامك اصدقك اشوف امورك استعجب‏
سمعت الصونات في الباب وجيت كانجري والواليدة تشنق علي من العنق ديال القفطان
ويلي واش كاين شي وحدة تمشي تحل للخطابها ؟!! لا لا نتي موحال واش يكملو عليك
أنا:أووووف آمي ماهنا فال عندك الله يستر يلا مشاو هادو والله لا تزوجتلك والله تانبورليك هنا
مشا الواليد يحل الباب وبقيت أنا كانشوف فيهم من ورا الباب ديال الكوزينة وأنا نقشع حب حياتي كنت غاندوب أعباد الله واش هاد الزين كامل غايتزوج بي أنا
آآآآآآآه صراحة سطاني آش ندير هاد شي غير من البعيد وعمرنا هدرنا آه يآآاني
بقاو كايهدرو في أمور العرس والصداق و داكشي أنا دخلت البلاطو ديال العصير وأنا خاشيا راسي فيه فاش وصلت الطبلة طلعت فيه عيني لقيتو تايشوف في دخلت في الطبلة ديريكت وقلبت الكيسان كلهم بالعصير لي فيهوم فوقها !!!!النص جا فوق الواليد والنص فوق خالتي الزوهرة
في لحظة تبدل لوني وليت بحال شي ماطيشة ووحشمت بزاف ولكن ماعليش غير حبيبي ماقاستو حتى قطرة وماضيعتش ليه الحطة..في ديك الساعة ماعرفت ماندير غير خرجت كانجري للكوزينة وخالتي الزوهرة كاضحاك وتقول ماعليش آبنتي ماطرا باس والواليد وكان ماحشم وكان زرقلي عيني.

 

هربت للكوزينة وأنا بغيت نموت حشمت راسي قدام فتى أحلامي وعدوزتي فاش شافتني الواليدة داخلة ماتانشوفش قدامي قالتي:درتي شي مصيبة ياك أنا عارفة ديك الخفة ديالك
وهو يدخل الواليد يغوت: زيدي مسحي وجمعي داكشي لي دارت بنتك لا حول ولا قوة إلا بالله واش حتى بلاطو ماعرفتي تهزيه نيشان والله ماعرفت آش بغاو فيك هاد الناس
مشات الواليدة جمعات الروينة ومسحات وأنا بقيت في الكوزينة شوية عيطو علي ومشيت جلست معاهم وكانت هاديك أول مرة نسمع فيها صوت محبوبي فاش سلمت عليه وقالي لاباس عليك ماتخيلوش إحساسي رائع رائع رائع جلست وبقيت ساكتة وهدرات خالتي الزوهرة: إيوا مالها عروستنا ساكتة ههههه
أنا زدت غرقت في حوايجي المهم بقينا هاكداك ورضى حتى هو بقا ساكت وماهدرش كان كالم بزاف
تافقو على كولشي حدايا على تلباس الخواتم والعرس لي كان بعد 15 يوم حيت رضى بغا يرجع لخدمته قبل ماتسالي العطلة أنا كنت فرحانة بزاف حيت ماغاديش طول الخطبة ... وفاش سالاو وجاو خارجين بقيت كانتسنا منه يطلب مني نمرة التيليفون ولكن ماطلبهاش قلت ماعليش يمكن حشم من الواليد..
هاديك الليلة بت فايقة وماقدرتش نعس من الفرحة ربي كمل علي بلي بغاه قلبي وبلا عذاب ولا هم يحزنون
حسيت راسي عندي واحد الزهر يهرس الحجر ملي عجبتو والحومة عامرة بنات يمكن ديك السيمانة لي كنت حاضياه فيها من بعيد كان يشوفني وتما تغرم بي ..المهم مانقدرش نوصفليكم إحساسي وغير لي مجربة غادي تفهمني...
في الغد وجدت راسي باش نخرجو أنا والواليدة للسوق 15 يوم راه مدة قصيرة وخاصني نزرب باش نوجد جهازي في 2 سيمانات ماشي ساهلة مشينا تقدينا ورجعنا في حالنا وفاش رجعنا قلت للواليدة:
عافاك أمي خلينا ندوزو على خالتي الزوهرة
الواليدة:واش تسطيتي واش البارح جاو خطبوك واليوم بغيتينا نمشي عندهم بغيتي يقولو علينا ماتيقنا إيمتا خطبوك!
أنا:عافاك آمي عافاك عافاك عافاك
الواليدة: تشعل فيك عافية زيدي تحركي قدامي ماتخلينيش نتفك قدام عباد الله
مشينا للدار وتما خليت الواليدة حتى دخلات توضى أنا طلقت المسجلة وسديت باب بيتي وتسلتت على برا.

 

مشيت وأنا كانفرفر على دار محبوبي ومالقيتوش جالس قدام الباب كيما ديما يقرا في الكتاب قربت ودقيت في الباب وحلات عليا خالتي الزوهرة فاش شافتني حسيت بيها بحال لا استغربت سلمت عليها وقاتلي :نعام آبنتي بغيتي شي حاجة؟أنا ديك الساعة تربط لساني أيييه لسآآني لي كاتقول عليه الواليدة لسانك ولا طويل وخاصو يتقطع .بقيت غير كانفرنس وتزنكت تما فاش حسات بي وقاتلي:زيدي زيدي دخلي آبنتي سمحيلي ماعرفت فين كان بالي سرحان ماعرضتش عليك... دخلت للدار وجلسنا في الصالون وأنا جلست حدا الباب وبقيت كانطل من هنا ومن هناك بحثا عن محبوبي والو مالقيتوش هدرات خالتي الزوهرة قاتلي :اليووم بقيت بوحدي في الدار رضى مشا للسوق يتقدا لي مزيان لي جيتي آبنتي تونسيني
أنا:رضى ماكاينش!
خالتي الزوهرة: واراني قتليك خرج يتقدى هههههههه
أنا:آآآآه ومزيان...
خالتي الزوهرة: نوض ندير كويس آتاي نجمعو عليه
أنا غوتت وجمعت الوقفة: لا آخالتي الزوهرة!!! أنا غير جيت نطل عليك ونشوفك واش لاباس وصآافي خاصني نمشي للدار
خالتي الزوهرة: إيوا يالله جيتي آبنتي مالك مزروبة
أنا: لا لا خاصني نمشي يالله خليتك على خير
جيت بغيت نسلم عليها وأنا نسمع الباب يتحل وحزر فزر مين ياترى؟ محبوبي وفتى أحلامي هاز الخناشي والمصروف وداخل وآاو فاش شفتو هاز الميكات كياني تقلب وتشقلب يعني حتى وهو هاز الميكة بوكوص شكون دعا لي بيه شكون والواليدة كاتدعي علي غير بالخلا بغيت غا نعرف شكون
فاش شفتو خارج رجعت جلست
خالتي الزوهرة: ماشي كنتي مزروبة آبنتي
أنا: آه؟... لا غير...آآآي كرشي وجعاتني
خالتي الزوهرة: ياك لاباس آبنتي
أنا: لا والو باس آخالتي غير المصران كايديرلي هاكا بعض المرات
خالتي الزوهرة شافت واحد النظرة غريبة وتمتمت شي حاجة ماسمعتهاش وقالت:
باقا صغيرة على المصارن أبنتي ياك بعدا ماشي شي حاجة صعيبة
أنا:لا لا آخالتي ماتخافيش صحتي بحال الحلوفة كوني هانية
مع ديك الحلوفة دخل محبوبي ناريييي تخيلو دخل لقاني كانقول على راسي حلوفة الحاصول نيت لساني خاصو القطع على قولة الواليدة
بقا قلبي كايضرب كايضرب فاش سلم علي وجلس بقا كايعاود لمو على السوق وأنا كانشوووف فيه
خالتي الزوهرة فهمات راسها وناضت وخلاتنا بوحدنا وأنا ححشمت الصراحة ماعرفت منين جاني الحيا بقيت جالسة كانتسناه يهدر معايا ولكن والو السيد فات الحيا لهيه تما هدرت أنا
عاودلي على الرباط زوينة؟
رضى:آه كبيرة وزوينة
أنا:نتا أستاذ ياك شمن مادة؟
رضى: المات
أنا:واو كانحماق على المات(أكثر مادة كنت زرقة فيها)
بديت نثرثر وسولتو على الخدمة سولتو على فين ساكن سولتو آش يعجبو ياكل سولتو آش مايعجبوش السيد بقا كايجاوب بحال يلا راه في إستجواب شوية حسيت براسي عيقت وأنا نسكت شوية كانسمع الدقان في الباب فاش حلات خالتي الزوهرة عيطات لي قاتلي صاحبتك تاتسول عليك فاش شفت مريم نارييي عرفتها الواليدة لي مصيفتاها قفآارت علي. 

أنا: مريم ؟آآآآه تكون مي موجدا الغدا وسيفطاتها تعيط علي(الغدا؟هههآآاي قولي العمود ديال الشطابة قولي السلك ديال الضو)
المهم مابغيت نفرش راسي قدام محبوبي نضت بكل هدوء أعصاب ومديت يدي وسلمت عليه وأنا كانتفرنس وكانرمش في عيني سلمت على خالتي الزوهرة وخرجت
مريم:ويلي على الفريفرة واش تي البارح لي خطبوك آش جاية كاديري هنا
أنا:أوف يا مريم لاتزيدينيش تانتي ماقدرتش نصبر ومانشوفوش أصاحبتي كانحبو فهميني عفاك زعما راكي مجربة
مريم:يعطيك حبة في اللسان وكان أنا في بلاصتو ولله لا كملت عليك
أنا:زعما راكي مطفراه مع داك خطيبك بو سنادر وكان ماشي خوتك لي كانو غايطحنوه وكان راه زهق شحال هادي
مريم:بزاف عليك عمر تايحماق علي و خمس سنيييين يالالة وحنا مع بعضياتنا مايقدرش يعيش بلا بي
أنا: تي واش كاضحكي على راسك ولا علي ولا شكون باز وصافي
المهم من تما وحنا نتناكرو حتى وصلنا الدار وبلا مانعاودلكم نفس القصة كليت لي قسم الله وسمعت الأسطوانة المشروخة دخلتها من ودن وخرجتها من الأخرى ودخلت بيتي عمرت ودني وبديت نحلم بنهار لي غادي نتجمعو أنا وحبيبي..
ماعرفتش واش غير أنا ولا ؟كاع البنات تايكونو مخلوعات من نهار عرسهم ولكن أنا بالعكس كنت مستنياه على نار ياك مافيها والو بعدا؟وشنو فيها كاع إيلا البنت كانت تسنا نهار عرسها ياك المفروض هاديك أجمل ليلة في حياتها علاش نتخلع ونخاف أصلا مريم قاتلي غير بحال الشوكة.. ويلي ويلي والله تاتقزدرت
نبدلو الموضوع حسن مايلبسونا الكري
دازو دوك الزوج سيمانات بحال عامين بالنسبة لي كنت كانبغي نهرب نطل على محبوبي ساعا الواليدة ولات طرق علي الباب بالساروت عييت نحتج عييت ندير إضرابات هددت بالإنتحار قاتلي:
وكان غاديريها نيت نتهنا من همك 4 طباسل كسكسو يقضيو الغرض
المرة الوحيدة قبل العرس لي شفت فيها رضى نهار درنا العقد ولبسنا الخواتم وعرضت علينا خالتي الزوهرة للعشا واخا هاكداك ما متعتش بيه عويناتي حيت كنا مجموعين ومّي كل مرة طلع معايا بقرصة
وصل نهار العرس داوني البنات للحمام وسط الزغارت والشطيح والرديح درت تدويشة فاعلة تاركة ورجعت للدار قاداتلي الكافورة وصايبآت لي نقشت جاو البنات وداز جو رائع وفي الليل جات النكافة وصايبت لي التكشيطة المهم تعاملت معاملة الأميرة شحال كنت فرحانة وشحال عجبني الحال
من بعد العشا جا مولاي السلطان أنا فاش شفتو كنت غانسخف تخيلو معايا كيفاش كنت مزعوطة فيه وهو هاز الميكات ديال المصروف ودابا ضارب الحطة الكوستيم بلو ماغين الكرافاط حتى هي والكوبة ديال الشعر ...قلبي الصغير لا يتحمل
دازت ديك الليلة بحال الحلم بالنسبة لي وكانت فرحتي كبيرة لدرجة خفت على راسي منها واخا ختكم هبيلة وماعندها عقل ولكن كنت مخلوعة من ديك السعادة لي كنت فيها.

 

دخلنا البيت وسط الزغارت والفرحة وأنا كنت جلست فوق ناموسيتي و قلبي كايضرب بواحد السرعة ماشي طبيعية وقد ماكنت فرحانة قد ماوليت مخلوعة بقيت خاشية راسي في الأرض ورضى كايحيد حوايجو حشمت بزاف لبس بيجامتو طلع للناموسية ونعس!
أنا مافهمت والو واش هي هادي ليلة العرس؟واش العريس كاينعس بلاما يقول حتى كلمة ويخلي العروسة حالة فهما كاتشوف فيه؟
كاع الخفة لي كانت في وكثرة الهدرة ماقدرت نقول حتى حاجة أصلا آش غانقول نقولو مالك خليتني ونعست..بدلت حوايجي ولبست حوايج النعاس مسحت كاع المكياج لي كان في وجهي ودخلت حتى أنا في الناموسية بلا مانقول حتى كلمة ديك الليلة كانت غريبة بزاف نعست فيها حدا الراجل لي كنت نتسنا النهار لي نتجمعو فيه بفارغ الصبر وملي جا حسيت راسي ناعسة بوحدي في الفراش وكأني مع خشبة
عيت نتقلب عييت ندير حركة والو كيف مانعس وعطاني ضهره بقينا هاكداك ... أنا ما تغمضوش لي العينين الليلة كاملة حتى صبح الحال داني النعاس وكاع الأفكار كايدورو في مخي حاولت نلقى الأسباب والو ماقدرتش منين ضرباتني الفيقة مالقيتوش حدايا بغيت نخرج بالزربة تفكرت راسي راني بحوايج النعاس لبست قفطاني الأبيض وخرجت كانو الناس باقيين كايدورو عندنا تما فاش شافوني بداو الزغارت أنا ماعرفت باش تبليت قربات عندي خالتي الزوهرة وسولاتني:
أمدرا كيداز داكشي؟
آه شنو.. خالتي الزوهرة بقات تشوف في وكاضحك وأنا بالزربة فهمت وقلت لي طاح لي في بالي
مزيان آخالتي الحمد لله
تما فرحات وبدات تضحك وتزغرت وأنا ربي لي عالم بي ...مشيت غسلت وقاديت حالتي ورضىى دخل للبيت فاش كنت كانقاد هدرت معاه قتليه:صباح الخير
شاف في وجاوبني:آه صباح الخير.. هز الفيستا ديالو وجا خارج ...حسيت بالخنقة واش هادا راجلي ولا كيفاش علاش كاع هاد البرود ماشي هاد شي لي كنت متخيلة! جاو دارنا جاوبو لي الفطور وسط فرحة وزغارت الكل فاش لقات مي الفرصة جراتني وسولتني نفس السؤال سبحان الله و أنا كنت موجدة راسي ليه وجاوبتها بنفس الجواب لي جاوبت بيه خالتي الزوهرة.. شوية جريت مريم معايا للبيت وهي تقول لي:
ويلي فين مدخلاني دابا يجي راجلك يبغي يدخل يلقاني هنا
أنا:راه خارج ماراهش هنا..
مريم:ونتي مالكي بنتي لي مسخسخة باينا فيك هاد الليلة بقيتي فايقة تالصباح ههههههه
أنا:أه بقيت فايقة تالصباح ولكن ماشي لي في بالك
مريم:كيفاش مافهمتش؟
أنا:راه ماوقع بيناتنا والو
مريم:كيفاش؟! وعلاش
عاودتليها كولشي وحلفتها ماتقول لحتى مخلوق تما قالت لي:آويلي ياكما يكون...
أنا:لا لا أكيد كان عيان وصافي
مريم :كيفاش عيان واش كاين شي حد ينعس في ليلة عرسه؟! لا لا هادشي في شكل ضروري تفهمي منو مالو
أنا:ماعرفت آش ندير أصاحبتي وحق الله.

 

بقيت كآتمة داكشي في قلبي أنا بنفسي ماعرفتش مني جاني هاد العقل وهاد الصبر وصل الليل قاديت حالتي وماكييت وفاش دخل نفس لي وقع في ليلة العرس!بدل حوايجو ونعس وأنا بقيت كانشوف فيه وعاودتاني ماقدرت نقول والو واش ممكن داكشي لي قاتلي مريم؟ خاصني نسول ونفهم مالو ولكن ماقدرتش نهدر ماعرفتش علاش
كانو الحوارات مابيناتنا مايفوتوش صباح الخير والسلام عليكم ومع دارهم وباقي الناس كايضحك وكايجمع عادي كانبقا غير نشوف فيه فاش كايضحك بحال إيلا ماشي هو لي كايدخل البيت يولي بحال الجماد بقينا على هاد الحال ديك السيمانة كلها في اليوم السابع قاديت حالتي كيما ديما بقيت كانتسنا فيه وفاش دخل وقفت قلت ليه : بغيت نهدر معاك
شاف في وقال:عيان بغيت نعس..
تما تعصصصصبت وتفركعت عليه لدرجة خلعتو بقا واقف وكايشوف في :
علاش كاتعاملني هاكا بغيت نفهم مالك ؟واش حنا مزوجين ولاغالطة؟ واش كاين شي راجل يخلي عروسته وينعس السيمانة الأولى من زواجهم بغيت ك تفهمني مالك !!
شاف في مزيان حتى خويت المزيودة وفرغت قلبي لي كان عامر السيمانة كاملة حيد الفيستا بكل برود أعصاب وقال: أنا هاد الزواج كله من أساسه ماكنتش باغيه
تخيلو كيفاش حسيت ديك الساعة ديك الهدرة لي قالي خلاتني نغلي ونفور ونتعصب رديت عليه : كيفاش!!!!عاود عاود؟مافهمتش
رضى:كيما سمعتي أنا الزواج ماكانش في راسي هاد الساعة ولكن النكير ديال خواتاتي والواليدة باش نتزوج هو لي خلاني نوافق داكشي علاش رجعت معاها لهاد الحومة المبهدلة وطلبات مني نختار البنت لـي بغيت ولا هي غاتخطبلي وتحطني قدام الأمر الواقع ونتي شفتك كل نهار كاتجي توقفي حدا الحيط بالساعات تتفرجي في سولت عليك فاش عرفتك باقيا صغيرة صيفت الواليدة عندك
أنا بقيت غير حالة فمي فيه وهو كايهدر كانت هادي أول مرة نسمع منو خطاب طويل عريض تما أنا زدت جعرت: حطوك قدام الأمر الواقع ؟مالك وليتي ولية وبززوك على الزواج ..ولله تاقالوها مابقا رجال في هاد الزمان
ضحك واحد الضحكة ديال السخرية وقالي:هههههه هادشي لي كنت باغي نيت وحدة صغيرة وخفيفة ندوز معاها شي شهورة ونتحجج بخفتها فاش سمعت أنا هاد الهدرة حسيت بحال يلا الدم كايطبخ في عروقي كان يقولي واحد البال غانهز الطباسل لي جاولي في الكادووات ونهرس باباهم واحد مورا الءآخر فوق راسو ولكن خسارة الطباسل في داك راس الطارو آآآآآآيه راس الطارو بعد ماكنت نقول ليه محبوبي وفتى أحلامي ولا راس الطارو بو القنانف بوزليف(بوراص بالشلحة) بردت أعصابي وقلت:بزاف عليك تادوز بي الوقت وترميني تحسابليك راني شايطة عند دارنا يا عرة الرجالة ..بعد ماقلت هاد الهدرة فكرت الزرواطة ديال مي وتفكرت الهدرة لي قالي الواليد وهي توحلي في الحلقوم.

 

ولكن لا وألف لا أنا لمياء الفنة الزوينة الحادكة(هادي غير كدبتها) أنالي كانو الخطاب يجيو يطلبوني فاش كنت في الإبتدائي(حتى هادي زعتة) يجي هاد راس الطارو يدوز بي شهرين ويرميني؟!!!والله ماحزرت
والله لا طلقت منه أما دارنا أنا عارفة لا رجعت تما كولشي غايرد في الغلط فاش كان يهدر معاي الواليد ماكنتش نسمع منو آآآآآخ يالشمتة ولكن كلو منك يامي عمري سمعت منك شي دعوة ديال الخير غا سيري الله يعطيك الخلا سيري الله يمسخك سيري يعطيك غمة ها الغمة جات بقاي لي على خاطرك...
خلاني راس الطارو كانتهاوش مع راسي ولبس بيجامته ونعس وأنا تايقول لي واحد البال غاحطي المخدة فوق راسو وبركي عليه(ختكم مهبرة شوية بصح والله تازوينة)
جلست ديك الليلة نفكر آش غاندير قد ماكنت غانسطا عليه قد ماوليت كارهاه ولا يجيني بحال شي بوبريص ناعس حدايا
يع على نيف شحال طويل وهاديك لحية لحية العنزي ودنيه مالهم كبار هاكدا بفف ماعرفت فين كنت تنشوف
بقيت تانتمعن فيه وأنا نقول:والله تاغزال...غزال ينطحك ويخرج مصارنك ألمياء واش بنيتك مازال عاجبك..المهم قررت نبدا الحرب عليه ويا بي يا بيه وعلي وعلى أعدائي والله تانخليه يطلب الشرع على ديك الهدرة لي قال
نعست ديك الليلة وكل لي في بالي الإنتقام ولا شيئ غير الإنتقام بديت نتصرف عادي نضحك نهدر ندور في الدار بحال يلا ماواقع والو ولي يسولني واش ولفت نقوله بيخييير ونبدا نعاود عليه شاحل مهلي في وزيد وزيد هو كان يستغرب ويتعجب علاش كاندير هاكا وعلاش مامشيت لدارنا وغضبت حيت ديما كان يبقا تيشوف في فاش كانضحك ونجمع مع الجميع وفاش ندخل للبيت نتغوبش وماكانكلموش أساسا واخا امعرفت آش يوقع كنت ديما مقادة مصايبة حالتي بعض المرات كايدخل كايلقاني ناعسة وفاش كايسولني على شي حاجة كانجاوبو بلا مانشوف فيه
المهم بقينا هاكا تاسالات العطلة وجا الوقت لي خاصو يرجع فيه للرباط وٱكيد حتى أنا معاه جمعت حوايجي وجدت راسي للسفر وداك النهار بكيت فيه بزآآاف وكانت هاديك أول مرة نعرف فيها قيمة الميمة ديالي
سافرت معا راس الطارو وخالتي الزوهرة لمستعمرتي الجديدة لي منها غانبدا الحرب الضارية صراحة مانكدبش عليكم عجباتني الرباط وديما كنت نحلم نمشي ليها وهاني عشت فيها كاع
مشيت للدار الجديدة لي كنت غانعيش فيها بوحدي أنا وراس الطارو هو كان كاري دار وعايش بوحدو قبل مايتزوج بي واخا مو عيات فيه مابغاش يبقى معاهم علم الله آش كان تايخدم فيها بوحدو
فاش دخلت تصدمت من مستوى العفن الدار دايرة بحال دفتر الوساخ تاع التحضيري دخلنا وماقلت حتى كلمة كنا مازال متعاديين ومانتهادروش المهم أنا بقيت غا مصدومة من كمية القاذورات زعما هادا أستاذ ولا زبال مابقيتش عارفة صدق من قال من برا الله الله ومن جوا يعلم الله
دخلت حطيت حوايجي في وسط الروينة وهو حط صاكه وعلق لا فيست وتسرح فوق ناموسيتو ونعس
وأنا بقيت كانشوف في العفن وأنا مصدومة من داك الجنس لي ناعس وبالو هاني ...شمرت على كتافي وبديت نخمل زعما مرة وحدة ربي طيح علي واحد الحداكة وواحد العزيمة باش نقي داري يمكن كنت كانتكل على الواليدة ودابا ملي وليت بوحدي خرجت حداكتي لي كانت مخبية ماعرفت فين المهم بديت نخمل ونرمي في الزبل لي لقيتها ماصالحاش نرميها قلت على الصابون وجافيل مالقيتش وأنا نخرج نقلب على الحانوت ... غاتقولو يالله واصلة لمدينة عمرك شتيها وخارجة بوحدك ماتخافوش علي ختم مرا ونص
خرجت ودغيا لقيت الحانوت تقديت لي بغيت ورجعت خليت الباب محلول ودرت فيه صندالتي باش مايتسدش
بديت حك ياما تحك وراس الطارو ناعس ماجايب للدنيا خبار. 

فقسني ونوض في العصب بداك الهدوء والنعاس ديالو بديت تانقرقب في الماعن نهز السطل ونضربه مع الأرض نحل الباب ونسدو نحل ونسد حسيت بيه كايتقلب و كايصبر راسو باش ماينوضش تما أنا زدت وبديت نغني :هي هي جايا تصفار وتخضار..هي هي طالقة السالف على ليزار ...
بقيت غادية وكانجهد حتى ناض عندي وغوت:بغيت نعرف آش كاديري ولاش كاع هاد الصداع
رديت عليه بلا مانطلع فيه عيني:كاتشوف كانقي عفنك تقول عايش في كوري
راس الطارو وهو معصب: يالالة ماقلتلكش نقي ولا ديري شي حاجة غير هنينا
أنا:شكون قالك كانخمل ونقي على حسابك ههههآاي مسكين أنا كانقي داري فين غاديا نعيش إلى الأبددددد
راس الطارو سكت وبقا غير يشوف نظرة إحباط شوية هدر وقال:منين جبتي الصابون وداك التخربيق
أنا :ولا مانطلع فيه كيما العادة:خرجت وشريتو
راس الطارو:إيمتا هادشي
أنا: فاش كنتي تشخر أراس... أراجلي العزيز
بقا تايهزز في راسو ورجع للبيت وردع الباب موراه وأنا بقيت كانضحآآاك ضحكتي الشريرة أخيرا قدرت نعصبو كملت الشقا ديالي وكملت على الغنا:سالينا سالينا من هادا الحب سالينا... المهم المزاج كان عال العال أول مرة كانشقا وأنا فرحانة
شوية شفتو لبس وخرج وأنا بقيت في الدار نكمل عملية التنظيف صراحة سخفت فاش ساليت ولكن الله على راحة حسيت بيها فاش شفت مستعمرتي نقية إيوا دابا نقدر نجاهد فيها وقلبي مرتاح جلست مسخسخة فوق الناموسية وفاش سمعت ليه كايحل الباب جيت واقفة وبديت ندير راسي بلي راني مازال نشيطة ومازال في الجهد عيط علي وقال:
آجي تغداي.. السيد خرج باش يجيب سندويش وفريت أنا كنت ميتة بالجوع ولكن كرامتي لا تسمح قتليه:
مافي ماياكل غير كول
راس الطارو:دبراسك..
أنا:تاكل فيه جغديد
راس الطارو :شنو قلتي؟
أنا:لا والو قتلك بالصحة أزماني
بقا كاياكل وأنا كانشوف فيه وكانبلع في ريقي الله يستر كلا السندويش ديالو وزاد حتى ديالي ماتقولوش لي ياك نتي لي مابغيتيش ونتي لي كرامتك فوق كرشك غانقوليكم الله يقطع للباباها الجذر كرشي فوق كل إعتبار خليته حتى خرج وأنا راقبته من السرجم حتى درق درت الصندالة في الباب وأنا نخرج للحانوت كانجري
قلت لمول الحانوت يعطيني خبزة ويديرلي فيها 2 طون و2بيضات مسلوقين و يعطيني 2 رايبييات
(لي ضحك نهجرو ليه) بقيت كانقز بحال شي واحد فيه الإسهال دارلي داك شي لي بغيت ومشيت كانجري حتى وصلت الباب جيت ندفعو وأنا نلقاه مسدود.

 

ناري على حصلة حصلتها آش غاندير دابا وكيندير حتى ندخل الدار تفكرت ديك اللعيبة لي كايديرو الشفارة في الأفلام
وحيدت واحد المساك من شعري وحليتو وبديت نخور في الباب ساعا والله لا بغا يتحل
قررت نجلس في الأرض ونتسنى راس الطارو حتا يجي ونقوليه شي كذبة مثلا خرجت نشطب حدا الباب ولكن تفكرت هديك الخبزة لي في يدي
موشكيييلة ويجي يشوفها عندي قررت نضربها تما بالزربة ونرمي الميكة توكلت على الله وبديت سرط ياما تسرط كل شدg قد راسي حتى مشا يوحلي وبديت نكح وهو يتحل الباب و أنا مدابزا مع داك الخبز باش يدوز وراس الطارو واقف على راسي
آش كاديري نتي هنا؟
أنا وفمي عامر بالخبز:آه؟
شفت فيه وشفت في داك الخير لي في يدي و أنا نسد عيني بالفقسة والإحراج جمعت داكشي بالزربة ودخلت كانجري وسديت علي باب البيت
وآآآآاع علاش آزهري علاش فاش جابلي السندويش وعرض علي قلت ليه مافي ماياكل ودابا شافني جالسة في عتبة الباب بحال السعاية خاشيا راسي في الخبزة و2 رابيات حدايا علاش علآآاش...بقيت كانتغدد مع راسي في البيت و مازال باقي لي نص خبزة قلت مع راسي ماعندو ماينفعني الندم نكمل ديك النص خبزة حرام النعمة ضيع ومن بعد ندم على خاطري
ساليت الماكلة وخرجت من البيت حادرة راسي لقيتو كايتفرج في الصالون تما هدر وقالي:
ياك مافيكش الجوع
بقيت ساكتة ومارديتش عليه وزاد:نوض نزيدلك شي خبزة أخرى هههههههههه
بقا يضحاك وأنا بديت نتغدد وناكل في راسي غبية آلمياء غبيييية كيفاش عطيتيه الفرصة يضحك عليك
شوية رجع تاني هدر وقال: هاهو الساروت فوق الطبلة خليه عندك لوكان ماكنتش هنا وكان بتي في الزنقة
أنا الصراحة مارضييييتش ومابغيتش نهزو حتى ناض دخل لللبيت وأنا نمشي نهزو
قلت مع راسي:ماعليش ألمياء هادي غير معركة وخسرتيها مازال الطريق طويلة قدامك باش تخرجي لباباه العينين ...
فاش دخلت ولقيتو ناعس بقيت نفكر شحال نعاسو خفيف وغير يحط راسو على المخدة أكيد راس الطارو ماعندو لاش يخمم كيتي أنا لي بليت راسي بواحد ماباغنيش.

 

نعست وفقت داك الصباح مع التسعة ومالقيتوش حدايا دخلت للكوزينة لقيت البراد ديال آتاي فوق الطبلة وتفكرت أنه بدا الخدمة اليوم قلبت في حوايجو ولقيت استعمال الزمان وعرفت الأوقات فاش يخدم وفاش مايخدمش
بديت كانخمل في الكوزينة حليت الثلاجة ولقيتها عامرة ماكلة إيمتا جاب كاع هاد الشي وصايبو في الثلاجة بديت نبتاسم مع راسي حيت عجبني الحال وأنا نتفكر تاني الكلام لي قالي
تي فيقي ألمياء عمر ليك الثلاجة بالسريط صافي بغيتي تزعطي فيه عاوتاني يالجيعانة
فطرت وجمعت كولشي وجلست نرتاح وجاني قنط كبير عييت نقلب فاش نلتاهى والو بديت نخمم شنو نوجد للغدا خاص فاش يجي راس الطارو يكون موجود مستحيل نخليله الفرصة باش يتهنا مني
واخا كان جابلي المصروف ولكن الخضرة ماكانتش عندي ولكن بطبيعة الحال ختكم ماينخافش عليها خرجت سولت مول الحانوت ودلني على واحد السويقة قريبة بزاف مشيت وبدوك الفلوس لي كانو عندي قضيت بيهم وتقديت خضيرة وحوت رجعت للدار نقيت ديك الحوتة قلبت على شي طاجين مالقيتش وأنا نجبد مقلات ونصبت فيها طاجيني تخيلو شحال كنت فرحانة وفخورة براسي ملي درت كاع هادشي بلا مساعدة أي واحد أييه راني خفيفة وليني حتى مخي خفيف
ريحة الطاجين ياسلام قالبة الدار وأنا جالسة متربعة على عرش مملكتي حسيت راسي ربة بيت ديال بصاح وجد الطاجين وبقيت كانتسنا راس الطارو يرجع وديت نتخيل ردة فعله فاش يلقا الغدا موجود
دازت الوحدة وماجاش مع ذلك بقيت كانتسنا دازت الزوج الثلاثة وحتى الربعة والو ماجاش.. حسيت بمصارني كايتقطعو بالجوع ولكن حلفت ماناكل حتى يجي مابغيتش نخسر منظر أول طاجين نديرو وجا غزال خاصو يشوفو ويعترف بحداكتي .. داني النعاس وأنا كانتسنا فاش سمعت للباب تحل فقت ولقيت الدنيا مظلمة شفت فيه وسولتو: علاش تعطلت وعلاش ماجيتش تغدى شحال تسنيت فيك ماحسيت براسي حتى خرجت دوك الكلمات ماعرفت منين جاوني هو بقا مستغرب من أسئلتي وبقا يشوف في ودخل للبيت وهو تيقول:أنا ماكاناكلش في الدار ماتبقايش تسنايني فاش قالي هاكا حسيت بالإحباط وحبست الدموع بزز مني حاولت نكتم أعصابي ماقدرتش ودخلت عليه للبيت وهو كان تيبدل وبديت كانغوت عليه:شكون يحسابلك راسك كاع باش تعاملني بحال هاكدا
رضى: علاش كيفاش عاملتك.. زعما على الغدا ملي مارجعتش للدار؟أنا قتليك من الأول هاد الزواج ماكنتش باغيه واش ماكاتفهميش ؟!إيلا ماعجبكش الحال هزي حوايجك ورجعي داركم
أنا ماقدرتش نزيد نهدر تبلوكيت حيت عرفت عندو الحق هو قالهالي ولكن أنا لي قررت نلصق فيه فاش خرجت جلست في الصالون بقيت كانفر في كلام جدة الله يرحمها فاش قالتلي واحد النهار :سمعيني يابنتي وهاد الزوج كلمات بغيتك ديريهم حلقات في ودنيك الزين يابنتي مايدوم لايغرك الذهب البراق شحال من ذهب يغوي في شوفتو وهو غير نحاس مشلل.. الذهب يابنتي هو لي يصبر على الزمان وشحال ماطول معاك وتهليتي فيه تزيد قيمته حيت طول عمره غايبقا ذهب حر ...
ديك الساعة ماكنتش نفهم كلام جدة كان يجيني غير خزعبلات من الزهايمر لي كان فيها ولكن دابا وليت فاهمة كل كلمة وفهمت المعنى من بحال يلا كانت عارفة شنو غايوقع لي.

 

حسيت براسي بغيت نبكي لأول مرة حتى فاش قالي في الأول أنا تزوجتك بزز ماجانيش هاد الإحساس ديال الإحباط يمكن اليوم حيت درت مجهود على غير عادتي وصايبت طاجين لأول مرة..آه الطاجين نسيتو
نضت كانجري للكوزينة سخنتو وخرجتو للصالون وجلست جبد ياما تجبد وأنا نتبنن في ديك الحوتة بووووحدي
شكون هاد رضى كاع باش نجوع راسي على قبلو غير راس الطارو لهلا يوكل باباه أنا بغيتله الإسهال إنشاء الله في ديك الماكلة لي راه ياكل على برا لا الإسهال ماشي شي حاجة بغيتلو إنفلونزا العصافير يا رب آمين
بالغدايد لي كانو في بقيت ناكل ناكل حتى لقيت المقلاة خوات وأنا ضرتبها بوحدي خرج باش يمشي للطواليت وشاف في واحد النظرة بحال لا كايشوف في شي ضبع 6 شهور ماكلا ولقا حولي محمر ومشا أنا ساليت وجمعت الماعن وغسلتهم بالزعاف وأنا معصصصبة وكرشي كاتوجعنيييي من الطاجين لي ضربت بوحدي ودخلت نعس وكيما ديما راس الطارو كان نعس
دخلت تانا تخشيت في الناموسية وماقدرتش نعس بقيت نتقلب حيت نيت وجعاتني كرشي وتقلت علي بزاف
بقيت هاكداك وراس الطارو ولله ماتحرك ولا فاق حتى نضت للطواليت ورديت كولشي حسيت الروح بغات تخرج مني فاش ساليت لقيتو ناض وسولني:مالكي واش مريضة؟
أنا مارديتش عليه وتما شدني من يدي وقال:هدرت معاك جاوبيني أكثر نوع كانكرهو هو لي كايتجاهل هدرتي
هزيت فيه عيني وحيدت يدو لي كان شاد بيها يدي:وأنا أكثر نوع كانكرهو هو لي المنافق لي كايتخبا مورا بنت باش يتهرب من مسؤولياتو خليتو واقف هاكداك ودخلت تكمشت في فراشي وهو يدخل هز المخدة ديالو وخرج ردع الباب حتى تزعزت البيت ومشا ينعس في الصالون
أنا:سير أراس الطارو درتي في خير أصلا تما خاصك تنعس لاش مزاحم معايا هنا
ملي رديت حسيت بالراحة داني النعاس مافقت تاصبح الحال فاش سمعت صوت الساعة تفكرت بلي عمرتها البارح باش نوض نوجدلو الفطور وقلت مع راسي شمن فطور ديري نعسي نعسي الله يهديك
فكرت شوية وماعرفتش شنو ليخلاني نوض نضت بزز علي وجدت ليه الفطور وعمرت ليه آتاي وخرجت لقيتو بغا يدخل للكوزينة قلت ليه:ماعرفتش باش كاتفطر واش القهوة ولا آتاي أنا عمرتهم بزوج شرب لي بغيت وأنا غانشرب لاخر خليتو ورجعت البيت كملت على نعاسي فاش فقت دخلت للكوزينة لقيتو فطر وكتبلي ورقة حطهالي كتبلي فيها:هادا هو رقمي قيديه عندك
استغربت علاش زعما عطاني نمرته من نهار تزوجنا وهو يتجاهلني علاش دابا؟!

 

علاش زعما خلالي نمرتو؟أوووف شحال وليت نحلل ونفكر بزاف خلاها وصافي .. لا لا فكرو معايا علاش زعما؟علاش؟علاش؟ علآآآش؟
خملت الدار وأنا نفكر علاش حسيت بالقنطة فاش ساليت عاودتاني مالقيت ماندير حليت باب الدار و وقفت فيها و بديت نطل على الغادي والبادي شوية شفت واحد البنت جاية وكاتحل في الدار لي حدانا بتاسمت لي وسلمات علي وسولاتني:واش نتي هي مرات الأستاذ
أنا:آه أنا مرت راس الطارو
هي:شنو؟
أنا:قتليك آه زعما أنا مرات الأستاذ رضى
هي:مبروك عليك أختي كانت قالت لينا خالتي الزوهرة بلي غاتمشي تخطبله من بلادهم..أنا سميتي إيمان ونتي؟
أنا:أنا سميتي لمياء
متشرفين الزين شحال في عمرك لمياء جيتيني صغيرة
أنا:18 علاين ندخل 19
واو حتى أنا 18 سعداتك تزوجتي وتهنيتي من القراية أنا ولله ماكرهت نتزوج ونتهنى
أنا: شمن زواجه وشمن هنا الله يهديك كملي قرايتك آختي وعيشي حياتك حسن ماتندمي
إيمان:علاش آحبيبة ماعجبكش الزواج
أنا:آه؟ لا زعما بغيت نقولك مسؤوولية الزواج صعيبة بزاف
بقينا كانهدرو بحال يلا كنا صحابات من مدة طويلة أنا فرحت بزاف حيت لقيت معامن نتوانس ونهدر مرة مرة
بقات الحالة ديالنا هاكداك أنا وراس الطارو ماكان حتى تقدم في علاقتنا مانكدبش كان تيجيب لي المصروف ماكانت تخصني حتى حاجة وكان تيخلي الفلوس في الماريو ويقولي نهز منهوم لا حتاجيت في هاد المدة ماكانش يرجع للدار نهائيا كان يخرج للخدمة الصباح ومايرجع حتى للعشية وفي الويكيند مايفيقش حتى يقرب الظهر ويخرج أنا كنت نقنط بزاف بوحدي ولولا إيمان لي كانت تجي لعندي كون راني تسطيت كنا كانهدرو بالساعات بحكم الأعمار ديالنا متقاربة كنا نتافقو بزآآآف
واحد النهار في الويكيند عرضات علي إيمان نخرجو نتساراو وتوريني المدينة وأنا فرحت وتحمست بزاف
فاش ناض هدرت معاه وقلت ليه:إيمان بنت جيرانا عرضت علي نخرجو ندورو واش نمشي؟
راس الطارو:علاش كاتسوليني سيري فين مابغيتي نتي حرة...
أنا:حرة؟ إذن نبقى نخرج إيمتا مابغيت بلا مانقولك؟
سكت شوية وقال:آه ...
أنا:واخا مزيان بزاف كاع شكرا
راس الطارو: العفو..
خليتو هاكداك ومشيت دخلت وجدت راسي باش نخرج لبست وقاديت شعري مزيان ودرت ماكياج وخرجت وهو كايخنزر في وحتى أنا خنزرت فيه لبست الطالون ديالي بدي نعوج في المشية وردعت الباب ومشيت لقيت إيمان كاتسناني حدا الباب
مشينا وقررت داك النهار نستمتع بالخرجة ومانخممش كاع في داك راس الطارو خداتني إيمان لشي بلايص واعرين وشي محلات فيهوم حوايج يحمقو دوزنا النهار كاندورو وفاش جانا الجوع جلسنا كلينا بانيني شحال جاني بنين وزوين المهم الخرجة كانت من أروع مايكون شوية وحنا نتمشاو دزنا حدا واحد القهوة شيك بزاف وغزالة وحنا دايزين شفت راس الطارو نازل من الطوموبيل ومعاه بنت زوينة بزاف وطويلة ودخلو لديك القهوة أنا بقيت مصدومة جريت مورايا إيمان وتبعتهم ودخلت وشفته جالس وكايضحك معاها بواحد الطريقة عمري شفتو كايضحك بيها تما عرفت علاش كايتعامل معايا بداك البرود.

 

بقيت كانشوف فيه هاكداك وحتى إيمان شافتت وقالت:ماشي هاداك هو الأستاذ؟وشكون هاديك لي معاه؟ شوية عاقت وبدات تشوف في وقالت:يالله ألمياء نمشيو تكون غير شي زميلته في الخدمة
أنا تسمرت ومابغيتش نتحرك شوية بدا يعيط على السرباي وشافني تما عينينا تلاقاو شاف في مزيان ودار راسو ماشافنيش وكمل هدرتو وضحكو مع ديك البنت
جراتني إيمان وبزز باش خرجاتني وأنا كنت في صدمة حاولت تهدر معايا وتقولي ماتسرعيش بلا ماتعرفي شنو كاين ولكن أنا لي كنت عارفاه النظرة لي كانت فوجه عمرني شفتها
طلبت من إيمان تسمحلي وشديت تاكسي رجعت فيه للدار جلست تنستناه حتى رجع معطل كيما ديما ملي دخل دار راسو بحال لا ماعارف والو جا يدخل للبيت وأنا نوقف ليه في الطريق
أناشكون هاديك
رضى حيدي خليني ندخل نرتاح
أنا سولتك شكون هاديك لي كنتي معاها
حازني و مشا بغا يدخل للبيت وأنا نجري سديتها بالساروت وشديتو في يدي تما حسيت بيه تعصب
أنا:ماغاديش تخليني كيما ديما واقفة بلا مانفهم فهمني ولا والله لا عطيتك المفتاح
رضى:هاديك حياتي الشخصية ماشي سوقك فيها
أنا:كيفاش حياتك الشخصية !!أنا مراتك بغيتي ولا كرهتي وخاصك تحتارمني واخا ماكتاملش الزواج ديالنا ولكن حنا مزوجين على سنة الله ورسوله وأنا بغيت نعرف آش كايوقع
رضى تعصب و بدا يغوت في وجهي:بغيتي تعرفي آش واقع ؟!!!واخا الالة أنا نفهمك هاديك أستاذة خدامة معايا وبغيتها بزاف ولكن مطلقة وعندها ولد مانقدرش نتزوج بيها ونظلمها من بعد
أنا:شنو؟!!!! ماتقدرش تزوج بيها وتظلمها !!!وأنا ؟؟؟ ماعليش ؟؟طمعني وتصدمني بعد ما بغيتك من قلبي لا بعد ماكنت غانتسطى عليك!!! عرفتي نتا أكبر منافق عرفتو في حياتي..كانكرهك بزاف ومانحملش نعاود نشوف وجهك
رميت ليه المفتاح في الأرض دفعتو ودخلت للطواليت سديت علي من الداخل وجلست كانبكي بحال يلا عمري بكيت في حياتي حسيت راسي غايطرطق علي ندمت على النهار لي جمعت فيه حوايجي وتبعت إنسان ماباغينيش لمدينة لا حنين فيها ولا رحيم فكرت نهدر مع خالتي الزوهرة ولكن ماعرفتش آش غانقول ليها ...فكرت نجمع حوايجي ونزيد لأي بلاصة المهم مانبقاش جالسة...بكيت حتى عييت وخرجت دخلت للبيت ونعست وعيني ماكانوش ينشفو وكملت الليلة وبأنا ندمع بصمت
كيفاش حياتي ولات بهاد التعاسة علاش آربي تنبلا برجل كايبغي بنت أخرى وأنا الطرف الثالث في هاد العلاقة عييت من التفكير ولكن مالقيتش الحل وقررت نخلي الأمور على حالها
الصباح صاوبت الفطور كيما ديما رجعت نعست ومافقتش بكري حالتي كانت حالة شعري مشعكك وعيني منفوخين وماقدرت نحرك والو في الدار رجعت تكمشت في بلاصتي شوية نسمع الباب تحلات وشي صوت ديال التخرشيش والميكات في الكوزينة بديت كانتصنت عرفت بلي هاداك صوت حركة رضى دخل علي البيت وأنا خشيت راسي كله تحت الكاشة حيد الكاشة على وجهي وحط يدو على جبهتي وقال:واش مريضة؟
أنا تفاجأت أول مرة يلمسني شفت فيه وقلت :لا..
رضى :إيوا نوضي أنا جبت الغدا من برا طايب وماتقوليش لي مافي ماناكل وتخرجي تجيبي الخبز والطون
مشا وخلاني مازال مافقت من ديك الصدمة لي كنت فيها.

 

مافهمتش مالو تغير هاكا في ليلة وحدة شهر كمل عمرو رجع يتغدى في الدار شنو زعما دابا بقيت فيه فاش حصلتو مع صاحبتو؟ دابا كيندير واش نتصرف معاه عادي ولا كيفاش؟شنو غاديرو وكان كنتو في بلاصتي زعما واش تزيدو تشعلو العافية وتحيحو ولا تحاولو تحلو الأمور غي بلاتي؟
نضت بالزربة مشطت شعكاكتي وبدلت بيجامتي درت ريحة حيت كنت تاندوخ بريحة النعاس دخلت للكوزينة لقيتو كايحط الغدا في الطباسل وكايصايب شلادة بقيت كانحك في عيني وكانقول مع راسي هادا مالو آش كايدير ماهدرتش معاه مازال معصبة ومصدومة من البارح خدا داكشي حطو فوق الطبلة وأنا بقيت واقفة حتى قالي: لآش واقفة تاتسناي آجي تغداي
أنا ماقدرتش هاد المرة نحبس جنوني حيت هادا دجاج محمر ولايعوض بالخبز والطون عفطت على كرامتي وبركت على باباها وجلست كاناكل معاه بهدوء وبلا حتى كلمة سالينا وجيت نوض نجمع الماعن وقالي :غير جلسي أنا غانجمعهم ... أنا ديك الساعة مانكدبش عليكم تبورش لحمي تقولو هزيتو راس الطارو وحطيتو راس طارو آاخر
ماعلينا خليتو يجمع داكشي ودخلت درت راسي مسخسخة وتكمشت في بلاصتي فاش سالا دخل عندي وقالي :أنا غادي للخدمة إيلا حسيتي راسك عيانة عيطي على مي تجي عندك بينما ساليت الخدمة بسلامة.. فاش قالي هاكا أنا تزعزت أول مرة يقولي بسلامة وهو خارج زعما تبدل بزاف بعد ما انفجرت عليه البارح وكان يحسابلي هاكا وكان درتها شحال هادي
المهم قررت ماندير والو هاد الساعة وندير راسي ماكاين حتى حاجة ونتبعو الكذاب حتى لباب الدار
مشيت للكوزينة نشوف آش دار لقيت عرام الماعن في لافابو والروينة
تررررررر على سيري ترتاحي أنا غانجمع هادا هو الجميع
عريت على كتافي وخملت الكوزينة وحتى الدار كانت مقلوبة خملتها..شوية كانسمع الدقان في الباب لقيت خالتي الزوهرة جات طل علي عمرت آتاي وجلسنا كانهدرو قالت لي بلي رضى هو لي مصيفتها وقالها راني عيانة ضحكت وقلت ليها بلي والو غير عيا بسيط هدرات وقالت:ياكمآا تما شي حاجة
أنا:بحالاش أخالتي
خالتي الزوهرة:شي مومو شي نونو شي كتكوت
أنا: شمن مومو خالتي والله مافهمتك
خالتي الزوهرة:أاويلي مالكي مخك ثقيل زعما واش ماحاملاش
أنا:إيييييييه ههههه يالله فهمت ...
خالتي الزوهرة:إيوا
أنا:إيوا شنو
خالتي الزوهرة:واش بغيتي تفقسيني واش ماحاملاش آوعدي ومكتوبي
أنا: لا خالتي مازال ماكتاب ههيي....
خالتي الزوهرة: ممم تحسابلي.. وعدناك وياك تاكلي شي فانيد
أنا:الله ياودي ياخلتي لا توصي حريص
سالينا داك الكويس ديال آتاي وهي تنوض حمدت الله وشكرتو ... فاش بغات تخرج قالت لي :آه نسيت نقولك غدا معروضين للعشا عند شي ناس وقالولي جيبي عروستك معاك رضى قلتهاليه مابغاش يمشي قالي مشغول المهم نتي عاودي قوليهالو بغا يجي مزيان مابغاش آجي غير نتي عندي للدار ونديك معايا واخا؟
أنا: صافي خالتي كوني هانية.

 

فاش دخل في العشية لقاني جالسة في الصالون سلم علي وقالي: اليوم ماكليت والو على برا وفي الجوع يلا ممكن توجدي لي شي حاجة
أنا:علاه ماعرضتش على صاحبتك الأستاذة للعشا
شاف في مزيان وماقال والو ودخل لبيت أنا ماعرفتش علاش بقا في الحال ملي قتلو ديك الهدرة زعما هو الخائن والمخادع زعما علاش مافرحتش وأنا كانقولو هاكا...
مشيت للكوزينة وطيبت ليه العشا دقيت عليه باب البيت ودخلت لقيتو ناعس أووووف هلكني قتلني بالنعاس ديالو بغيت نخليه ناعس ولكن هو قالي في الجوع بقا في نخليه بايت بلا ماكلة ماعرفتش دابا واش كانكرهو ولا نبغيه ولكن لي عارفا ومتأكدة منو أنه فاش تايكون ناعس كايعجبني بزاف نشوف فيه حاولت نفيقو
رضى..رضى نوض تعشى
فاق مخلوع وشد لي في يدي
أنا: باسم الله مالك كنت تحلم؟
رضى:آه.. هاناي نايض غير سيري ..
خرجت وفاش ناض تاهو جا يتعشى تعشينا بزوج شوية بغا يفتح معايا حوار
كيدوزتي النهار اليوم
أنا:كيغادي يدوز زعما بحال خوتو..
رضى: ماخرجتيش؟
أنا :لا..
تقلبت الأمور من بعد ماكنت أنا لي نعصر منو الهدرة ولا هو كايحاول يعصرها مني
رضى :ماجاتش الواليدة اليوم؟
أنا:آه جات..حقا قالت لي بلي راحنا معروضين
رضى:أنا ماغاديش ماكانحملش دوك الناس
أنا:علاش؟
رضى: معيقين..
أنا:المهم دبراسك أنا غاديا..
رضى:معامن غادية ياك قتليك أنا ماغاديش
أنا:داك النهار قلتي لي نتي حرة عقلتي ياك؟ إيوا سيدي أنا حرة يلا نتا مامشيتش ماشي معناتو أنا ماخاصنيش نمشي
بقا ساكت شوية وهو ينوض بلا مايكمل العشا ومشا هز البيسي للصالون وبدا يخدم
حسيت بيه بحال يلا تكهرب ولا وجهو في شكل فاش قتليه هاد الهدرة أنا جمعت الكوزينة ومشيت جلست حداه شعلت التلفازة وبديت نضحآآاك مع الفيلم وهو مرة مرة كايخنزر فيا في الآخر طفا البيسي وناض بالزعاف للبيت.

 

في الغد صاوبتلو الفطرو كيما ديما ورجعت نعست فاش فقت لقيتو مافطرش راس الطارو غضب على الفطور
ومالو هادا تاني وعلاش غايتقلق ياك ماقلت حتى عيب هو لي قالي نتي حرة ياك بعدا؟
المهم داك النهار كنت عارفاه مايرجعش للغدا زعما راه غضبان ومعصب مشيت كانوجد راسي باش نمشي عند خالتي الزوهره
دوشت ودرت بغوشينك قاديت راسي لبست كسوة طويلة وخفيفة كمامها قصار ودرت ماكياج كيما موالفه بديت كانوجد راسي وهو يدخل راس الطارو
فاش شافني كانماكيي وكانقاد راسي شاف في حيد لافيست ولاحها فوق الناموسيه دخل الكوزينة مالقا والو جا لعندي وقال: واش ماكانش الغدا؟
أنا كانسالي المكياج ديالي :مادرت والو كايحسابلي ماراجعش
راس الطارو حسيت بيه ماعاجبوش الحال المهم أنا تجاهلتو وماديتهاش كاع فيه وكانقول مع راسي
هاكا ألمياء فقسي لي العديان ...خرجت لبست الصباط وهزيت الصاك وهو كان في الصالون قلتليه:
هانا غادية
ناض وقف وقال:واش من دابا راه مازال غير الزوج
أنا:ماعليش نمشي نضرب دورة في المدينة عاد ندوز عند خالتي الزوهرة
تما حسيت بيه بحال إيلا تزنك وتعصب وزاد قال:واش ما عندك ماتلبسي غير داكشي وداك المكياج مسحيه راه معيق
أنا:مالو لبسي كيجاك أولا أنا ديما كانلبس هاكدا ثانيا أنا حرة ثالثا ماعندكش الحق تحاسبني وتحكم في
راس الطارو:كيفاش ماعنديش الحق واش نسيتي راسك آلالة راه راجلك أنا!!!!!
أنا: صراحة ماقدرتش نفهمك مرة تقولي هاد الزواج ماكنتيش باغيه مرة تقولي مادخليش في حياتي الشخصية ومرة نتي حرة سيري فين بغيتي وديري لي بغيتي دابا كاتقول لي أنا راجلك والله تاتلفتني!
تما بقا ساكت وحسيت راسي حشرتو بحال شي طوبة في القنت أححح يا راس الطارو إيلا مامرمدتكش مانكونش أنا لمياء الفريفرة
شوية وهدر: نتي مراتي قدام الناس وصافي وخاصنا نبانو متفاهمين و..
أنا: علاش خاصنا نبانو متفاهمين ياك نت باغي دوز معايا شهرين وطلقني علاش باغي الناس يشوفونا فرحانين؟
راس الطارو:عرفتي شنو نتي راكي أعجب خليقة شفتها في حياتي ومافي مانزيد نعصب راسي في نقاش عقيم معاك
دخلل للبيت وسد عليه الباب وأنا نسمع شي حاجة تضرب مع الأرض من كثرة ماعصبتو ماعرفتش فاش برد غدايدو أنا فاش تانعصبو كانفرحح ونحس براسي قدرت نحرك فيه شي مشاعر ولو كان الغضب ماشي مهم
بديت كانغني وأنا خارجة وفرحانة ومشيت ديريكت لدار خالتي الزوهرة ومامشيتش كاندور كيما قلت لو بقيت جالسة معاهم حتى العشية ومشينا عند دوك الناس فاش دخلت تبهرت بديك الدار لي عندهم باينة لاباس عليهم سولت خالتي الزوهرة كيف تايجيوها قالتلي بلي مولات الدار بنت خالة أمها وعزيزة عليها
دخلنا سلمنا وداكشي كان مخلط عندهم رجال وعيالات زعما عادي بقيت أنا جالسة شويا سولاتني مولات الدار:فين هو رضى أبنتي ؟
أنا:آه؟ رضى.. ما..
ماجيت نكمل الهدرة وأنا نسمع الصوت ديالو في الباب كايسلم. 

تصدمت فاش هو قالي بلي ماكايحملش دوك الناس علاش جا المهم سلم على آلجميع وجلس حدا الحاج مول الدار كيما قلتلكم جلسنا مجموعين الرجال والعيالات واكولشي كان تايجمع وحتى أنا أكيد مابقيتش ساكتة جمعت وضحكت مع الجميع وراس الطارو حاضيني واحد ولدهم هدر وقال :خالتي الزوهرة منين دبرتي على هاد العروسة دمها شحال خفيف هههههه قولي آختي لمياء ماعندكش شي ختك بحالك هاكا زوينة وضحوكية هههههه بقيت كانضحك وعجبني الحال أما راس الطارو مانعاودش ليكم بدا يتقلا ويتشوا حطولنا العشا وختكم فاش شافت البساطل والمشوي والمحمر عيني بداو يدورو وبقيت كاناكل بحال لا عمري شفت النعمة وهو بقا غير حال فمو في
سالينا العشا وجاو يحطولينا الديسير يمميي تارت كلاصي واعرة بالشكلاط والكركاع وهو ينوض راس الطارو راس البرمة راس البالة بقيت لي يفقلو بيها إنشاء الله
يالله خليتكم على خير
الحاج:جلس آولدي مازال ماسالينا العشا
راس الطارو:لا الحاج غدا عندي الخدمة بكري ضروري نمشي.. المهم عياو فيه والو مابغاش يريح وإنا حالة فمي في لا كلاص وأنا نسمع
نوضي نمشيو ألمياء..
أنا مازال تانشوف في لاكلاص :آه؟فين نمشيو؟
راس الطارو: لدارنا أحبيبة فين غانمشيو
أنا مالقيت مانقول بقيت تانشوف فيه وفي لا كلاص والبشر لي جالس كايشوفو في ...في الأخير مالقيت ماندير هزيت الصاك سلمت عليهم وخرجت معاه..
طلعت معاه للطوموبيل وردعت الباب ودرت السطمة وأنا مغوبشة دخل ديمارا الطوموبيل وقال: مالكي ؟عجبك الحال تما ياك
أنا:آه عجبني وبزاف ومن بعد
راس الطارو : مزيان تبارك الله خليتي كولشي حال فيك فمو الضحك والتجماع تقول راكي باقا درية صغيرة
أنا: آه درية وكنتي عارف عقلي عقل الدراري من النهار الأول داك شي لي قلتي لي ونتا لي بغيتني هاكا باش ...
في ديك اللحضة حبس الطوموبيل على جنب الطريق وبدا يغوت علي حتى خلعني عمري ماشفتو معصب بحال هاكا
صافي!!!!باراكا!!!ماتبقايش كل نهار تعاوديلي نفس الهدرا!!! قلتلي قلتلي صافي نساي شنو قلتلك ومحيه من مخك!!!
أنا ماقلت والو بقيت ساكتة شوية رجع ديمارا الطوموبيل ومشينا الدار
مقدرتش نزيد نهدر صراحة مانكدبش عليكم أول مرة نحس بالخوف ونحس راسي محكومة من راجلي زعما باز لي راجلها عاطيها الحرية المطلقة الله يعز الحكام كاتحسي براسك مهمة
دخلنا للدار في واحد الجو مكهررررب أنا مشيت بدلت حوايجي في الحمام وهو في البيت دخلت لقيتو لابس بيجامتو وجالس فوق الناموسية جاني عجب مالقيتوش ناعس كيما ديما دخلت في بلاصتي وهو هدر وقال:سمحيلي...
وهز المخدة والكاشا وخرج للصالون.

 

آآآه على ديك سمحيلي شحال خرجات من فم محبوبي وفتى أحلامي حلوة آآآآيه فتى أحلامي ولي نسمعها تعايرو لي ولا تقول علي راس الطارو نتفها قالك المثل أدعي على ولدي وأكره لي يقول آمين
ولكن علآآش أفتى أحلامي تمش تنعس في الصالون علآآش
فرحت بزاف وحسيت راسي مزوجة ورجعت كانحماق عليه نضت بقت كانطل من باب البيت وأنا كانشوف فيه
الله على محبوبي شحال غزال و...قولو تبارك الله ونتوما مخرجين في عينيكم
دخلت سديت الباب ونعست وأنا فرحانة والفراشات ترفرف في معدتي ...لا واقيلا غير الكاز ديال العشا المضخم هاداك
فقت الصباح وجدت الفطور وتسنيتو حتى خرج وجلست نفطر معاه فطرنا في هدوء شوية بغيت نكسر داك الصمت وقلتلو:اليوم ترجع تغدى؟
محبوبي: يمكن..
أنا حطيت الكاس ديال آتاي وعوجت فمي عليه وهو يقول :غادي نرجع ولكن شنو غاطيبي
أنا:بصاح؟
محبوبي:آه بصاح هههه
أنا:ممم خليلي الفلوس ولا عليك غندير ليك غدا معتبر
محبوبي:واخا هزي لي خاصك راهوم في بلاصتهم كيما ديما..يالله بسلامة خاصني نمشي
نضت معاه ووصلتو للباب وأنا كانتفرنس عليه المهم مارجعتش داك النهار نعس خملت وخرجت نتقدى ودرت بحال شي نحلة من زهرة لزهرة تقديت كاع لي خاصني خديت طاجين تاهو ورجعت للدار وأنا كانغني:
وقتاش تغني يا قلبي إيلا مآغنيتيش اليوم
صايب لمحبوبي أحلى طاجين لحم بالبرقوق ومشيت تقزبت وتعكرت وتعطرت وجلست كانتسنى فيه يجي
حليت البيسي بقيت كانتلاها فيه وأنا نقرا واحد الموضوع سميتو(كيف تجعلين كبورك يطيح على زنافره) وهادا ماكنا نبغي دخلت وقريت داكشي كآآامل وحفظته عن ظهر قلب واخا كنت زرقة في القراية ولكن هادشي دغيا حفضتو قولو سبحان الله
عجباتني واحد القضية ديال لبسي قاميجتو وملي يدخل قوليلو توحشت ريحتك وأنا نقول هي لوولى
مشيت جبت واحد القاميجة بيضا عجباتني ولبستها وهو يدخل فاش نضت نسلم عليه شاف في شوفة في شكل وبدا يضحآآآآك هدرت أنا وقلت:مالك كاضحك ياك لاباس
راسو الطارو(ششش تاوحدة ماتهدر):لا والو غير جيتيني في شكل مع نتي قصيرة تفكرت واحد الفرملية طبوزة في السبيطار
أنا:فرملية طبوزة؟!! بقيت كانشوف فيه هاكداك ودخلت بالزعاف حيدتها ولبست بيجامتي وخرجت وأنا مانقشعش قدامي
محبوبي:ياكما عصبتك راه والله ماقصدت
أنا:شمن ماقصدتش ونتا تشبهني بفرملية طبوزة وقصيرة
محبوبي وهو شابع ضحك: لا ولله حتى نتي زوينة عليها شوية ههههههههههه
جلسنا نتغداو وهو كايضحك وراشقا ليه وأنا منفوخة وبغيت نطرطق. 

محبوبي تغدا معايا وهو فرحان بزاف وكايضحك واخا مانجحتش خطة الإغراء المهم فرحتو ماشي مشكيل فاش سالينا الغدا وجمعت الماعن قالي: لبسي نخرجو اليوم عندي العشية خاوية
أنا:بصاح؟
محبوبي:واش نتي لي نقولك عليها تقولي لي بصاح سيري تلبسي قتلك
أنا:واخا سمعا وطاعة مشيت كانفرفر وخليتو كايضحك مع راسو في الصالون لبست وقاديت الحطة وخرجت لقيتو كايتسناني شاف في وقرب مني تزنكت نحساب راسي بهرتو بجمالي وماعرفت آش غايدير ساعا جبد كلينيكس من جيبو ومسح لي الماكياج من وجهي
كانقولك ماتبقايش ديري كاع هاد المكياج راه معيق وسيري لبسي شي قاميجة ولا شي حاجة فوق هادشي مانحملش نعاود نشوف يديك معريين
أنا ماعترضتش بالعكس فرحححت أنه لقيت لي يربيني زعما كنت موالفة النكير على هاد شي ولكن من فم راجلي طلعت غيييير
دخلت لبس بوليرو وخرجنا خداني لواحد الريسطو كايحمق وطلب لي لا كلاص وقالي: باقي عاقل عليك داك النهار كيفاش كنتي كاتنحنززي في داك لا كلاص
أنا حشمت وقلت ليه:آه وشنو فيها شحال كان كايبان غزال ساعا نتا ماخليتنيش حتى ندوق
محبوبي:هاديك الليلة وكان لقيت وكان خويت ليك داكشي فوق راسك
أنا:وعلاش مالي آش درتليك
محبوبي:آش درتيـ ونتي ديك الليلة شبعتي فيها تفرنيس مع دوك المعيقين
أنا:إوا نتا لي قتلي...
شاف في واحد الشوفة خلاني نحبس الهدرة وبديت نسرط في لاكلاص حتى جمدلي مخي خرجنا وبدينا نتساراو حتى وصل الليل عاد رجعنا للدار ومادرتش العشا حيت كنا شبعانين النها كولو وحنا كاناكلو
قلت هاديك هي الليلة الموعودة دخلت تآآاني وتالت ورابع قاديت راسي تقزبت تعكرت وتعطرت وجلست نتسناه فوق الناموسية دخل لقاني هاكداك شاف في وقالي تصبحي على خير وهز المخدة والكاشا وخرج للصالون
وآآآآع ياربي آاش هاد الموصيبة الكحلة مالو هادا حجرة خشبة طوبيا؟ بقيت حاضياه من الباب وهو كايتقلب في الصالون شحال وأنا حاضياه باش نعس تسلتت بلاتي وهزيت التيليفون على الله نفهم منو شي حاجة قلبت ليه في الميساجات ولقيت ميساجات ديال وحدة كاتقول مالك تبدلت علي؟ علاش ماكاتجاوبنيش أرضى بقششت فيه مزيان وحطيته ودخلت تما فهمت بلي مابقاش كايرد على ديك خيتي المسلوتة ماعرفت آش كان عاجبه فيها قدها قد بوطو ديال الضو لا إنحنائات و لا معالم الأنوثة الحاصول زي القدام زي الورا..
دخلت لبيتي وبالي مرتاح بلي محبوبي بدا يبعد على عمود الإنارة.

 

مازال الوسواس قاتلني مافهمتش هو علاقتنا تحسن ولينا كانهدرو ولا كايرجع للدار بعد ما كان ياكل غير في الزنقة ولكن علآآآآش ينعس في الصالون..وكان ماحشمت وكان أنا لي... ولكن كرامتي لا تسمح ماتقولوش لي ديك كرامتك ديما عافطا عليها في خاطر كرشك آه في خاطر كرشي نبرك عليها ولكن الكسكس لا وألف لا..
الصباح فقت نوجدت ليه الفطور وفطرنا بزوج بينا لبستو لا فيست ديالو وهو يضحك لي مانقولكمش وصلت للسما السابعة ورجعت
مشيت نجمع البيت والبلاصة فين نعس في الصالون ولقيت التيليفون ديالو نساه مشيت نجري باش نعطيه ليه لقيتو مشا وحطيتو..شويا بقا تايصوني هزيتو قريت فيه سميت شيماء.. بقييت كانشووف فيه وترددت بزاف وأنا نجاوب.. بقيت ساكتة وأنا نسمع ألو رضى مالك مابقيتش كاتجاوبني...ألو...ألو... وأنا نقطع عليها
زعما ممكن تكون هي البوطو ديال الضو ؟أكيد هي ..لا لا خاصني نتأكد شديت البورطابل ونقلت النمرة وأنا نتاصل بيها
ألو...ألوووو
بقيت ساكتة ماقدرتش نهدر شووية وهي تقطع علي المفروحة وأنا نعاود
ألو..واش ماكاتحشموش باراكا ماتبسلو علي
أنا: فعلا آختي الله ينعل لي مايحشم
بوطو ديال الضو:باغدون؟
أنا: دوغيان آختي
بوطو ديال الضو:شكون معايا؟
أنا: عيشة قنديشة..واش نتي أستاذة شيماء لي مطلقة وعندك ولد ؟
بوطو ديال الضو:شكون نتي آختي وفين كاتعرفيني؟
أنا تمتمت بشوية:أنا لي غانتفك لا مابعدتي على زماني وفتى أحلامي
بوطو ديال الضو:شنو قلتي ماسمعتكش
أنا:بغيت نتلاقا بيك وبغيت نهدر معاك بخصوص الأستاذ رضى
بوطو ديال الضو:شكون نتي بعدا وشنو علاقتك برضى؟
أنا:حتى نتلاقاو ونفهمك.. بقات ساكتة شوية وهدرت:
أوكي ماشي موشكيل فين نتلاقاو وإيمتا؟
أنا:كاتعرفي واحد القهوة سميتها لاس بالماس حدى البنك التجاري
بوطو ديال الضو:ماكانعرفهاش ولكن باينة شعبية ..غانسول
أنا:شعبية...الله يحرق دمك يابعيدة
بوطو ديال الضو: شنو!
أنا:والو أحبيبتي نتلاقاو من هنا ساعة ونص
وأنا نقطع عليها ماعرفتش هادشي لي كاندير شنو العواقب دياله ولكن ساسوفي عييت مانصبر واه راجلي كايعشق في مرا خرى وأنا حاطة يدي فوق حنكي والله لاخليته ليها وإما أن يكون لي أو لن يكون لأي واحدة أخرى...
ساليت شغالي بالزربة ووجدت راسي للقاء الحاسم وخرجت مشيت لديك القهوة الشعبية على قولة بوطو ديال الضو ولقيتها تما كاتسناني زعما باز وجه الحديدة وجاية قبل الوقت بقيت كانشوف فيها كاتشرب في قهوة كحلة بحال شي كلوشار واش كاين شي أنثى كاتشرب قهوة كحلة البشر
قربت منها وجلست بلا سلام ولا كلام وبقات تتشوف في وهدرت: واش نتي لي تاصلتي بي هاد الصباح؟
أنا:آه هي أنا
بوطو ديال الضو:شكون نتي وفين كاتعرفيني ومنين جبتي نمرتي وشنو علاقتك برضى
أنا:غير بلاتي عليك آزين لا تسوطا لينا الضو والحومة تبات مضلمة
بوطو ديال الضو:مافهمتش آش تتخربقي
أنا:أنا تنخربق؟مقبولة منك آزين... أنا هي مرات السي رضى لي راكي لاصقة فيه
شافت في مزيان وضحكات وهزات القوة وبدات تشرب وهي تشوف في.

 

أنا:علاش كاضحكي جيتك كلون ولا
بوطو ديال الضو: لا حاشا آختي غير جيتيني كيما تخيلتك تماما
أنا:وكيفاش تخيلتيني بالسلامة
بوطو ديال الضو كملت على الضحك تاعها وأنا بقيت كانتفقسسسس ولكن قلت لا ألمياء ماتخليهاش تلعب بأعصابك..
أنا: واش ماحشمتيش تخرجي مع راجل مزوج على قلة الرجال
بوطو ديال الضو: أنا عارفة كولشي على علاقتكم وعارفة زواجكم غير حبر على ورق وعلاقتنا أنا ورضى مايمكنش ليك تفهميها
أنا: شنو عارفة وكيفاش مانقدرش نفهمها ياك ما كبور والشعيبية ولا عنطر وعبلة
بوطو ديال الضو: ههههه بحال داكشي
أنا:أصلا نتي كيفاش قبلتي على راسك تبقاي معاه وهو قبل وتزوج غيرك
بوطو ديال الضو: أنا عارفة بلي زواجكم ماغاديش يستمر وهو تزوج بك غير بسبب الضغوطات من مو وماهي إلا مسألة وقت ويطلقك
أنا:..شوفي ياه غاتفرقي لي على راجلي ولا ماغايعجبك حال
بوطو ديال الضو بدات ضحك:هههههه والله حتى كيما كنت متخيلاك عاود لي عليك رضى وقالي عقلك صغير وللكن حتى تلاقيت بيك عاد فهمت معاناتو معاك الله يحسن عوانو
أنا في ديك اللحضة تعصصصبت والدم بدا يغلي في عروقي تفكرت ديك اللقطة ديال كاس ديال الماء في الأفلام التركية وأنا نهز الكاس لي كان حداها وطشششششش....
دوشت لباباها بداك الكاس وياسلام على إحساس بالإنتعاش خليت كولشي حال فمو في في القهوة واحد الشمكار بدا يصفق علي وأنا نخرج وخليها كاتسب بالفرونسي علم الله آش كانت تقول
رجعت للدار وأنا مازال معصبة جلست وبقيت نتسنا راس الطارو يجي وأنا معولة على خزيت زعما كيفاش قدر يقولها بلي أنا عقلي صغير وكيفاش قدر يعاودلها على علاقتنا وأنا لي كان يحسابلي ولينا سمن على عسل
المهم داك النهار ماطيبت الغدا وبقيت جالسةنتسنى حتى جا وقت باش نحيح عليه وهو يبدا يغوت:
شنو داكشي لي درتي ألمياء واش مابغيتيش تكبري عقلك
أنا:وصلات ليك حبيبة القلب آش وقع
راس الطارو:ماكنتش متوقع منك تصرف بحال هادا
أنآ: شمن تصرف بغيتي ندير واش بنيتك كاتهدر؟ واش بغيتيني نسكت بحال لحمارة ونخليك تعيش حياتك بيخير مع صاحبتك
بوطو ديال الضو: قلتلك ماشي سوقك!!!
أنا بديت نغوت حتى وصل غواتي للزنقة:كيفاش ماشي سوقي واش بغيت تحمقني؟!!!مرة تقولي أنا راجلك مرة تحسسني بلي ولينا قراب ودابا ماشي سوقك...
بوطو ديال الضو: شوفي..
أنا: صافيييييييي سكت علي !!!!صبرت حتى عييت 3 شهور كلها وأنا عايشة معاك ماعارفة فيها راسي من رجلي آش شد علي هاد العذاب وهاد الحياة المكفسة أنا غادي نهنيك مني في مرة وكيما كنتي باغي في الأول ونخليك تعيش كيما بغيت مع حبيبت قلبك
دخلت البيت ديالي وسديت الباب وبديت نبكي وهو خرج وردع الباب موراه
بكيت وبدوك الأعصاب لي كانو في جبدت باليزتي وجمعت فيها حوايجي وخرجت من الدار.

 

خرجت وأنا كانبكي ومقررة بلي هادي هي النهاية وماغديش نزيد حتى نهار نصبر على هاد الحال صافي واخا يقتلوني واخا يقطعوني ماشي سوقي ..شديت تاكسي فاش ركبت سولني الشوفور فين غادية أنا بقيت ساكتة فين غانمشي خالتي الزوهرة لا مشيت عندها أكيد غا تتصل بيه وغاديا تضغط عليه يديني للدار
ودارنا بعاد بزاف مايمكنش لي نسافر بوحدي من الرباط كاع عمري سافرت بوحدي ومانعرفش حتى فين نمشي بقيت هاكداك نفكر وفكرت في إيمان هي لي ممكن نجلس عندها واحد اليومين بينما عرفت آش غاندير
نزلت من التاكسي وجلست في واحد الجردة وصونيت على إيمان:
أنا:ألو إيمان لاباس عليك
إيمان:ألو حبيبة توحشتك مابقيتيش تباني كاع
أنا:حتى أنا والله غير مع الوقت
إيمان:مالو صوتك بنتيلي ماشي هي هاديك
أنا:والو غير شي مشاكيل وصافي
إيمان:ويلي شمن مشاكيل
أنا:حتى نتلاقا ونقولك إيمان بغيت نطلب منك واحد الطلب يلا ممكن
إيمان:شنو حبيبة قولي
أنا:واش ممكن نجلس عندك واحد اليومين؟
إيمان:وايلي على واش ممكن أكيد أصاحبتي غير آجي ولكن دابا راه عندي حصة في العشية منهنا ل2 سوايع تلقايني في الدار ٱأوكي؟
أنا:صافي أختي لهلا يخطيكي عليا وسمحيلي بزاف
إيمان:الدنيا هانية أحبيبتي مرحبا بيك في أي وقيتة
بقيت جالسة في الجريدة ومرة مرة كايطيحو لي الدموع من الفقسة لي كانت في بعد مادازو 2 سوايع مشيت عند إيمان ولقيتها في الدار دخلت عاودت ليها كولشي وبقينا أنا وياها تانعايرو ونسبو في راس الطارو مانكدبش عليكم حسيت راسي بحال لا رتاحيت من بعد كاع داك المعيور
إيمان كانت كارية هي و3 ديال البنات كاع جايين م مدن مختلفة باش يقراو في الرباط وماكانش عندهم مشكل نبقا معاهم دوك اليومين كاع ضريفات صراحة
بقيت جالسة تما وكاخمم في راس الطارو دابا يكون فرحان حيت تهنا مني وأنا بقيت مفقوسة وكانتغدد وكانفكر كيفاش نرجع لدارنا... قررت نتاصل بالواليد هو يجي يردني للدار جيت نهز تيليفوني لقيتو تقاداليه لا شارج ..قلبت على الشارجور في الحوايج مالقيتوش ياك مانسيتو في الدار ؟أوف على زهر سولت البنات على الله يكون شي وحدة عندها بحال شارجور تيليفوني ولكن والو وكان خاصني نبآت حتى الصباح فاش يخرج وندخل نهزو باش مانتلاقاش معاه المهم نعست ديك الليلة والدمعة في عيني والصباح شفت الوقت فاش كايمشي للخدمة وأنا نمشي حليت الباب غير بالشوية ماعرفت يقدر يكون باقي ماخرج ومشيت كانجري للبيت وهزيت الشارجور وجيت خارجة وأنا نتلاقا معاه داخل. 

دخل وشاف في واحد الشوفة تفلق بغل.. هدرت وقتليه:جيت غير باش نهز الشارجور وغاديا وعمرك تعاود تشوف كمارتي تما بدا تاني يغوت وأنا تخلعت وبقيت ساكتة:
واش نتي مريضة ولا شنو ؟فين كنتي!!!!!! واش عرفتي شنو درتي فيّ هادا لليلة!!! ماخليت فين قلبت عليك صبيطارات كوميساريات محطات واش بغيتي تسطيني وتخرجي لي مرارتي !!!! الليل كامل ماشفت فيه النعاس قلبت في دارنا وتاصلت بداركم ودرت راسي كانسول فيهوم وهوما يسولوني عليك عرفتك ممشيتيش تما بايت نقلب عليك ونتي علم الله فين كنتي!!! وكان ماحشمت وكان شديتك قجيتك دابا!!!!
أنا بديت نطيح في الدموع كنت مخلوعة بزاف من غواتو
:ومازال كاتبكي عاد هادي هي ضربني وبكا سبقني وشكا !!شوفي مرة خرى تعاودي تخرجي من الدار بلا خبار ولله تاندير فيك شي موصيبة فهمتي!!...قلتلك واش فهمتي ولا لا؟!!!
أنا كانوح ونشهق:آآآآه فهمت ..
حط يدو على جبهتو وساط وجلس فوق الكرسي وبقيت أنا كانوح ونبكي شوية ناض وجا عندي وعنقني وقال:صافي سكتي
أنا فاش عنقني جيت ساكتة فاش تهدنت شاف في وقال:راني كنت مخلوع عليك بزاف ماتعاوديهاش ألمياء الله يخليك
أنا شفت فيه وقلتلو:واخا والله عمري نعاودها
شفنا في بعضياتنا بحال شاروخان و كاجول و تما... تي حدري عينيك تي وياها وياها مابقات حياة في هاد الزمان آلطييييف...
المهم لكم أن تتخيلو ماذا وقع من بعد لي بغيت نقول لمريم سيري بغيتلك البّاسر...بحال الشوكة يابنت الحرام شوكة تعميك...
المهم من بعد ما دوزنا ليلة العمر (الصباح زعما ) ولينا كانحماقو على بعضياتنا وواعدني يبعد على عمود الإنارة حيت هو أصلا مابقاش يتلاقا معاها غير هي كانت لاصقاه بنت الحرام..
مانعاودليكمش حياتي ولات أحلى من الأفلام واخا كان يعجبني نتفرج فيهم دابا فاش جربت فرق كبييييير صراحة.. رجعت تفكرت هدرة جدة الله يرحمها ويوسع عليها ضيقات القبور تاع الذهب وداكشي..الله يهديك أجدة غير جدي كان زينو على قدو ونتي كنتي تبردي على راسك وتشيخي علي بدوك الزوج كلمات ومالو النحاس المشلل بالذهب ماعليهش الله تاهو لا تهليتي فيه وحضيتيه من أعين الحساد وأيادي اللصوص يبقا ديما يلمع كا ولا ما كا؟
هادي كانت هي قصتي مع محبوبي وفتى أحلامي لي ولينا اليوم بحال قيس وليلى إيوا دعيو معانا البنات بالثبات والذرية الصالحة ودعيو مع ختكم تعقل وتبت شوية حيت مازال فريفرة الله يهديني.
النهاية.

 

قصة من تأليف: أم أسووومة 

اقرأ المزيد

قصة ملاك

الجزء الأول

 انا غادي نحكي ليكوم قصتي لي أيا واحد و لا وحدا داز فالسن ديالي غادي يكون عاش بحالها نعرفكم بنفسي اولا ، انا سميتي ملاك ، عمري19سنة ،بشرتي بيضا و عيني كحلين و شعري كحل طويل ،لي شافني كيقول ليا اسم علي مسمي، من عائلة متوسطة، كنعيش فمدينة الرباط قصتي غتبدا من اول نهار لي فلافاك ، نهار لي غادي تبدا فيه واحد القصة لي واخا دازت عليها 3سنين حتى حدت ولا تفصيل مقدرت نمحيه من الذاكرة ديالي ،كان أول نهارلي لبست تقاديت شوية فطرت سلمت على ماما و خرجت ، صافي ما لقيت حتى حد نمشي معاه فطريق مشيت غي بوحدي مع العلم ان المحاضرات بداو شحال هادي ، صافي وصلت بقيت مندهشة من المنظر ديال لافاك جو مختلف دخلت مكنعرف حتى حد صافي ، كانت عندي محاضرة الإسبانية دخلت و كنقول ياربي مكنعرف حتى حد هنا ، صافي دخلت كانو الصفوفا عامرين او جالسبن فيهم شي وحدين مرتاحيتش ليهم وهنا غنتعرف على شخص لي غيبدل لي حياتي طبعا للأسوء . ياسين :لي يالله جداد كنعرفكم براسي انا الأستاذ ياسين ، كنقري اللغة الأسبانية ، هي لغة جديدة... . صافي شوية بدا تيعطينا فكرة على المحاضرات. انا كنت ساهية ولأول مرة غيهدر معيا . ياسين: انسة واش نتي معاهم ، نسيت معرفتكم على الأستاذ ياسين هو طويل و بيض و عندو جسم رياضي وعينيه عسليين ، وشعرو كحل و رطب وعندو لحية كحلة تقول متراسيا واوو تقول غي شي ممتل تركي ،فعمرو شي 28سنة ممزوجش . أنا : اه آاستاذا . ياسين : اوا نتبهي ا انسة عفاك . أنا : حدرت عيني ، سمح لي استاذ و فالداخل ديالي محاملاهش . صافي سالات المحاضرة خرجت بوحدي او جيت لدار نيشان ، رغما ان لبنات بقاو فلكافي ، دخلت كليت او نعست حتي لصباح كتفيقني ماما :نوضي او نتي خمرا راه صباح هذا ، نضت خرجت

الجزء التاني

 بلا فطور ، دوزت نهار مزيان تعرفت على اصدقاء جداد ، فلعشية دخلنا للمحاضرة ديال هذاك الأستاذ جلسنا انا جلست فالصف الأول لول حدا واحد البنت ضريفة تعرفت عليها سميتها هدى ضريفة بيني و بينكم غي نية او عفوية او ماشي مغرورة فحال شي وحدين ، انا مكنتش حاملا الأستاذ او صافي ، مدخلش ليا اخاطري عندو عقلية فشكل كيحرج الطلاب و خصوصا لس مكينتابهوش للمحاضرة ديالو. او متعجرف او متكبر بزاف. ياسين : آنسة ندى واش درتي lanalyse dyal l Roman ؟ ندي : وي أستاذ . صافي او انا كي العادة ساهية كنفكر فاش غتكون ماما مطيبة فيا الجوع مفاطراش ههه . ياسين : أنسة .. ذكريني بإسمك ... . أنا : آه انن انا سميتي ملاك ، انا فديك اللحظة شدتني الخلعة وا ميمتي معرفتو علاش كيهدر ياسين : يالله الالا ملاك . بقيت ساكتة مفاهما والو معرفتو علاش كيهدر حتي قالت ليا هدى . ياسين : شنو الالاة مكنتيش منتبها . انا في ساع تلونت او وليت حمرا قلتلو بلي مصاوبتوش . ياسين : طبعا سيادتكم معندكش الوقت ، نتي سطحية او باركا عليك تهتمي غي بلحوايج تافهة خلا الطلبة كلهم كي ضحكو و حتا هو بدا كيضحك ياسين : بغيت نسولك واش نتي ماشي طبيعية ؟قولي ؟ دارت بيا الدنيا منكذبش عليكوم وجهي ولا حمر ودموع بغاو يخرجو لي متمالكتش أعصابي حتي هزيت صاكي و خرجت و صلت لدار سديت عليا فبيتي ماما كانت باقا فلخدمة بقيت كنبكي حتي بردت قلبى او كرهتو على شوهة لي دار ليا قدام لي يسوا ولي ميسواش حلفت تندمو علي ديك الهدرة عمرني كرهت شي حد حتي كرهتو ، صافي دازت الأيام وليت لي درناها كنحفظها فدار او كندير البحوث ، صافي ما بين ليلة

الجزء التالث

 وضحاها وليت انا المفضلة عندو كيبقا يتحتت معايا مني تسالي المحاضرة واعتذر ليا وقال ليا بلي مقصدش يجرحني ، لدرجة الطلبة ولاو كيشكو بيناتنا شي علاقة ، ولكين لي خلاني ندير ليه هاكا هو انتقام او ميساج غير مباشر بلي انا ماشي كيفما كيقول وبيني و بينكم ختكم كانت كتعشق تحدي هههه لدرجة لبنات ولاو كيقولولي تبارك الله عليك ربيتيه ههههه واخا هاذ التحول مازال كنت كنكرهو من كل قلبي هاذا الإحساس لي غيتبدل فمرة او غيتحول لإحساس غيدمرني، هو كان متعجرف شوية او كيبقا يضحك مع البنات بزاف ، صافي دازت ليام هكا ومن التفوق و لهتمام لكبير لي وليت كنبينو ولا ديما كيشكرني ههه وليت مشهورة ما علينا واحد النهار جيت معطلة او مدخلتش لمحاضرة ديالو قلت بلا منتحرج مهم كنت خارجة انا ووحد لبنت نجلسو ف شي كافي او من بعد نمشيو نتغدو فشي ريسطو غاديين حتي تلاقينا معا الأستاذ . ياسين : آنسة ملاك المحاضرة ديالي ماشي مهمة هاد الشي علاش مجيتيش (مع العلم ان مسألة الغياب مكتبقاش مهمة و كيفاش استاذ ينتبه ليك من بين 100 طالب او كتر لعجب) . أنا : لا غي تعطلت ا أستاذ . ياسين : اوك شنو عندكم دابا واش خارجين . هدى : والو آ استاذ ، وي . ياسين : أنسة ملاك نتمني تكوني من بعد المحاضرات كتمشي لدار نيشان حيت هاد الشى مكينفعش (الدوران زعما ) أنا بقيت مصدومة حتا صحبتي مهم مشينا جلست فلكافيتيا هدى : هاي هاي اللاة هلاك مبقيتيش ساهلة ولاو عندك المعجبين . أنا : اا ا هدي غير حيت كيشوفني متفوقا او مبغانيش نخرج لطريق مهم غي قلت ليها هكا باش نقنعها وخا بان ليا العكس مهم دازت ليام واحد النهار كنت انا و لبنات كنهدرو كنا جالسين فلكافيتيريا و قلنا نديرو شي خرجة مهم فالطبيعة ، درنا نتلاقاو مورا المحاضرة 

الجزء الرابع

 كلنا هو سمعنا او مني بغينا نخرجو قال ليا:ملاك ما تمشيش معاهم بقاي فلمحاضرة وا ميمتي علي وحلا هذا مالو تاني . مقدرت نقول ليه والو مهم بقيت ، دازت هاديك المحاضرة غي بزز او خرجت لقيت لبنات كيضحكو هاي على ملاك باغا تقرا مصدقتيش . منكدبش عليكم دخلني شك ياك ما هذا كيبغني هههه هاذ شي لي بقا وصلت لدار ما كليت ما والو بقيت غي كنفكر تكيت مداني نعاس حتا لصباح ، لبنات كلهم كيحماقو عليه الا انا مبنت ليه غي انا مهم انا تنويت او رغما ذالك حاولت ننسي هاذ شي ، مهم لغد ليه الحد كنت كندير الدعم فالإسبانية مهم وصلات 8 لبست تقاديت طلقت شعري و درت شوية د المكياج اول مرة نديرو لي دزت من حداه ضروري ميلوح شي كلمة مهم واخا كان لبس ديالي محترم مشيت بوحدي حقاش هدى مريضة صافي غدا و دورة لي غندور كنشوف واحد الوجه مألوف مهم هو ياسين او مشيت بلا منعاود نتلفت مهم قلت واقيلا غي تشابه لي هههه مهم رجعت لدار تعشيت و نعست معطلا شويا صباح فقت لبست دغيا و فطرت،كنت دخلا عندو كي دخلت دخل معصب لحصة كلها او هو يخنزر فيا قبل متسالي لمحاضرة عطاني واح الائحة او طلبني نعمرها او بقيت معاطلا كلشي خرج. ياسين:ملاك نسولك او جاوبيني بصراحة . انا تخلعت ههه واخا مديرا والو انا:تفضل آ أستاذ . ياسين:اش كنتي كديري لبارح فليل فين كنتي غادية . أنا:اناكنت غاديا لسوايع . هذا مالو تاني مهم مهم مشيت لدار تليفوني كان تافي شعلتو او كنلقي ميساج في cc ana yassin lprof dyalkom ,الله هذا مالو تانياو منين جاب numديالي،لغد قال لينا غديرو فرض او تعطيوه ليا.صافي ساليناها. ياسين:ملاك ارا الورقة ديالك نشوف . طلبة لخرين قالهم غي ديوهم لمهم قاليهم غيكون فرض مشابه لهاذا سيرو حاولو تعاودوه او جيبوه ليا الخميس مهم هو 

الجزء الخامس

 هو دارها غي سبة باش يهدر معايا تسنا حتا خرج كلشي وسولني فين ساكنا و بقا شاد الورقة فحلا كيشرح ليا او سولني فاش خدامين واليديا او مني خرجت بقيت حيرا شنو سر هاذ الإهتمام كامل و قلتها لهدى صارحتها و بدات كتقولي هاذا باغي يخطب ههه بقا لي غي زواج ههه رغم هاد شي دخلني شك قلت واقيلا غير كنتخيل هاد الشي عادي هو كيتعامل معايا علي اساس استاذ و طالبة ديالو المتفوقة ههههه مهم ما علينا واحد الدري كبر مني ولا كيتبعني باغي يتصاحب معيا مهم نعرفكم عليه كان سميتو آدم طويل و بشرتو بيضا و شعرو كحل رطب و عينيه خضريين و طويل او انا كنت ما باغاش هو كان زوين لبنات كلهم كيقولو ليا نتي مسخوطة لي مبغاش تصاحبي مع هذاك الزين انا مبغيتش حقاش وليت كنحس بشي حاجة من جيهت الأستاذ و خصوصا انو فواحد المرة سالينا المحاضرة لمهم بدينا كنضحكو او قالينا لي عندو شي سؤال يسولني او خصوصا بحكم سن ديالو لمهم كانو الطلبة حسبينو منهم كيضحكو معاه عادي ، مهم سولو واحد الدري واش مزوج او هو يقول ليه لا مازال باقي ولاكين حاط لعين على وحدة من هنا ، او هو يسولني ياك آملاك انا صافي سالا معيا ، لمهم واخا كان عندي احساس بلي هو كيبغي غي يتفلا ، مشيت لدار غنطير بلفرحة مدانيش النعاس والو من كترة الفرحة ، جا الدور ديال آدام لي غادي يجبد ليا المشاكيل . آدام : ملاك غي وقفي نهدرو عفاك غي جوج دقايق . أنا : آدام راه منصلاحش ليك ، عفاك انا مبغاش نتصاحب. صافي ديما هكا مبغاش يبعد مني قال ليا بغا غي يهدر معايا او من بعد لما بغيتش يبعد مني. آدام : ملاك غي جوج دقايق 

الجزء السادس

 أنا : آدام شنو بغيتي . آدام : كتعجبيني آ ملاك بنت ضريفة او زوينة . أنا : او من بعد سالات دقيقة . آدام : ملاك مالك هاكا . كنا واقفين قدام لافاك او من زهر ديالي ياسين جاي مهم فواحد اللقطة درت غانمشي او هو يشدني آدم من يدي أو قربني ليه او دار يدو فوق كتفي أو قالي : ملاك حتي نتي غادي تكوني معجبة بيا بلا شك هو كان تايق فراسو ، استاذ داز من حدانا او بقا كيخنزر فيا او فعينيه نظرات الكره و الحقد بغيت نخنق هداك الضاسر ديال ادام حيدت ليه يدو . صافي تبعت الأستاذ . كنا داخلين عندو ، مهم بغيت ندخل للقاعة ياسين : اش هاد الوقت الالاة سيري رجعي فين كنتي كان معصب لدرجة سحبتو غيدربني او من تما تبدلت المعاملة ديالو ليا . لمهم لحصة تالية مشيت بكري دخلت حاولت منعطيهش لفرصةباش يخرجني . ياسين : لالاة ملاك من بعد المحاضرة جي عندي نهدرو . مهم من بعد المحاضرة ياسين : انا لاحظت بلي تبدلتي ا لالاة او لمستوي ديالك تراجع مهم نتي مبقيتيش باغا تقراي ياكما... عرفت نتي مصاحبة مع شي حد تلفك ،بغيت نجاوبو ، بقيت غي حدرا راسي او ساكتة او مقدرتش نجاوب فحالا تربط لي لساني او لغد عرفت بلي أستاذ جا عند آدام او قال ليه شنو بينك او بين ملاك آدام حس بشي حاجة مهم بغا ينتاقم قال ليه انا كنعجبها او هي عجباني او لأستاذ قاليه تفرق عليها هي درية ضريفة. 

الجزء السابع

 او فشكل او غا تخرج عليها. اويلي ميمتي ولا عندي مسلسل تعصبت مبقينش كناكل و لا نخرج وليت من دار للافاك غي ساكتة حاولت نشرح ليه او معطانيش فرصة ، تبدل معيا فتعامل و لا مكيتسوقش مديرني فحالا مكيناش او كن قبل لاما كنتش كي بقا يسول عليا علاش مجيتش و يشبعني معيور الا مجيتش فحصتو ، تبدلو بزاف ديال الحوايج . مهم واحد النهار انا غادا مسخراا نجيب شي حاجا او انا نتلاقا معاه جاي او انا نقولو السلام شاف فيا او قال ليا متستاهليش نرد ها عليك .دازت ليام هكا و الحظ السئ بدا كيلعب دور فحياتي ، واحد النهار فقت بكري كنت داخلا مع 9 او الطريق خاوية كان غي شي حد وراية مشفتش مزيان شكون ، و من درت لقيتو آدام الله يا ربي فيما مشيت كنشوفو آدام : ملاك نتي مكتسويش . أنا : اش بيني و بينك تا تقول هاد لهدرة . آدام : حيت هو أستاذ ياك او انا ماشي أستاذ . أنا : واش نتا حمق اش كتخربق . آدام : (شدني بجهد من ذراعي ) او قال ليا نتوما كلكم مكتسواوش . او الأستاذ كان خارج يمكن كان طلب إذن من يمكن كان مريض حيت هو مازال عندو جوج محاضرات مهم شافنا انا دخلت لافاك ، ولا كيحتقرني كتر من لول و مبقاش كيتسوق ليا ، او ولا كيضحك مع البنات باش يفقسني او انا عاد مكنزيد نبغيه لدرجة كبيرة وليت ديما كنفكر فيه او ديكا كنحلم بيه،توحشت كلامو كان كيقولي صباح الخير ملوكتتي توحشتك ، كنا كنهدرو ديما حتي مني كنكونو فلمحاضرة وخا كنكونوفنفس بلاصة، هاد شي كان كخليني طيرة بلفرحة ،لكلمات مغتقدرش تعبر علي السعادة لي كنت كنحس بيهابحدهم ناس لي جربو هاد الإحساس غيحسو بيا مهم سالا لعام او اخر نهار كان عندنا فرض قلت معا راسي غادي نتعطل فيه باش نقدر نهدر معاه مهم خرج كلشي بقيت غي انا . فواحد اللحظة تعصب ضرب المكتب و خرج 

الجزء التامن الآخير

 ياسين : واس باقا مساليتيش ؟ خودي راحتك انا خارج ، خرج او هز لافيست ديالو لمهم انا جاتني البكية كملت الورقة او حتيتها او خرجت او مشينا لواحد الكافي قريبة من لافاك او هو كان خارج او بقيت كنشوف فيه او عمرني تخايلت بلي هادي تقدر تكون اخر مرة نشوفو فيها بحالا حسيت بشي حاجة ماشي طبيعية بقيت كنشوف فيه و حسيت بواحد الإحساس غريب بزاااف بحالا آخر مرة غنتشاوفو . مشيت لدار مقدرتش نتغدا شعلت تليفوني نسيفت ليه ميساج ، كان بلوكاني من الفيسبوك او نمرتو ولات ديما تافيا كنعيط و نعاود او بلا نتيجة مهم ديك 3 أشهر د صيف دوزتها عذاب كندير السبة باش نمشي فين لبلاصة كيسكن علا وعسي نتلاقاه والو مهم مكاينش ليه الأثر ، كملت عايشة علي أمل نشوفو لعام لماجي ولكين هنا كنتلاقا أكبر صدمة فحياتي ، مهم ما علينا معمرني كنت متحمسة بحال داك النهار مني وصلت لافاك شفت الأساتذة لي عندنا واو جيت عندو تاني بغيت نطير بالفرحة من بعد شي يومين كتشفت بلي دار نتقال غي عرفتها معقلتش علي راسي أو خرجت كنبكي من لافاك او كنجري لي كيتلاقاني واخا مكيعرفنيش كيبقا يسولني مالي ، وصلت لدار حلات عليا ماما قالت ليا مالك قلت ليها غي تناقشت مع هدى، مهم دابا دازت 3 سنين علي هاد القصة او كلشي لأحاسيس لي كنت كنحس بيها من فرحة كلشي تحول لحزن ، منقدرش نوصف ليكوم كيف كنت كنحس من بعد ما تخلي علي لدرجة فكرت ف نتاحر مهم من بعد مسمعت بلي تزوج ف بوحد البنت كنت كنعرفها ، باقا كنتفكر كلشي فحالا يالله داز البارح ، نصيحتي لكل بنت ، عمرك تعلقي بشي ، حيت قدما تعلقي بشي شخص غدمري راسك و حياتك . 

النهاية 

اقرأ المزيد

قصة المسامير‬

اعطى اب لابنه يوما كيسا مليئا بالمسامير وقال له ( يا بني كلما اهنت شخص او ضربت شخص او جرحت شخص اذهب الى سور الحديقة واطرق فيه مسماراً
لم يفهم ذلك الولد لماذا طلب والده منه ذلك ولكنه امتثل لامر والده واصبح كلما يظلم احدا او يصرخ بوجه احد او يجرح احدا يطرق مسمارا في ذلك السور ومع مرور الايام اصبح الولد اكثر تحكما في نفسه وانخفض عدد المسامير التي يطرقها كل يوم في السور الى ان وصل اليوم الذي لم يطرق فيه ذلك الولد اي مسمار في السور فطار الولد من شدة الفرح وذهب الى والده واخبره بذلك قال له والده ( احسنت يا بني انت الان شخص تتحكم في نفسك وفي اعصابك ولكن مهمتك لم تنتهي بعد ) استغرب الولد وقال وماذا افعل بعد ذلك يا ابي ؟؟؟ قال الاب ( كل يوم يمضي ولا تزعج او تجرح او تظلم فيه احدا انزع مسمارا من ذلك السور مضت الايام واستمر الولد في نزع المسامير في كل يوم لا يؤذي فيه احدا الى ان وصل اليوم الذي نزع فيه الولد اخر مسمار في ذلك السور فطار الولد من الفرح وذهب الى والده ليخبره بذلك وعندما اخبره اخذ الاب ابنه الى السور وقال احسنت يا بني فانت لم تصبح شخص متحكم في اعصابك فقط ولكنك اصبحت شخص طيب ولا تؤذي احدا ولكن انظر الى الثقوب في السور التي خلفتها تلك المسامير ……… لقد استطعت يا بني ان تنزع المسامير التي طرقتها ولكنك لا تستطيع محو تلك الثقوب التي تركتها المسامير
وكذلك هم البشر يا بني عندما تجرح احدهم فانت تطرق مسمارا في قلبه قد تستطيع ان تعتذر وتنزع ذلك المسمار ولكنك لن تنزع اثره وسيبقى ذكرى مؤلمة في حياة ذلك الشخص
لذلك يا بني لا تجرح الاخرين او تؤذيهم بكلماتك فانك لن تستطيع محو ذلك الجرح الى الابد...

اقرأ المزيد

قصة: صبرت و ربي دار لي اللي فيها الخير

Karima L'hsk: بقلم   
‫ ‏الجزء_الاول

دربتني الفيقة مع 8 و نص ديال الصباح مع الحلة ديال عيني كنلقى ماما جابة جيهتي و هازة العصى ديال الشطابة اهاديكاه واش ما ناوياش تنوضي ولا نجي نتفك من شعرك نضت قفزت من بلاصتي و كنبركم هاهيا نايضة واش ما بقى حد كاينعس فخاطروا فهاد الايام . غير انا قلت هاكا و بدات ماما كتقولي السيناريو ديال كل نهار واش نتي ما بغيتي تنوضي تخدمي ما بغيتي تنوضي تعاونيني ف الشقة شوفي لمياء بنت فاطمة الخدمة و الشقا و الزين كلشي فيها غزال الله يحفظها لواليديها اانا ما نكدبش عليكم فينما كانسمع هاد الهدرة كايتقبض عليا قلبي و كانبغي نبكي واش انا كرهت في الخدمة فينما كانمشي ندفع السيفي كايقولو ليا حتى نعيطو عليك و الا عيطوا عليا كايعطيوني اسئلة لا علاقة و نجيكم نيشان انا لا تتوفر لدي الشروط المستلزمة للشغل اللي هي الشعر زعر و العكر حمر ههههعع
اااه نسيت هدرت بزاف و ما عرفتكمش علا راسي انا سهام ف عمري 21 عام الحمد الله انا زوينة هههع ولا نقص شوية نقولو عندي حقي في الزين كاندير الفولار و عندي 2 خوتي كبار واحد بوليسي و لاخر عندو بوتيك ديال الحوايج و ختي صغر مني كتقرى في الثامنة انا كنت علمية و قرايا كنت باغة نوصل و لكن القدركانت عنده ليا خطط أخرى
المهم نرجعو فين كنا نضت من النعاس و مشيت فطرت و عاونت ماما ف الشقا و انا نقول ليها ماما بغيت نهدر معاك شافت فيا و قالت الله يسمعنا خبار الخير ابنتي ياك لاباس , دابا انا ماما عييت من الدار و الجلاس صافي بغيت نخرج نعاود نقلب علا راسي و نيت راه الخدمة ما غاتجيش عندي حتى الدار , شافت فيا ماما و قالت لي المهم هو تكوني مقتنعة باي خطوة كديريها و الا ماتقبلتيش ما تباقيش تجي و تغبني عليا شداتني الضحكة ههه حيت تفكرت يامي و قلت بسم الله من اليوم غادى نبدا نقلب على خدمة و لكن خاصني نصواب سيفي هو الاول
‫ 

‏الجزء_الثاني 

لبست و تقاديت و خرجت عيطت على صاحبتي صفاء و اللي دامت صداقتنا 7 سنين قلت ليها توجد السيفي ديالها باش نمشيو بجوج ندفعو عالله يسهل علينا الله فهاد النهار انا غادة و هي تبان ليا صفاء جاية و كتشتف
سهام : امالك اصاحبتي غي بشوية عليك
صفاء: هانااا هههه ويلي كون تشوف اش جرا ليا
سهام: اشنو عاوتاني باينة غي شي تخربيق اتصدعي ليا راسي بيه
صفاء: ياكي دابا انا كنقول غي التخربيق
سهام: شوفي اديكاه بلا ماديري ليا داك الدور ديال المضيليمة
صفاء: ياااااك دابا جيني من اللخر
سهام : هههعع عارفاك ما تقدريش تسكتي
صفاء : ههه و المهم كنت جايا و حادرة راسي حتى كنسمع حمزة كيعيط ليا و قالي بلي هدر مع واليديه باش يجيو للدار
سهام :هههه ايوا مبرووك الله الله بقا فيا غي حمزة مسكين تقولب فيك و غا يدي كوفرة عههه
بقينا غادين و كنضحكو حتى وصلنا لمحطة الطوبيس و ركبنا نزلنا و ضربنا على رجلينااا جبدةة حتى وصلنا لواحد الشركة و حنا ندخلوا بقى قلبي كايضرب خفت ندخل و يرفضوني واخا هادي ماشي اول مرة ولكن هاد المرة ماشي بحال المرات اللي دازو هاد المرة متشبتة بفكرة الخدمة و ما باغاش نتخلا عليها
تمينا داخلين و يتعرض لينا السكريتي
اش بغيتو ا لالة
شفت فيه و قلت له حنا بغينا ندفعو السيفي على قبل الخدمة
قالي السيفيات كاناخدهم انا و كندفعهم
L ressource Humaine
ماعجبنيش الحال حيت عرفت بللي السيفي غايبقى حتى يعا و غادي يتلاح في الزبل بقيت كنسايس معاه حتى خلاني طلعت الراسي لبيرو ديال هاد التخربيق و دفعت السيفي ديالي انا و صفاء بصراحة فرحت بزاف حيت قالو ليا بلي كاين الخصاص و لكن ضاروي من المقابلة المهم دارو معانا الغد ليه مع 8 نكونوا تم تمينا خارجين فرحانين شوية هو يبان لي واحد ااسيد شبعان في السكريتي معيور ملي قربت سمعته كيقول
الشخص : واش انا عندي الفندق اللي جا يدخل هذا راه مقر عمل و مايدخل غي اللي عندو علاقة بهاد العمل فهمتي ولا لا
السكريتير : سمح لي اسيدي راه ماكنتش ناوي ندخلها و لكن هي قالت لي بلي السي فؤاد هو اللي دار معاها تجي عنده للشركة
الشخص : انا ما سوقيس ف فؤاد خدمتك ديرها ولا مايعجبك حال
الصراحة انا ماعجبنيش الحال و خصوصا انه السكريتي ضريف و دار معانا مزيان باش ندخلو و بقا فيا
يلاه كنت غادة لجيهتو و هي تشدني صفاء
فين غادة ها الباب

الجزء_الثالث

فين غادة؟ ها الباب
ابلاتي هانا جاية مشيت قاصداه
سمح ليا اسيدي ولكن راه ماشي هاكا كاتهدر مع الخدامة و نتا هاكا هنتيه قدام الغادي و البادي الى كنتى ناوي تعاتبو عيط ليه البيرو و هدر معاه بينك و بينه
دار يديه فيجيابو و شاف فيا بواحد الشوفات حارين و قالي على بالسلامة شكون نتي باش تقولي ليا كيفاش نهدر مع الخدامة دياولي
تلفت ما عرفت ما نقول و بقيت كندم فراسي يا ربي اش درت و ما خدمت حتى انا ولايني فمي ديال تهراس
وقلت مع راسي صلحي الأوضاع
نووو انا ماقصدتش غي هو صراحة بقا فيا و بانت لي واحد السيدة غاادة و كضحك عليه و كيف شتي راه هووو..
خلاني كنهدر و زاد صراحة مارضيتش و لكن في نفس الوقت رتاحيت حيت مشى و ما عرفش بلي انا جيت باش نخدم تما
المهم رجعت للدار و وانا كنتسنا غي امتى ندخل و نقولها لماما . مع الدخلة كنسمع ماما كتهدر مع فاطمة مامات ديك لمياء
ايواااا هنيا عليها حتى هي تستااهل و فين تعرفت عليه
كان خدام معاها و عجباتو و جا هدر معاها بيناتنا اشمن زين و عقل و اداب و نزيييدك لاباس عليه
ايوا الله يسهل عليهم
عقبال لسهام ان شاء الله
اوووف هادي باينة جاية تشفا انعطيها علاش الدور
السلام و عليكم
هاهي جااات يلا ذكرتك بالخير
لهلا يخطيك اخالتي كيدايرة لاباس عليك كيدايرة لمياء
لاباس ابنتي الله يرضي عليك ..ايوا لمياء سهل عليها الله و غادي تزوج و لابدا تحضري الخطبة
الله يكمل بالخير اخالتي و لكن راه مامسالياش من هنا القدام عندي ما يتقضا
ايوا غي شوفي شي وقيت
ماكرهتش ولكن فين تبان لمياء قدام شغالي هزيت عيني فماما لقيتها كتغمز فيا ههه في صراحة عبرت عليها

يلا خليتكم هاد الساعة نمشي نرتاح

طلعت البيتي و انا فرحانة على ود الخدمة و في نفس الوقت على ود قصف الجبهة هههع
انا جالسة كنفكر و هي تقاطع ماما تفكيري
سهام ماشي حشومة هاديك الهدرة اللي قلتي
هههع ماما العار كيجيتك فيها
من واحد الناحية بردتي ليا القلب ولكن ابنتي انا منرضاش اللي يقول عليك قليلة الاداب
و صافي اماما خلينا من هاد الهدرة و اجي تسمعي مشيت اليوم لواحد الشركة و قالوا لي باللي كاين الخصاص و دارو معايا غدا مع 8 نكون تم . دعي معايا اماما الله يسهل عليا فهاد الخديمة
الله يا بنتي شحال فرحتيني الله يسهل عليك ابنتي واحد صفاء اش دارت
ههههع هاديك لاصقة فيا كي الكرادة حتى هي قالو ليها تجي غدا . مهم انا راه فيا الموت ديال الجوع كاين مايتكال
يلا غي زيدي انا نهبط نوجد
واخا ماما
كليت و دوشت و بقيت كنقرى في الانترنيت على الاسئلة اللي كيطرحو في المقابلة و صليت و نعست
الغد ليه فقت بكثرت الوجع اه اه هادي غي الخلعة نضت توضيت و صليت و انا كندعي الله يسهل عليا في هاد النهار لبست واحد سروال الدجين في الزرق و واحد شوميزة في الابيض و فوق منها واحد لافيست في الازرق حاولت نكون رسمية صاوبت شالي و نزلت فطرت سلمت على ماما و بقات مسكينة كدعي معايا و خرجت و انا كنصوني على صفاء
اويلي مال هادي ما كتجاوبش بلاتي نعاود طيط طيط طيط اويلي مال هادي واش نسات شنو اليوم
على وعدي و سعدي شديتها بكعطة لدار صفاء طلات عليا مها. كنهدر و كانهج
خالتي فين هي صفاء.

الجزء_الرابع
 

خالتي فين هي صفاء
هاهي ناعسة ياكما غادين شي بلاصة
اولي وا جريها اخالتي من رجليها قولي ليها تنو ضراه مشا الحال
بقيت كنساين وهي تنزل شالها كله مخربق
شدي ليا صاكي . تسناي نصاوب صباطي .. سهام عندك فنيتة
مهم طريق كاملة و هي فارعة ليا راسي
وصلنا للشركة يلا بغيت ندخل و هي تشد لي صفاء فيدي
زعما غادي نتقبلو
ان شاء الله علاش لا
واخا هاكاك انا خاطري مامهنينيش
وااا صفاء اللي دارها الله هي اللي غادي تكون ما عرفتي الخير فين كاين اللي يسمعك يقول غي مزاحمة مع الوقت حتى نتي بقرايتك و شهاداتك الحمدالله راك قارية و واعية المهم الله يسهل علينا قبل ما دخلي قولي الدعاء
دخلنا و مشينا القاعة اللي غادي ندوزو فيه المقابلة دخلت صفاء هي اللول و انا بقيت كنتسنا و كندعي يا رب تسهل عليها يا ربي سهل ما صعاب
انا كنهدر فخاطري و جالسة كنخمم و هو يبان لي واحد السيد جاي
اجي ماشي هو هاذاك خينة ديال البارح اه اه والله الا هو ناري ماعندي حتى فين نتخبا جبدت تيليفوني و جريت شالي على وجهي ودرت راسي كنكتب شي مساج
بقا جاي حتى وقف حدايا ما شافش جيهتي و قال بواحد الصوت خشن
مافخباركش بلي ممنوع تبقاي تخدمي في التيليفون في الشركة راه كاينين اوقات الاستراحة ديري فيها اللي بغيتي
زدت حضرت راسي و انا كنتفتف قلت له ان شاء الله هادي اخر مرة
يلا تم غادي و هو يرجع 2 خطوات اللور و دار يده ف جيابه و حدر راسه بشوية و هو يقول لي
ماشي نتي هي ديك البنت اللي كادافع على حقوق الخدامة دياولي
غي قال هاكاك عرفت راسي صافي زبلتها قلت له لا ما شي هاكاك
لثاني مرة قاطعني و ماخلانيش نكمل و قالي
نتي ف اينا سيرفيس خدامة و شكون انكادغومو ديالك
بقيت ساكتة و انا نهز عيني فيه و قلت صافي اللي ليها ليها
انا يلا جاية اليوم ندوز واحد المقابلة باش الى كتاب نخدم في الشركة ديالتكم
خلاني واقفة و حل الباب ديال المكتب قال شي حاجة لواحد السيد و خرج و على ما سمعت سميتو فؤاد
المهم بقيت ساهية و كنخمم و كلي خلعة و كنفكر ف صفاء واش جاوبت و لا لا كنت مشوشة الافكار شوية و هي تخرج صفاء و هي فرحااانة
عنقتني و هي تقولي باللي تقبلات و دعات معايا و دخلت
لقيت 2 د الناس قلت السلام و عليكم و بقيت واقفة و هو يقولي واحد السيد تفضلي جلسي و انا مشيت جلست و زيرت عليا يديا ب2 بكثرت ما كنت كترعد
داك السيد لاحظ التوتر ديالي و قالي
ماعندك مناش توتري المهم انا فؤاد و مبروك عليك من غدا يمكن ليك تبداي الخدمة
ما عرفت ما ندير قلت له شكرا بزاف و ان شاء الله نكون عند حسن ظنكم
تميت خارجة و ف بالي كدور مجموعة ديال الاسئلة
علاش ماسولونيش واش لهاد درجة عندهم خصاص لا لا على الاقل يسولوني غي سؤال واحد
حليت الباب و خرجت لقيت صفاء كتسناني انظرة اش درتي
راهم قبلوني
بقات كتقز بالفرحة
و اجي شنو سولوك و اش قالو ليك
صراحة ندهشت ..ما قالت هاكا الا و هي سولوها و دارو معاها اللازم رديت عليها
نتي اللي شنو قالو ليك انا غي دخلت قالو لي من غدا نبدا الخدمة
ههههع ولايني خالتي صفية ( الام ديالي) راضية عليك ههه لا سؤال لا جوج و هانتي دزتي
المهم نسيت الامر و لا نقول تناسيت و قلت نفرح بهاد الخبر بقينا جايين و ضحكتنا كتسمع من اينا بلاد و هي تغوت صفاء

‫ ‏الجزء_الخامس

و هي تغوت صفاء انا تخلعت لقيت حمزة كيضحك
نعرفكم عليه بعدة حمزة عندو 26 عام واحد الدري اللي مامنوش جوج ضريف كثر من القياس و لكن نفسه عزيزة و بوقوص مع راسو كيحماق على شي حاجة سميتها سبوور داكشي علاش هو ديما في صحة جيدة و هو مدير ديال واحد البانكة قريبة لدار صفاء الامر اللي خلات الصدفة تجمعهم ف كل مرة كيشوفها و يتزعط فيها ههه بيناتنا صاحبتي قرطااسة
ناري ا حمزة خلعتينا و خلعتي البنت
ولايني نتوما شحال خوافات حتى الى كان شي شفار اتعاونو عليه و تغلبووه هههه و خصوصا نتي اسهام غي بوحدك تغلبي قبيلة
بقيت كنفرس ليه و كنخسر ف كمارتي و كنعيبو
ايوا سيدي غبرتي علينا ما تصيفطش لينا شي مانضة حتى لخر د الشهر
شد كرشو و بقا كيضحك مالك عاودو ليك عليا كنطبعهم
بقيت كنضحك ماجيت نجمع الضحكة حتى حسيت بواحد الدقة على الراس
وااا صفاء يديك ما عليهمش الكنترول
ههههع لا كاندير ليهم الكنترول و لكن شتك بديتي كتسمسري ليا في الراجل
هههه شتيه هو غي عاطيني اودي ماخسنيش ليكم و لهلا يجعلني نمد يدي لشي حد من غير راجلي الحبيب يااا ربي امين
ههه ايوا يا لالياتي مبرووك الخديمة
غير قولي كيف درتي حتى سقتي الخبار
نقزت صفاء و كتفرنس هيهي انا سيفت لو مساج كيف شتي مسكين كان مخلووع عليا و طاطا طاا
انا مرتي الحبيبة ما كتخبي عليا والو
اودي طلاو بعضياتكم غي طلقنا خلاص و اجي تخطب
راه كنتسنى غي الخوادرية تجي من فرانسا و نجي وان شاء الله
الله يجيبها على خير الله يكمل عليكم بالخير انا فرحت ليكم بزاف تهلاو في بعضياتكم و اهم حاجة الاحترام و الصبر باش المركب يزيد
المهم بقينا غادين تسيفطت معاهم و جيت للدار
لقيت خوتي في الدار و مجموعين و جالسين شادين ف ماما صراحة هذي هي العائلة و لا فلا و خا هكاك عمر خوتي حسسوني باني مراقبة ولا كيضغطو عليا كانو كيتقو فيا بزاااف هادشي اللي خلاني عمر نفكر نخون ثيقتهم فيا
دخلت و هو يقول خويا سعيد(البوليسي)
بشويا و نطلقو عليك البراح الالة

‫ ‏الجزء_السادس

بشويا و نطلقو عليك البراح الالة ساعة سمعنا بلي مشيتي تدبري على الخدمة قلنا نديرو معاك مزيان باش تبقاس دوري معانا ههههه
ضحكت حتى سمعوني الجيران اودي والله تستاهلو من عندي كادو كادو الواحد باركو ليا راه غدا نبدا الخدمة
كلشي فرح ليا و تغدينا مجموعين و خرجت نشري شي حوايج رسميين حيت انا عندي حوايج غي ديال الدوران و الكساوي الطوال و شي لوان لا حول و لا قوة الا بالله و كنت كنقول مال النحل و الذبان كيبقا تابعني ههه مهم رجعت للدار عاونت ماما في العشا تعشينا مجموعين و طلعت نعس و انا كلي تساؤلات غدا كيف غادي يدوز و شنوا السر في اني تقبلت بلا مايسولوني حتى سؤال
فقت في الصباح فيقني غي البورتابل الو سهام صباح الخير
الو صباح النور لاباس
الحمدالله باقا ناعسة
وي عاد فقت ياك لاباس
لا والو باس غي بغيت نقوليك اندوزو عليك انا و حمزة قاليك بغا يوصلنا و نيت يشوفنا فين انخدمو
واخة الالة دوزي عليا تلقايني واجدة
نضت توضيت و صليت و بدلت حوايجي و نزلت
لقيت ماما حتى هي مسكينة فايقة و كتوجد ليا الفطور
اوووه ماما علاش معذبة راسك و فايقة
علاش نتي فين غادة انا نضت وجدت الفطور لختك عندها امتحان
وااع قوليها غي زوينة زعمة ما تقدريش تقولي نضت على قبلك ابنتي و شي كلام بحال هاكا
هههه لا ابنتي انا عندي غي نيشان نيشان
هههه نيشان غي ف الحوايج اللي كتبغي اودي الله يعطيني الصبر
مالك كتهزي علينا الحجر
لا غي صابرة على هبالكم حنا راه صراحة راه الى بغينا راه بمقدورنا نعيشو فابور و هانيين
ايوا كيغاديري ليها
هههه ساهلة اماما حتا واحد فهاد الدار ما بعقلو نوصي صاحبتي صفاء ديكلاري بينا نمشيو لسبيطار الحماق وا هاحنا نعيشوا هانيين
وا زيدي زيدي فطري قبل ما تبقاي بلا فطور راه ديك ختك دخلات في الماكلة طول عرض
واخا هانا جايا
مهم فطرت و خرجت و كالعادة خرجت و انا كنسمع ماما كداعى معايا جات صفاء و ركبنا ف الطوبيل و مشينا
صافي غي هنا اخويا حمزة الله يسهل عليك
هنا فين غتخدمو
ا ه ان شاء الله علاش
لا والو غي هادو عائلة اليوسفي كيتعامل معاهم البنك ديالنا
بصح و شي ناس مزيانين
اش غادي نقوليك انا اللي كنعرف سي اليوسفي قاصح و خايب بزاف و حتى حد ماكايحملو و عندو ولد سميتو ياسين و هو المدير ديال الشركة
اه ايوا اش غادي نقوليك حنا جايين نخدمو و نطلبو من الله يدير شي تاويل الخير
المهم تصيفطنا معاه و دخلنا للشركة
مشينا نيشان لعند سكرتيرة و قالت لينا نمشيو المكتب ديال سي فؤاد هو غادي يقول لينا اش غادي نديرو
المهم مشيت انا و صحيبتي هي شاداها الخلعة كثر مني و مكنززة ههه تشبث غريق بغريق المهم دقيت و انا نسمع تفضل وااااو على بيرو كيداير بقيت حالة فمي و انا نسمعو كيحنحن احم احم 

الجزء_السابع

و انا نسمعو كيحنحن احم احم
تفضلو.. جلسنا و بقا كيهدر لينا على الشركة و شنو هما القوانين اللي خاصو يلتازم بيها الواحد مهم بقينا كنهدرو وكان كيهدر بطلاقة و بوجه بشوش المهم ورانا سيرفيس اللي غادي نخدمو فيه و اللي هو سيرفيس ديال لانفورماتيك اصلا هو الدومين ديالي و فهاد الدومين كلشي كيخدم فيه اون جروب (سمحو ليا شي كلمات ديال الفرونسي كانكتبهم بالعربية حيت فاش كنتتب بفرونسي كتولي الكتابة مخربقة شي ف الليمن و شي ف الليسر ههه )
المهم دازت سيمانة و بديت انا و صفاء كنولفو الخدمة و فينما كنوحلو ف شي حاجة كنلجأوو لفؤاد و واحد السيد اخر قديم ف الدومين حتى لواحد النهار و هي تجي عندنا سكريتر قالت لينا بللي سي ياسين داير اجتماع و كاع الموظفين خاصهم يكونو حاضرين
دخلنا لقاعة الاجتماعات و كان سي فؤاد جالس و حداه سي ياسين المدير العام وهي يقول
اليوم جمعتكم حيت عندنا واحد البروجي كبير و خاص كلشي يخدم فيه ... واحد الكلينيك عاد تحل جديد و خاصنا نصوابو ليهم
Application
اللي كتتحجز لي غونديفو و كيفما كتعرفو بللي بحال هاد لي بروجي خاص يتصوابو بِدِقَة المهم كل واحد فيكم يتكلف ب بارتي و غدا في الصباح جيبو لي
Cahier de charge de projet
و راه عندنا غي شهرين و خاصنا نكونوا سالينا و اهم حاجة نبغي الخدمة تكون متقونة
تمينا غادين و كنفكر اينا بارتي انا غادي نشد غي ما يعطيونيش لاباز ههه ( هادي البلاصة فين كيتسجلو المعلومات)
شوية و انا نسمع سي فؤاد كيهدر مشيت عنده كنجري
سي فؤاد شكون كيفرق لي بارتي الخدمة واش نتا ولا سي ياسين
لا سي ياسين هو اللي كيعطي الخدمة لكل واحد و هدشي على حساب الخبرة ديال كل واحد فيكم..
اااه.. الله ا سي فؤاد نتا ضريف والله و كدير الخير توسط ليا مع سي ياسين هههه و شوف كيدير ما يعطينيش
La base de données
راه ماعنديش معاه
مازال انا فهاد جوج كلمات و هو يقول ليا فؤاد هاهو جا سيري هضري معاه.. سمعو سي ياسين و تم جاي
بقيت كنتفتف و لا لا بغيتك نتا و نتا اللي هدر معاه قاطعني و قال
ياك لاباس
لا والو غي مادموزيل سهام عندها شي افكار و كانت كتناقشهم معايا
بصح مزيان الالة باين عليك مجهدة مع راسك ملي لقيتي الافكار بهاد السرعة
درت ليه الضحة الصفرة هيهي لا لا غي شي حاجة بسيطة مازال خاصني نعاود نفكر و نرتب افكاري
اهاه علاش لا وقيتت الغدا هادي يلا نتغداو و نيت قولي ليا فاش كتفكري
ناااااري قفرتها .. شفت حتى عييت وقلت له صافي
مشينا بثلاثة اه فكرتوني صفاء ماكايناش ههه كتوجدالغد ليه ف ليل جاي سلطان العزارى يطلب يديها (غي يديها هه)
المهم مشينا و بقينا كنتغداو و بقا كيسولني و انا كنجاوبو صراحة هدرت غي ف داكشي اللي كنفهم فيه و عجبوه افكاري واخا مابينش ليا ولكن كان متبع معايا كانت نظراته تابتة و مركززز بقيت كنقول في نفسي او هادا ماكايرمشش ههه لقيت بانه تفكيره راقي و حركاته مدروووسة واو واش هو هاكا من صغرووو و لا هادشي كيقراو عليه ههه
المهم سالينا الغدا و رجعنا الخدمة طلعنا ف السانسور و صلت طاج ديال سيرفيس ديالي يلا غادي نمشي و هو يقول ليا رابور ديال الخدمة ديالك جيبي ليا دابا شوية ماشي حتى لغدا مشا و خلاني
بقيت مصدوومة ويلي واش هادا تسطا كيبغاني ندير لهاد رابور نطير عليه
مشيت البيرو ديالي و بقيت كنخدم عليه قلت ماخاصوش يلقا منين يشدني دازت ساعة هو يسيفط ليا مع سكرتيرة ديالو باش نجيب الخدمة ديالتي و نجي... اويلي انا يلاه بديت و قلت بسم الله امبريميت داكشي اللي خدمت و بقيت غادة و رجليا كيقفقفو و كنققول في نفسي (و جعلنا بين ايديهم سدا و من خلفهم سدا فغشيناهم فهم لايبصرون) ههه هادي ولفت فينما نخرج كنقولها باش ربي يحميني من اي اذى
المهم دقيت و انا نسمع دخل
دخلت و بقيت واقفة
زيدي مالك واقفة
زدت و انا نقول ليه
هاهو الرابور و لكن ماكاملش

‫ ‏الجزء_الثامن

هاهو الرابور و لكن ماكاملش
كيفاش ماكاملش ايوا دابا نتي وليتي ماكاديريش خدمتك
قلت له لا انا بديتو و لكن كيف شتي الوقت ..
ناض و خلاني كنهدر دار يدو فجيابو و بقا كيشوف من الزاج و عاطيني بالظهر و قالي
شتي انا استافدت من الانتقاد ديالك ليا ديال ديك المرة و فاش بغيت نعاتبك عيطت عليك البيرو و هدرت بيني و بينك
دابا استافدي من الغلطة ديالك و حاولي ما تبقايش ضيعي الوقت ديالك اوكي
و لكن نتا ماعطيتينيش اصلا الوقت الكافي باش نقدر نكمل لخدمة ديالي كيف العدااادة قاطعني و قالي صافي هدرتي معاك سلات و غدا ف الصباج جيبي لي خدمتك كاملة
مارضيتش و خرجت و انا دموعي في عينيا احساس خايب احساس بالظلم ماشي اول مرة و لكن هاد المرة مختالفة هاد المرة ماقدرتش ندافع عن نفسي او بصريح العبارة ماباغاش نخسر هاد الخدمة و انا مازال ماسخنت حتى بلاصتي
المهم مشيت البيرو ديالي كنكتب وكانبكي ما كملتش عييت و مشيت للدار ما كانتش عندي الشهية يلاه جات تهدر معايا ماما قلت ليها الله يسهل عليك ما غي خليني دابا راه عندي بزاف ديال الخدمة طلعت لبيتي دوشت و صليت و بقيت كندعي ربي يدير لي شي تاويل الخير
بقيت كنخدم ماحسيتش بالوقت حتى لقيت 4 ديال الصباح اه اه راه هاد الرابور خاصو يكون فيه من 20 صفحة لفوق المهم نضت و نعست
جا الصباح و مشيت للشركة عينيا مسدودين ماشابعاش نعاس المهم كل واحد عطا خدمته لسي ياسين حطهم فوق البيرو و انا الوحيدة من ضمن هاد النااااس كاملين هز خدمتي و قال ليهم غادي ناقشو هاد الافكار اليوم انا بقيت مصدومة و عرفتو بلي ناوي على خزيت بقاو كيناقشو داك التخربيق و ضروري مانهدر و نزيد نوضح الافكار ديالي و صراحة ماتلقيتش بزاف ديال الانتقادات و كلشي عجباتو الخدمة ديالي الا سي ياسين طبعا الي فاش سالاو و مشا كلشي قالي
بلاتي امادموزيل سهام شتك دغيا طرتي
لا ما طرت ما والو هانا باقا ياك لاباس
شاف فيا و هز يديه بواحد اللباقة شاف الساعة و رما لي الخدمة ديالتي فوق البيرو
هاد الخدمة كلها تعاود و جيبيها باش ناقشو انا وياك هاد شي اللي درتي.. و زيدي شي افكار حسن من هادو راه المبتدئين و كايديرو ما حسن من هادشي
صدمني اااو هادا مالو .. شفت حتى عييت قلت له واخا
و تميت خارجة و خاطري مكسور عرفت بلي هادشي كله ضد فيا خصوصا ملي كلشي عجباته خدمتي الا هو .. يا ريتني ماهدرت داك النهار.. بقا عاقل عليا و على ماكايبان لي باللي هو كل نهار يزيد يحقد عليا كثر
بقيت غادة ساهية و هو يوقفني سي فؤاد
تبارك الله على المبدعة ديالنا هاكا نبغيك رفعي ليا راسي الفوق
ياك حتا نتا اسي فؤاد عجباتك خدمتي ياك ياك
كلشي عجباتو خدمتك ماشي غي انا
لا لا سي ياسين عاوتاني نتاقدني و قالي باللي هادشي المبتدئيين و ماكايديروهش
هههه اودي الله يهديك كون كان نيت قاصد هاد الهدرة كون كاع ماوصاني عليك النهار لول باش تخدمي
كفاااااش
:o :o

‫ ‏الجزء_التاسع

كفاش
او على مافخباركش نهار اللي جيتي على قبل المقابلة دخل عندي و قالي هاد البنت قوليها تجي غدا باش تخدم و انا على بالي ديجا هادر معاك و عارف الكفائة ديالك
بقيت مصدوووومة و حالة فمي و كنقول فخاطري ههااااه علاش ماسولوني حتى سؤال زعما كاع هدا زهرعندي و انا اللي واخدة المرتبة الاولى على صعيد الحومة ف النحس و اللي حطيت فيها رجلي ما كاتصدقش
قاطع تفكيري و قالي
شوفي هو ما خدمك الا و انه عارف عندك ما تقولي و شاف العزيمة و الاصرار في عينه .. ياسين قلبه بيض و صفا من الحليب و كل ما كيهمه هو الخدمة بجد وبدون تهاون او غش
اااه وي هادشي اللي بان ليا انا نحاول ندير كثر من جهدي باش مانخيبش ظنكم فيا
مشيت البيرو ديالي و انا فرحااانة على الاقل سي فؤااد طلع ليا المورال شي شوية و كان فيا واحد الحماس باش نعاود الخدمة وهاد المرة مصرة على اني ما نخليهش منين يشدني بقيت خدامة حتى وصلت ديك 7 و هي تعيط ليا صحيبتي صفاء نسيتوها ياكو ههه
الووووو سهام صافا الزين بيخير
الحمدلله و انتي صافا
وي الحمد الله صافا و ناشطة و فرحانا و هادا احسن نهار عندي في حياتي
هههه وي وي رااااه حاسة بيك
هههه اللي يسمعك يقول كل نهار جايينك الخطاب ياك عمر شي واحد ما ساومك حتى بالضحك
هاي هاي على شنيولة مالك نسيتي داك خينة.. كاع تلفتيني على سميتو بغيت ليك تلافا ..و ماما هي اللي كانت رفضاتو
ههههه اااه هاداك اللي ديما طايح لو سروالو... ولايني ضيعتي عليك فرصة راه ولا كايتريني ههه شحال من مرة بان ليا وسروالو هاد المرة مزير عليه هههه ما عندو كيدير باش يطيح
هههه ايوا الحمدالله دار خير فراسو المهم طلقينا عندي الخدمة شنو بغيتي ولا حيت نتي مسالية على بالك كلشي مسالي
اينا خدمة ياك كنخرجو مع 4 و زايدوون بلاتي بلاتي سهام نتي فينك واش نسيتي شنو اليوم دار حمزة جايين يهدروا مع ماما و بابا
اااه والله الى نسيت هانا جااااية نص سااااعة و نكون عندك سمحي لي بزاااااف
قطعت و نضت كنجري كانت الشركة خاوية صراحة شدتني الخلعة و انا هابطة كنسمع شي صوت ديال شي حاجة تهرست ف البيرو ديال سي ياسين
بقيت غادة و كانتحسس غادة غادة حتى حليت الباب ديال البيرو و انا نغوت

‫ ‏الجزء_العاشر

حليت الباب ديال البيرو و انا نغوت كنلقا سي ياسين طايح والسيد مغيب كنفيق فيه والو
بقيت كنجر فيه باش ندخلو لسانسور و والو السيد ثقيل بزز باش وصلت لاسانسور و نزلت عاوني غي السكريتي شديت طاكسي نيشان للسبيطار (ماعنديش فلوس الكلينيك هه)
المهم وصلنا عاوني واحد السيد حتى دخلنا جاو دوك الاطباء دخلوه لداخل و انا بقيت كنتسنا
الله يا ربي اش هاد المشكلة اللي طحت فيها عيطت لصفاء عاودت ليها ماجرا
وادابا شنو ماجاياش
و هانتي اختي كتشوفي الزهر لمكوز ما عندي كيندير و زايدون عيب عليا نمشي و نخليه واخا نكون ماكانعرفوش مانخليهش و نمشي
و نبقى بوحدي ا سهام .. النهار ا سهام اللي ماخاسكش تخلاي عليا فيه ياك ياك
وااااا صحيبتي العزيزة ياك غي غادي يجيو يهدرووو ماهي خطبة ما هو عرس ما هو ضريب الصداق واعافك دابا غي صبري و راه ماما غادة تجي تونسكم... في هاد اللحظات خرج الطبيب و تم جاي لجيهتي .. صفاء صافي قطعي قطعي شوية و نعاود نعيط لك
واش نتي من العائلة ديال المريض
لا
المهم كاتعرفيه
وي وي كنعرفو ياك لاباس اسيدي شنو عندو
لاا والو غي عندو الارهاق باين انه ماكايرتاحش و خاصو ضروري واحد الابرة اللي هي عبارة على فيتامين خاصو يدكها مهم هاهي الورقة خاصك تجيبيها ف اقرب وقت
بقيت كنشوف فديك الورقة و كانخمم هادشي ديال الاعصاب و الارهاق كايكون دواه غالي مالو عاودو ليه عليا عندي بنكة
قبيلة كيتنفخ على الخدمة و دابا نجيب له الدوا سرو غي اللي يخليه مليوح هنا ههه و يمشي يخدم على راحت راحته
مشيت الفارماسيان قالت لي السيدة اللي تم واحد الرقم اللي انا من هول الصدمة حشمت نقوله ليكم عطيتها شي حاجة و شي حاجة بقات كتسالها ليا و خدات من عندي بنت لحرام لاكارت ناسيونال زعما حتى الى بغيتي تنكريني اندكلاري بيك
هههه اودي الى عرفوني دوك البوليس من ديك تصويرة اللي فلاكارط غيتوكلي على الله و ديكلاري
مهم ديت ليهم دوا و دخلت شفته.. اول مرة كندقق في الملامح ديالو
كان بوووقوووص مع راسو و ديك ناموسية يالله قداتو الطولة و التجريدة و باينة عليه كيتريني ويييلي السيد مغيب و انا جالسة كنسكاني فيه
المهم مشيت سينيت على شي وراق باللي انا اللي جبته و انا مسؤوولة على شي تخربيق اللي لحد الان معرفتش شنو هو
مشيت لدار لقيت ماما كتسناني و بدات تليع فيا ياااااااك اللفعة غي خدمتي وليتي مادخلي حتى نصاصات الليل .. وا ماما وا غي صبري .. اسكتي لمك سكتيييي و هي كتليع ... وا زرقتي ليا لحمي يلاه جيت نهرب شداتني من رجلي فين كنتي هاا قولي يلاه فين كنتي ؟
ياك ا ماما كتشكي فيا ياك وا غي سوليني بلا ضرب و نجاوبك .. مهم عاودت ليها كلشي و عطاتني باش نكمل فلوس دواا هههه
اهم حاجة كان عليا نقولها هي الدواا حيت لفلوس مامعاهمش اللعب ههه


‫ ‏الجزء_الحادي_عشر

طلعت جمعت معا صفاء شوية و كانسولها على داك بو ركابي ديالها شحال عطا في الصداق و الشروط و داك التخربيق هههه
قطعت معاها باش النعس والو ماجانيش النعاس كنغمض عيني كنتفكر ياسين .. و ماعرفتش واش غدا نمشي الخدمة و لا نمشي نشوفو هو اللول
الغد ليه بعد تفكير عميق قررت باني ما نمشيش عندو و نمشي للشركة تميت داخلة و انا نتلاقا بالسي فؤاد
اهلا مادموزيل لاباس
وي الحمد الله و انت صافا
شوية وكان واش فخبارك سي ياسين راه مرض البارح و دابا راه في السبيطار
ضربتها بصقلة .. بصح و ياك لاباس اش عندو
ماكاين باس غي كثرت الخدمة و المشاكيل ديال الدار وعلى ما عاود لي قبيلة فاش مشيت عنده بللي دابز هو و باه سي اليوسفي
اااه هاداك عرفته كايعاودو عليه صعيب و مامزيانش
ويلي سكتي لا يسمعوك و يغبروك ههه
ههه سمحلي راح بعض المرات ماكانهدرش بشوية
المهم قالي يلاه نفطرو و نعاود ليك
مشينا الكافيتيريا ديال الشركة و بقا كيعاود ليا باللي ياسين عنده غي باه و واحد خته صغر منه و مزوجة و قال لي باللي هو ماراضيش على الخدمة ديال باه و التعامل ديالو مع الناس .. بنادم كيشوفوا غي فلوس لا غير .. و دابا راه مدابز معاه وقاليه الى ماعجبكش الحال خوي الشركة و عطاه الله اللي يترأسها
الصراحة بقا فيا بزاف حسيت باللي مشاكيلي ماكايسواو والو قدام مشاكيل ياسين بقيت ساهية و كنفكر حتى ديك القهوة اللي كنشربها يا ربي السلامة شحال باسلة.. شوية و انا نشوف فؤاد وقف وقال
ياسين علاش جيتي علاش مابقيتيش ترتاح
وا صاحبي اش غادي نبقى ندير فداك السبيطار الحيحة نايضة فيه ولكن الغايد على اللي جابني عطاه الله الكلينيكات و جايبني لداك السبيطار تقول الحرب الاهلية نايضة فيه
( بقيت كنهدر ف نفسي) اويلي على المخورج لاخر حمدالله اللي هزيتك و درت فيك خير و لايني سرك تبقى غي مليوح يا ندامتي علاش هزيتك
سي فؤاد : اه فكرتيني شكون جابك لسبيطار
بقا كيشوف فيا ياسين ماعرفت باش التبليت اااوْ زعما يكون سول على شكون جابو لا لا ما يمكنش واش انا كتبت غي سميتي و لا السمية و الكنية بففف اش هاد الزهر
قالو لي شي بنت هي اللي جابتني و دايرة الفولار ساعة مارجعت ما والو واخا غي نشكروها .. اش بان ليك امدموزيل سهام مادرات فيها مايصلاح ياك
حدرت راسي و بقيت كنحرك في القهوة و انا منفخة عرفته عايق بيا
ايوا اش غادي نقوليك خاصك تحمد الله اللي لقيتي اللي يهزك و نتا ف ديك الحالة بنات الناس قلالو فهاد الوقت الله يجازيها بالخير
الهزة اللي هزيت عيني لقيتو كيبتسم و لاول مرة كنتسحر بديك الابتسامة كانت ابتسامة بريئة و كنحس بيها خارجة من القلب
كان واقف بثبات و داير يد فجيبه و يد لا.. بقيت ساهية فيه عمري ما انتابهت للحية اللي كان داير كانت مقادة و خفيفة .. عينيه كانو حارين و سميمر بصريح العبارة عنده جاذبية خاصة ..استيقظت من السبات ديالي على صوته
هاي هاي و راك باقا كادافعي على الناس ماعندي مانسالك
خنزرت فيه و قلت ليه المهم الحمدالله على سلامتك سمح لي اسي فؤاد خاصني نمشي لخدمتي
تميت غادة و هو يلحق عليا ياسين
سهام بلاتي درت عنده
وي ياك لاباس

‫ ‏الجزء_الثاني_عشر

وي ياك لاباس
ياكما تقلقتي
لا علاياش غادة نتقلق
شكرا
استنكرت الامر و قلت له
لا شكر على واجب و لكن علاياش .. عاق بيا باللي انا ما باغاهش يعرف باللي انا اللي ديتو للسبيطار وقال لي
شكرا حيت نتي خدامة معانا في هاد الشركة
ابتاسمت و قلت له الشرف ليا ... استأذنت باش نمشي و انا سارحة في افكاري و كنسول راسي علاش ماباغاهش يعرف كون كانت شي وحدة اخرى كون قالتها ليه باش يزيدها ف الصالير و لا غي باش تبان عليه و لكن انا علاش سكت كنحط يدي على قلبي كالقاه كيضرب بمجرد التفكير فيه خلا قلبي يضرب .. ويلي فيقي اسهام فيقي ابنيتي كراه غي ضرباتك الشمس و نتي جالسة ضرب ما يضرب رجعت الخدمة و نهار على نهار كنزيد نتعلق بياسين اكتشفت باللي هو انسان جد متواضع وقلبه بيض كي الثلج و حتى انا زعمت ههه و لينا ديما مغديين مع بعضياتنا و حتا صفاء و فؤاد كيكونو معانا كونا واحد الكليكة زوينة ولكن وقت الخدمة كلشي كيجمع و يطوي ههه الا صفاء كالعادة اللي فارعة ليا راسي بسيدهم حمزة خصوصا باللي الخطبة غادي تكون نهار السبت اللي جاي
جا نهاار الموعود ومشيت عند صفاء من الصباح و انا نشقا و نهز و نعاون حيت غادي يديرو خطبة و ضريب الصداق ماغاديش نقول ليكم باللي حمزة كان مزروب و لكن ديك الشنيولة ديال صحيبتي ههه هي اللي كانت مزروبة ما كاتأمنش بديك المقولة ديال(كل توخيرة فيها خيرة ههه) جاو الناس و الدار عمرات
صفاء واش غادي تخلي شعرك عريان ؟
الا اصاحبتي راه الدنيا مخلطة اندير هاد الشال الذهبي
ايوا بلاتي حتى نقاد ليك شوية ديال الماكياج عاد كملي
اوكي ماتكثريش الله يعطيك الستر
صراحة نتي غزالة بلا هاد الشي و لكن ماتخافيش اندير ليك غي شوية
فاش ساليت بقيت مصدومة ف البنت اللي قدامي تبارك الله ملاك وصافي تألقت صفاء بواحد التكشيطة ف البيض و مرصعة بالحجر بالذهبي و دارت شال ف الذهبي و صبيبيط عالي شوية
طلعتي كتحمقي و كتهبلي ماشاءالله ( تغرغرو ليا عينيا بالدموع ..فرحة و في نفس الوقت بحال هاذ المواقف كايأثرو فيا بزاف)
ويلي على الحمقة كتبكي .. نووو ما تقوليهاش ههه وا صافي اصاحبتي لا يصحاب ليك غي غادي نتزوج غادة نبعد عليك و مانبقاش نشوفك و زيد على ذلك خلاني حمزة نكمل الخدمة

‫ ‏الجزء_الثالث_عشر

لا اهئ اهئ شكون قاليك كنبكي عليك و كانمسح في دموعي .. حتى انا بغيت نتزوج ههه حسيت بواحد الدقة على الراس
وا نوضي نوضي لبسي و باراكا من التبوهيل
نضت لبست قفطان بالخضر الملكي و مطروز بالذهبي و درت شالي كتافيت غي بالكحل ماشي حيت ماكنحملش الماكياج و لكن عندي ديك الفكرة ديال ماندير والو باش نهار عرسي نطلع هههه وا تسناوني نطلع انطلع الفضاء ههه
المهم جات عندنا خالتي عيشة (مامات صفاء) و قالت لينا نزلو راه ناس مجموعين و العدول حتى هو جا
تمينا نازلين و صفاء كترعد بشوية و تبكي بكثرة الخلعة الهزة اللي هزيت عيني كيبان لي السي فؤاد
صفاء وا الزمر فؤاد اش كيدير هنا
راه عرضت عليه حشومة اصاحبتي و لينا صحاب و مانعيطوش عليه
شفت فيها واحد الشوفة و انا كنترجاها بعينيا
قالت لي ههه و حتى ياسين راه عرضت عليه
اويلي على غدادي واش ماكاتشاوريش شوفيني ما دايرة والو فوجهي و مالابساش الطالون و ياسين طويل
ههه والله اختي تا طلعتي كتحمقي شوفوا الزين ها ها و بقات كتبحلس مشات هي جلسات حدا العدول و انا مشيت سلمت على ياسين
اللي كان فكامل اناقتو كان لابس قميجة ف القهوي مخشية فسروال في الباج و جيل يا لالة و التشويكة داكشي زاز .. اما فؤاد فكان من الشهود مشا و خلانا
جيتي زوينة اليوم ا سهام عمرنا شفناك بالبلدي ههه
لا بقا ليا غي نجي بتكشيطتي للخدمة .. راه كل حاجة و بلاصتها و فوقتها
ههه اييه ماكدبتيش .. غدا الاحد ياك
لا الثلاث .. وراك جاي زعمة الخطبة و عارف باللي هي بالسبت اذا غدا الاحد ياااه اسئلتك باايخة ههه
ههه لا هاداك سؤال استنكاري ماقريتوش عليه .. ولايني حتى انا خاصني عقل مخدم معايا كسولة
ياك دابا انا كاسولة .. اضف الى معلوماتك راه كانو كيعيطوا عليا الناااابغة في الليسي و طالعة ب16 ف الباك غي الزهر اللي ماكاينش ههه
هه والمهم غدا الى بغيتي انا عارض عليك لغدا
انا تصدمت من الطلب ديالو ( او ياكما سيد طاح على دماغو مالقا علامن يعرض) مالك عاودو ليك عليا ماعندنا ماكلة ف دارنا
اه عاد سقت الخبار و قلت نغديك في سبيل الله و ناخد فيك اجر ههه
اجر ديرو ف المساكين ... و المهم حتى نشوف
لا متقوليش ليا حتى نشوف راه بغيتك في واحد الموضوع
اينا موضوع .. ومال هاد الموضوع مايتقالش هنا
لا ماكايتقالش .. يلاه راهم سالاو نمشيو نباركو ليهم
مشينا و كملنا الامسية بالضحك و كان واحد المجمع غزال خصوصا الاصل مراكشي ماكاين غي شد فيا نشد فيك
جا الغد ليه مشيت عند ماما قلت ليها راه المدير ديالي داير غداء عمل ههه الله يسمح ليا و بلي خاصني نمشي نتلاقاه .. ماكانقدرش نكذب على ماما ولكن بعض المرات كانكون مضطرة
لبست كسيوة في الغوز و مشيت البلاصة فين درنا نتلاقاو لقيتوو جالس وداير رجل فوق رجل تميت غادة عنده و هي تجي واحد البنت اشمن شعر و اشمن لباس انا بعدا نحشم نلبسو حتى ف دارانا ..سلمت عليه من الوجه و جلست كتهدر معاه وهو غي كيفرنس و بقات كل شوية كتحط يدها على كتافو و كتشد ليه في يديه . ما عرفتش علاش شداتني البكية و دموعي دارو فررررر و تقبض عليا قلبي .. حسيت باحساس خايب احساس ديال الخيانة واخا انا مابيني و بينو والو .. ولكن هادا هو احساس ديال الحب .. اه انا كنبغيه ولكن عمري فكرت نعتارف ليه.. صافي عرفت باللي القاضية فيها ان.. يلاه كنت غادة نرجع للدار و لكن لا هو دار معايا نتلاقاو و خاصني ندير راسي ماشفت والو.. خليتها حتى مشات بقيت جالسة شوية عاد مشيت عنده

‫ ‏الجزء_الرابع_عشر

السلام عليكم
و عليكم السلام
ياكما تعطلت عليك
لا لا انا اللي جيت بكري ايوا لاباس
و انا ماباغاش نشوف ف وجه .. الحمد الله و انت
الحمدالله هاد الساعة
ايوا مزيان .. المهم عافاك دخل ف الموضوع اللي بغيتيني فيه راه خاصني نمشي
يلاه جيتي و بغيتي تمشي .. و الغدا؟
لا انا منقدرش.. ماما بزز باش خلاتني نخرج و درت معاها مانتعطلش مهم الى سمحتي دخل في الموضوع
واخا غي تشربي شي حاجة
لا لا عافاك غي هدر دغيا راه بغيت نمشي
واخا المهم.. الصراحة الموضوع اللي كنت باغي نهدر معاك فيه هو اني دابا عندي 29 عام و قربت ندخل في 30 وو..
ايوا شنو و من بعد علاش كتقول هاد الهدرة ياكما بغيتي دير عيد ميلاد .. راه كيديروه غي الدراري الصغار
ههه لا لا صراحة اسهام نتي عجبتيني بنت ضريفة و مأدبة و مانلقاش حسن منك اللي تكمل معايا حياتي و تكون مت ولادي
هدرتو نزلت عليا كي الصاعقة ماكنتش متوقعاه يقولي شي نهار هاد الهدرة .. او السي ياسين المدير العام للشركة يكون كيبغيني .. حتى فرحت و انا نتفكر البنت اللي كانت معاه قبيلة ..
بقيت ساكتة
هانتي شوفي فكري على خاطرك واخا انا قلبي كيقولي باللي ان شاء الله غادي توافقي
قلت له ان شاء الله يكون خير ناض بغا يوصلني قلته لا نمشي بوحدي
بقيت غادة و انا طريق كاملة كنفكر و صلت للدار طلعت البيت وانا نضربها بنعسة .. شوية كنحلم باني لابسة اللبسة البيضة و شادة ف ياسين و كان زويين و بوقوص يلاه غادي يلبسني الخاتم و هاي تدفعني ديك البنت اللي شفت .. تبسم ليها و لبسها هي الخاتم
نضت قافزة و مخلوعة او زعما يكون هادا ميساج من عند الله باش منقبلش نتزوج بيه .. و لكن الى كان كيبغيني بصح علاش ديك البنت كانت كتعامل معاه هاكا و هو كااان عاجبو الحال و مخليها دير اللي بغات .. مشيت غسلت وجهي و مع ذلك ديك الافكار مابغاتش تفارق المخيلة ديالي
قلت نخرج شوية يضربني البرد مشيت جيهت البحر بحكم انا ساكنة ف الرباط البحر قريب لمدينة .. بقيت جالسة و حاضية المواج لا تعواج هه صافي جمعت الوقفا و انا راجعة
أَأَأَوْوْ ميمكنش تكون هي كاع هادا زهر عندي ركبت ف الطموبيل ديالها و زادت و انا شديت طاكسي و تبعتها بقات غادية حتى وصلت واحد البوتيك و هي تدخل حتى انا تبعتها و درت راسي كنشوف شي حاجة و انا نسمعها كتهدر مع البنت اللي ف لاكيص
ويلي ا هند ماتيقيش شكون اللي تلاقيت اليوم
شكون
فكري شوية
ايوا قولي ليا ا مريم مالي علمت عليه
ههه اوكي اوكي تلاقيت مع ياسين يا لالة

‫ ‏الجزء_الخامس_عشر

شكون ياسين
واليلي اصاحبتي ياسين اليوسفي مول الشركة ديال لانفورماتيك اللي كان ناوي يتزوج بياا
ايواا كاااان غادي يتزوج بيك .. المهم مالو
تلاقيت بيه ف القهوة وقالي باللي ديما كنت ف بالو و عمرو نساني و عرض عليا نخرجو
ايوا ياكما ناوين ترجعو
ههه هادشي اللي بان ليا
انا بقيت عاطياهم بالظهر و كنسمع و هي تجي ديك خيتي
اش حب الخاطر الالة .. فاش بغيتيني نساعدك
بقيت كندور ف عيني .. كنقلب على شي شوميزة
اه واخا شوفي هاد الموديل .. ولا هاد الموديل .. امم يمكن هادا يعجبك
اناري على لصقة مامشات حتا رزاتي فواحد 300 درهم ف والو
المهم خرجت و انا ماحاملاش راسي أَوْ واش هادا كيتفلا عليا و لا شنو رجعت للدار و انا خارجة بقرار وااحد واللي هو الرفض واخا كنبغيه ولكن كرامتي ماكتجي فوق منها حتى حاجة
رجعت للدار بقيت مجمعة مع ماما شوية و هو يصوني التيلفون .. كنلقاه ياسين ماكانت عندي كانة نهدر معاه ما جاوبتوش حتى وصل لشي 20 اتصال و انا والو حلفت مانجاوبو
الغد ليه (الاثنين) في الصباح مشيت الخدمة و هو يبان لي ياسين بقيت كنتفاداه فينما كيجي يهدر معايا كنقول ليه اه بلاتي نسيت واحد الحاجة , بلاتي نهدر في التيليفون , صفاء بغاتني مهم كل مرة كنلقا لو سبة و هو حس بيا غي كيشوف وساكت
ف العشية كان ضاروري خاصني ندي له شي خدمة باش يطيستيها .. عييت مع صفاء تمشي الساعة مابغاتش شفت حتى عييت و مشيت راسي,.. دقيت الباب
السلام عليكم هاكا السي ياسين ها الكود طيستيه ليا
السي ياسين ؟ من امتى وليتي كتقولي لي ' سي '
من اول نهار خدمت فيه معاكم هنا
سهام ياك لاباس بنتي ليا ماشي هي هاديك اليوم ,, اش كاين
ماكاين والو هاد الساعة غي بالي مشغول مع هاد الكود و صافي
اه .. مانبغيكش تعصبي .. الى لقيتي شي صعوبة ف شي حاجة اجي عندي نعاونك و بلا ماتبقاي تمشي عند فؤاد
جاتني غريبة يقول هاكا و لكن ماديت ماجبت,.. واخا ان شاء الله
شحال عيطت ليك البارح و لكن ماكاتجاوبينيش

‫ ‏الجزء_السادس_عشر

شحال عيطت ليك البارح و لكن ماكاتجاوبينيش
بقيت كنلعب فواحد الخاتم ف يدي .. بصح؟ ماشفتوش
عاق بيا كنتهرب .. بلا مانهدر حطيت له الكلي يو إس بي اللي فيها الكود فوق البيرو و تميت خارجة و هو يقول لي بلاتي اسهام ماجاوبتينيش على داكشي اللي هدرنا فيه
ما قدرتش نشوف ف وجهه و انا كنرفضه كزوج ليا .. بقيت عاطياه بالظهر
سمح لي السي ياسين ولكن انا ماقابلاش سمح لي بزاف يلاه جيت نخرج و هو يشدني من يدي
كيفاش ماقابلاش شنو هو السبب اللي خلاك ترفضيني
اوووف ما فكرتش ف السبب اللي نقدر نقول ليه واش نقول ليه باللي انا شفتك مع ديك البنت و عرفت منها باللي تقدرو ترجعو .. واش نقول ليه الا كنتي بصح كتبغيني علاش كنتي مخليها تهدر معاك بديك الطريقة .. فديك اللحظة تبلوكيت و هو يغوت ف وجهي حتى قفزني من بلاصتي
مالكي ساكتة جاوبي شنو هو السبب اللي خلاك ترفضيني
شوف السي ياسين نتا الف بنت تتمناك و انا مانصلاحش ليك
انا باغيك نتي ماشي بنت اخرى .. انا شفت فيك مرتي و حبيبتي و مت ولادي و انا قابل عليك بجميع صفاتك الزوينة و الخايبة
للحظة كنت غادة نضعف ولكن استدركت الأمر.. سي ياسين انا اللي عندي قلته ليك
زاد زير لي على يديا حتى قصحني .. واش عرفتي اش كاديري فيا .. واش عارفة اش كتقولي
حيدت له يده بجهد و انا نقوليه اه عارفة اش كانقول خرجت دغيا من البيرو و سمعته هرس شي حاجة .. خفت يكون طاح عاوتاني بحال ديك المرة حيت على حساب ماقال ليا سي فؤاد بلي هو ماكايتحملش بحال هاد الضغوطات النفسية و السباب ف هادشي هو باباه سي اليوسفي ..بلاه كنت غادة نرجع و لكن ضغطت علىنفسي و مشيت البيرو ديالي .. لاحظت صفاء التوتر ديالي و عاودت ليها كلشي
ويلي اصاحبتي واش نتي مسطية ترفدي شي واحد بحال ياسين الله يعمرها دار
واه ااااه اصفاء راااه عارفة و لكن حسي بيا حتا نتيا ..انا لحد الان شاكة واش عنده علاقة مع ديك البنت و الى وافقت انبقا ديما فحالة شكوك و الزواج ا صفاء راه من الاسس ديالو هو الثقة .. المهم انا كنحس براسي ماشي نورمال كملي ليا خدمتي و انا غادة نمشي لدار
مشيت للدار و ضربتها بنعسا بحال الى عام ماناعساش (و حنا نيت المغاربة بعض المرات كنبغيو نديرو قيلولة حتى كنصدقو ف غيبوبة ههه)
فاش فقت قلبت التيليفون كنلقى ياسين معيط شي 6 د المرات و فالخر سيفط لي ميساج قالي باللي ضرووري خاصني نتلاقاه ف القهوة اللي تلاقينا فيها ديك المرة
المهم انا غي قريت المساج قلت هادا غادي يطردني من الشركة .. مشيت و انا مهيأة نفسيا و فكرة وحدة عندي ف بالي ربي ماكيسد باب حتى يحل بيبان
غي وصلت لقيته كيتسناني مشيت عنده قلت له
ياك لاباس شنو بغيتي
بلا مايهدر معايا جبد التيلفون ديالو وراني واحد الفيديو خلاني مصدومة 

‫ ‏الجزء_السابع_عشر

وراني واحد الفيديو خلاني مصدومة كان فيه خويا سعيد كاياخد واحد البرا من عند واحد الراجل
اش هاد الشي .. و شكون هاد السيد اللي مع خويا
هذاك خوك بوليسي ياك.. صورناه كاياخد رشوة من عند هاد السيد
واش نتا تسطيتي خويا مايديرش هاد الفعايل .. فلوسو كلهم حلال و كايخدم بشرفه
انا متيقك ولكن الى دفعت هاد الفيديو البوليس .. بلا مانكمل راك عارفة شنو غادي يطرا
شنو زعما كتهددني و لا كفاش
اعتابريه كيف مابغيتي
شداتني الدوخة كنت غادة نطيح و انا نشد ف الكرسي و بقيت كانبكي.. علاش كاديرمعايا هاكا
بقا ساكت يلاه بغا يشدني من يدي و انا نبعد .. ماتقيسنيش
سهام سمحي لي بزف ولكن نتي ماخليتي لي حتى خيار واحد اخر
بقيت كنشوف فيه و كنترجاه بعينيا ما يديرش فيا هاكا .. و انا عارفاه اش باغي فالمقابل .. مابقيتش عاقلة شحال داز ديال الوقت و انا كانشوف فيه و هو لم يحرك ساكنا .. ماشي غي عينيا اللي كان فيهم الحزن و لكن حتى عينين ياسين.. كنحس بيه بلي حتى هو ماراضيش على هاد الشي اللي دار
وقف ياسين و قالي غادي نحاول نجي لداركم ف اقرب وقت وجدي راسك و ماتبقايش مقلقة
تعصبت و شداتني هيستيرية ديال البكا و بقاو الناس كايشوفو فيا
واش نتا درتي هادشي كامل و كاتقول ليا مانتقلقش .. واش عرفتي اش كادير اياسين .. راك هاكا كتحكم عليا بالموت اياسين
و بقيت كنبكي كنبكي .. و هو يجي و عنقني و قالي سمحي لي بزاف ا سهام سمحي ليا ما بغيتكش تكوني لشي حد اخر من غيري .. ماعرفتش اش جرا لي ماقدرتش حتى ندفعو و لا نقول ليه يبعد عليا.. بقيت كنبكي حتى بردت على قلبي مزيان و استوعبت الموقف بعدت عليه و مشيت بلا هدرة بلا كلام
مامشيتش الخدمة يوماين كتسولني ماما كنقوليها عيانة شوية ما فيا اللي يمشي و غي كنفكراش ندير ف هاد المشكلة اللي طحت فيها.. نهار الثالث عيطت لي صفاء كانت اتجي عندي لدار باش تشوفني و انا كان خاصني غي فين نخرج و نبدل الجو درت معاها نتلاقاو و نخرجو ندورو شوية يلاه كنت خارجة و هو يدخل خويا شفت فيه و دموعي غرغرو .. ما نقدرش اخويا نخرج ليك على حياتك و نخرج ليك على خدمتك ما عرفتش كيف دار ياسين باش صور ليك داك الفيديوو و لكن انا اللي عارفة باللي نتا ما عندكش مع حاجة الحرام و تيقتي فيك كبيرة .. قاطع تفكيري خويا شاد ليا ف يدي و كيقولي
سهام سهام ..

‫ ‏الجزء_الثامن_عشر

سهام سهام ..
اه ههه جيتي
وي جيت مالك ساهية
والو اخويا غي سهيت كنفكر ف الخدمة وصافي
اممم الخدمة .. ايوا مزيان شتك خارجة
اه غادة نتلاقا مع صفاء قنطت ف الدار و قلت نخرج
واخا ردي البال لراسك و ماتعطليش .. باسني ف راسي و مشا
هو مشا و انا خرجت بقرار واحد هو اني خاصني نتزوج بياسين باش نحمي خويا
تلاقيت مع صفاء غادة و كنعاود ليها .. و هي غي مصدومة
اويييلي اصاحبتي دابا ياسين دار هادشي كامل مامتيقاش
لا غي تيقي دابا اللي طرا طرا .. ياسين كنبغيه اه و لكن باش يتزوج بيا بهاد الطريقة هاد الشي اللي غادي يحمقني اصفاء
دابا ماعندك حتى شي حل اخر من غير الصبر و انتي اصلا ماعارفة حتى شنو السبب اللي خلاه يدير معاك هاكا
لا هو دار هاكة حيت رفضته .. و قولي هو اللي ماعارفش السبب اللي خلاني نرفضه
ايوا علاش ماقلتلوش السبب
واش نتي تسطيتي انا ماعارفة من يدي من رجليا و نقول ليه هدرة اللي ما عندها لا ساس لا راس .. كلشي مبهم
ديري اختي يقينك ف الله و ربي عمرو يخيبك .. غي صبري و الليام غادي تبين كلشي
ان شاء الله .. ربي يدير لي شي تاويل د الخير
مازال حنا فهاد جوج كلمات عيطت لي ماما
الو سهام
وي ماما ياك لاباس
فينك نتي واش مزال معطلة
يلاه اماما جلسنا فواحد القهوة و مازال بغينا ندورو شوية ف المدينة و ندوزو البحر
لا ابنتي غي رجعي للدار راه جاو شي ناس بغاو يشوفوك
غي قالت ليا هاكا بحال الى خوات عليا سطل د الما بارد ماعرفت اش نقوليها .. شحال قدي مانهرب من الواقع
واخا ماما انا نحاول نجي دغيا
صفاء : ياك لاباس ا سهام
واقلة ياسين كاين ف الدار .. قالت لي ماما نجي كاين شي ناس بغو يشوفوني
بصح و مالو على هاد الزربة
هانتي كتشوفي .. شديت صفاء فيديها .. ماغاداش تمشي و تخليني ياك .. غادة تمشي معايا ياك
ويلي ماتقوليش هاكا رجلي برجلك عمري مانخليك بوحدك
وصلت للدار دخلت انا و صفاء و سمعت خويا كايقول
ايوا اسي ياسين فين تعرفتي على الاخت ديال و فين شفتيها
لا ماتقولوهاش ياسين كاين و معامن جالس كيهدر معا خويا
‫
‫ ‏الجزء_التاسع_عشر

لا ماتقولوهاش ياسين كاين و معامن جالس كيهدر ..معا خويا .. خويا اللي تاهمو بالرشوة
دخلت لقيت ياسين و واحد البنت عرفت من بعد انها اخته
اجي ا سهام راه هاد الناس من الصباح و كايتسناوك
سلمت و درت راسي مافخباري والو
سعيد : شوفي اختي راه هاد الناس جاو طالبين راغبين ف يدك لسي ياسين و راك كاتعرفيه
حدرت راسي و بقيت ساكتة .. و بقاو هما كيهدرو .. و فينما نشوف ف ياسين كنلقاه حاضيني و واخا هاكاك مازال دوك النظرات ديال الحزن ف عينيه
المهم استأذنت باش نمشي و بقيت جالسة ف بيتي حتى جات ماما و خويا باش يسولوني على رأيي
قلت ليهم بلي انا موافقة و قلبي كان كيتقطع
دازو ليام دوزنا الخطبة و درنا ضريب الصداق و جا النهار اللي غادي ندير فيه العرس و نمشي لداري
ماما مسكينة ماخلات ما وجدات و ما خلات ما شرات ليا كون تصيب كون شرات ليا المارشي كامل و الصراحة التوجاد ديال العرس فيه تمارة خاصك هادي و هادي و تمشي تشوفي النكافة و الكوافورة ههه مشاكيل
المهم هادشي كامل و انا ماما فينما كتشوف فيا كنتبسم ليها و عمري ما خليتها تحس بداكشي اللي ف قلبي و انا هادشي كله دايراه غي على قبل عائلتي
درت العرس ف 'البنية ' كيفما كنقولو درناها قدام باب الدار .. ماغاداش نقوليكم درتها ف القاعة و الحيحة و عرس اسطوري اولا ما عنديش فلوسه ههه و ثانيا ماما هي اللي كانت باغا دير ليا العرس و تفرح بيا واخا ياسين عيا فماما باش يتكلف بالعرس و المصاريف و لكن ماما رفضات
جا النهار الموعوود و اللي كنت كنتمناه عمره مايجي مية تساؤل و تساؤل كان كيروج ف بالي كبفاش غنتعامل مع ياسين و كيفاش غادة نتألقم مع وضع انا ماراضياش عليه .. بعض المرات كنتفكر باللي راجلي هو ياسين كنفرح حيت كيف ماكان الحال كنبغيه و فاش كنشوفو كنرتاح و بعض المرات كنشوف داك الشخص اللي ظلم راسو و ظلمني معاه كيفما كان الحال عمر شي حاجة ما كانت بالاكراه
‫
‏الجزء_العشرون

مشيت لكوافورة و مشات معايا رفيقة دربي صفاء هههه شوف المكتاب تزوجت قبل مني و انا درت العرس قبل منها المهم كل وحدة شداتها كوافورة و انا بدات كتصواب ليا و حلفت على دوك الحجبان حتى تقادهم انا كنقوليها لا و هي كتقوليا عفاك خليني نصوبهم ايجيوك زوينين ههه اودي مابغيتش نقادهو خليهم عليك ف التيقار والو ديك السسيدة راسها قاصح تقول هي اللي غادة تكون بارزة ههه و صفاء بغات تموت عليا بالضحك المهم قادات ليا الماكياج و دارته خفيف و لكن جا باين حيت ماكنديرش الماكياج صوبات ليا مشيطة بسيطة بالشال و لبست تكيشيطة ف الابيض و صباط ف الابيض عالي ومرصع بالحجر و ما ان وضعت اللمسات الاخيرة و حطات التاج على راسي .. حتى غرغرو ليا عينيا ,, حيت اي وحدة فينا كتحلم تكون فهاد اللحظة .. جيت فنيونة و غزالة كيفما كانقولو طاح عليا السر ههه
و حتى صفاء جات زوينة تألقت بواحد القفاطان ف الزرق و جا ياسين باش يدينا القاعة جا غزااال لبس واحد الكوستيم ف الكحل و تحت منه قميجة ف الابيض و الكرافاط أما الرائحة اللي داير يا سلام بدون تعليق ..غي شفته نسيت كلشي نسيت همي نسيت داك شي الله دار فيا .. جا و بقا واقف قبالتي و كايشوف فياا
جيتي غزالة امراتي العزيزة
نسيتي و لا نفكرك ديكشي غي ف الوراق و انا درت هادشي غي على قبل ميمتي و خوتي
صدمته بهاد الهدرة ما كانش متوقع انه يسمعها مني واخا كنتقلق و لا كنتعصب ما كانبغيش نخرج كلمة العيب .. قلته له هاد الهدرة و انا قلبي كيتقطع ما رااضياش على نفسي .. النهار اللي بغيت نحس براسي عروسة و نكون فيه فرحااانة قلبي كان غاضب على راجلي .. بلاصت مانبدا حياتي بالحب و الاحترام .. بادياها بالخصام و لكن انا شنو ذنبي..
ياسين ماعجبوش الحال فاش سمع هدرتي بقدر ماكان فرحان بقدر ما نكدته ليه
مشينا القاعة داز كلشي بيخير و كان العرس بسيط و زوين و كان كلشي فرحان الا انا و ياسين اللي ان ف قلبنا حزن كبير و لكن حتى واحد فينا مامبين لشي حد
‫
الجزء الواحد و العشرون

جا والوقت اللي غادي نخلي فيه دارنا و نمشي نبات مع شخص غريب عليا ماما و ختي مساكن كيبكيو بحرقو البنت الل كانت خالقة ليهم جو ف الدار بالضحك و دابز مع هادا و هادا غادة تمشي و تخوي عليهم الدار.. بقيت كنشوف ف ماما مسكينة كتوصي ف ياسين و تعاود و تقول ليه تهلى فيها.. الله يا ميمتي ما عارفاش بنتك بفين غادة و انا نيت ماعارفاش شنو غادي يلقاني من بعد ... كيشوفوني كنبكي كيقولو باللي غي الفراق و لكن اسباب اخرى من ورى الدموع ديالي
ركبت ف الطموبيل .. طريق كاملة و حنا ساكتين حتا واحد ما نطق بكلمة .. فين غادي بيا واش انمشيو لدارو و لا شي دار جديدة .. اووف واش كاينة شي مرا ماعارفاش فين غادة تسكن .. الله يخرج هاد الليلة على خير
وصلت لداري حل لي الباب و قالي دخلي برجلك ليمنا و قولي بسم الله .. دخلت و قلتها ف نفسي .. واو صراحة الدار غزالة كان كلشي فيها مقاد و متيول بقيت غادة و ماعرفتش فين نمشي بقيت واقفة .. شاف فيا ياسين و قالي
مالك وقفتي واش ماعجباتكش الدار
لا زوينة
ايوا مزيان .. انا اللي ختاريت الفراش و قاديت كلشي على قبلك
مزيان .. المهم الى ساليتي قولي فين يمكن لي نمشي نعس
تنعسي يلاه جينا و بغيتي تنعسي
اه .. كنظن ماكاين ما يدار و ما كاين ما يتقال بيناتنا .. حسن لي نمشي نرتاح راه عييت .. يلاه كنت غادة وشدني من يدي
كيفاش ما كاين ما يتقال دابا نتي راه مرتي و لا نسيتي
لا ما نسيتش و لكن نتا اللي نسيتي باللي مرتك غي ف الوراق و دابا طلق مني راك ضريتيني
نتي ضراتك يدك و لكن ما حسيتيش بقلبي اللي كيتحرق و نتي كاديري معايا هاكا
شوف ا ياسين اللي نطولوه نقصروه نتا اللي درتي هادشي كامل و تحمل مسؤولية أفعالك .. و بلا ماتظن باللي غادة نسكت على هاد الشي اللي درتي فيا
خليته واقف و مشيت دخلت لواحد البيت بدلت فيه حوايجي و نعست على واحد السداري أما حتى بيت النعاس خليتو ليه
ديك الليلة ماجانيش النعاس .. نضت باش نمشي نشرب و انا نلقى الضو ف بيت النعاس مشعول قربت لقيت ياسين ناعس على واحد الفوطوي و معذب .. بقيت كنشوف فيه و سهيت ... اااه يا ياسين حتى واحد فينا مامرتاح غي فهمني علاش هادشي كله .. غلط واحد درتيه و غادي نبقاو ندفعو الثمن بجوج طفيت عليه الضو و مشيت يلاه غادة البيت باش نعس كيبان ليا التيليفون ديال ياسين مشعول مشيت قربت لقيته كيصوني ( مريم ) اه هادي هي ديك البنت اللي جات عنده القهوة بقيت كنساينها حتى قطعت و جا واحد الميساج من عندها (راكم عارفين سامسونغ كيتقرى الميساج من الفوق ههه التبركيك و ما يدير ) حبيبي كنصوني عليك و ماكاتجاوبش ياك لاباس سمعت شي هدرة ما عجباتنيش و بغيت نتأكد .. واش بصح تزوجتي و اليوم كان العرس .. جاوبني عافاك راه بغيت نتسطى
هااا اللي قلنا..

‪الجزء التاني و العشرون

هااا اللي قلنا شكوكي كانت ف محلها .. رجعت و انا حزينة ملي خدمت و انا ف الحزن حتى قلت ضحكت ليا الدنيا و لكن مازال القدر كيعاقبني .. واقلا دايرة شي ذنب خايب ف حياتي و انا ماعايقاش بيه و دابا كنتعاقب عليه
فقت ف الصباح دوشت و صليت .. و مشيت نوجد الفطور لينا بجوج كيف ما كان الحال راه دابا مرته .. انا نقدر نديباني و لكن هو ما يعرف ما يدير.. فاق لقاني حاطة الفطور و كنتسناه
كيهدر غي بزز .. صباح الخير
صباح النور
شكرا على الفطور
راه وجدته غي ليا انا .. بلا ما تفرح
هه ياك ايوا سمحي ليا غي حيت بان لي هادشي بزايد داكشي علاش .. اه و مالك قاجة راسك بديك الفولار غي حيديها و لا عاوتاني مازال مامعتابرانيش راجلك
شفت فيه و قلت له .. خلي هاد الهدرة من بعد دابا غي فطر و سكت .. سالينا الفطور بقيت كنجمع الماعن و انا نسمع التيلفون ديال ياسين كيصوني درت راسي ما جابة لدنا خبار و سمعته كيقول
الو مريم صافا بيخير
وي ديك الهدرة اللي سمعتي راه بصح .. فين كاين المشكل
ااا مريم كنا غادي نتزوجو و لكن مامكتابش .. و انا ماتفليت عليك ما والو .. اه الى بغيتي نبقاو صحاب مرحبا و لكن الى بقيتي كتعيطي لي و كتبرزطيني بالهدرة الخاوية ما كاين لاش .. يلاه بسلامة مرتي كتسناني .. زعو يقطع
ههه واش نقول ليكم كي كنت كندير ف الكوزينة و لا بلاش هههه بقالي غي نقز بالفرحة .. كنت باغا نخرج عند و نهدروو و نسا شوية الهم .. حيت حتا انا ظلمته شوية .. و انانسمع التيليفون عاود صونا ... هو يجي عندي قالي
سهام سمحي ليا بزاف راه عيط لي الواليد ما عرفت اش باغي عندي عاوتاني .. ياك ماغاداش تخافي الى بقيتي بوحدك
لا صافي غير سير
واخا انا نحاول ما نتعطلش و ما تبقايش مقلقة مني ... ان شاء الله كلشي غادي يولي مزيان مع الايام صافي .. تهلاي فراسك
اوكي بسلامة

‪الجزء الثالث و العشرون

دابا انا غانبقى جالسة بين 4 الحيوط ما كاين مايدار ههه نخليكم مع ياسين هو اللي خارج يدور
مشيت عند الواليد الفيلا
السلام عليكم الواليد لاباس عليك
الحمد الله.. شتك نسيتينا غي تزوجتي و ضربتي كلشي بركلة
غي خلينا نجلسوا بعدا و شكي حتى تعيا و زايدون راه هادا نهاري اللول مامنحقيش نرتاح لي شوية .. و انا نيت ناوي ندي سهام لشي مدينة تفوج شوية
واخا يلاه جلس .. المهم عيطت ليك بغيت نهدر معاك فواحد الموضوع
اهاه الله يسمعنا خبار الخير
راه واحد المسثمر أجنبي بغا يستثمر فواحد المشروع هنا ف المغرب و راه بداه شي شهر هذا و كيف ما كتعرف المغرب من طبيعته كيتعكس ليك ف شي حوايج .. و دابا هو
قبل مايكمل قاطعته .. شوف شي حاجة ديال الخواض عاوتاني ما عندي ماندير بيها واخا
ياك دابا انا كنخدم ف الخواض .. بدينا هاد الموضوع عاوتاني
شوف الواليد نتا عارف رأييي فيه من شحال هادي راه شي نهار غادي يشدوك البوليس بتهمة غسل الأموال و لا شي حاجة اخرى كاعمة تكون داير ليها الحساب
كيفاش يشدوني البوليس مالي انا اش كندير خدمتي و خدامها نتا اللي داك راس عندك فيه العجينة .. دابا ديك الشركة واش على بالك واقفة غي هاكاك راه ضروري من واحد السيولات سرية اللي خلاتها تبقا مستمرة حتى لدابا .. ياكما يصحاب ليك باللي نتا اللي موقفها
شنو هو ؟ نفهم من هدرتك باني خدام فحاجة الحرام.؟؟ 

‪الجزء الرابع و العشرون

نفهم من هدرتك باني خدام فحاجة الحرام.؟؟
اويلي على الحرام واش بغيتي تحمقني راه خاصك تعرف باللي اي واحد عنده شركة ف المغرب ضروري ما يستخدم طرق غير قانونية باش تستامر الخدمة ديالو
شوف خليني من الشركات ديال لخرين و هدر غي على راسك ... واش حنا خدامين ف حاجة ديال الحرام
ماشي بديك المعنى و لكن راه كنلتاجأ لشي حوايج غير قانونية باش تبقى الشركة واقفة على رجليها .. و نخليك نتا خدام ف الدومين اللي كيعجبك و لا غي هي جات و طلعو الأسهم ديالنا ف البورصة
يا خسارة .. فعلا يا خسارة كنت عارف شي حوايج عليك و كنت كنتغاضى عليهم و لكن دابا وصلت لي للطوب .. سمعني الواليد تخلى على هاد الشي اللي كادير الى كنتي نتا هانت عليك نفسك توكل ولادك الحرام فأنا لا و ان شاء الله حاجة الحرام عمرها تدخل لجيبي
شنو زعما غادي تخلى على الخدمة ديالك
الى بقيتي على هاد المنوال انا مانقدرش نكمل معاك و انت مسؤول على هاد الأفعال اللي كادير
ايوا سيدي الى ماراضيش على خدمت باك خرج من ديك الشركة و نساني عليك .. مللي وليتي كتعايرني بيها طاي طاي ما انت ولدي ما انا باك
فاش قال هاكا صدمني و بزاف ماكنتش متوقع باللي غادي يفضل خدمته على ولده اوْ نقولها بصيغة اخرى فضل الحرام عليا انا
صافي الواليد اللي بغيتيها هي اللي غادة تكون .. انا مشيت دابا و من غدا قلب على اللي يشد ليك الإدارة
خرجت و انا طالع ليا الدم و كنترعد بالأعصاب .. ماكنتش هاكة و لكن الواليد هو المسؤول على هاد الحالة اللي وليت فيها من كثرت القمع و الاستغلال ديالو ليا لدرجة انه واحد الفترة تصابيت بالاكتئاب الحاد .. المهم ركبت و تميت جاي كنفكر .. اش ندير فهاد المشكل .. حتى تزوجت عاد غادي نولي عاطل .. لا لا خاصني نجمع راسي و نبدا نقلب على خدمة .. دزت للشركة خديت وراقي تلاقيت مع فؤاد عاودت ليه و قالي باللي غادي يشوف ليا فواحد الشركة ديال واحد صاحبو .. غادي تساؤلو علاش مامشيتش راسي و علاش مامشيتش عند الناس اللي كنعرف .. غادي نقوليكم انا اللي كنعرف الواليد دابا غادي يكون عيط على كاع الناس باش مايخدمونيش و هادشي كامل غي باش نلجأ ليه على أساس انه هو ديما على حق و عارف الصغيرة و الكبيرة فهاد الدنيا
و انا جاي تلاقيت مع صفاء

‪ الجزء الخامس و العشرون

و انا جاي تلاقيت مع صفاء
.. ماكذبتش سهام فاش كانت كتقول بلي ديك السيدة مقطعة الوراق
يااااسين تسنا تسنا .. جايا و كتفرنس
ههه سلام خويا صافا
الحمد الله و انتي
لاباس الحمدالله واحد صحيبتي لاباس عليها
الحمدالله بيخير
غادي للدار ياك .. وكتشوف فيا ببراءة
اه علاش
واديني معاك ها العار نشوف سهام عفااااك
ههه اناري اش كاديرو لتمسكين يلاه زيدي
بقينا غادين و هي حلفت مابغات تسكت وصلنا و دخلت
واووو الدار غزالة مشاء الله .. سهااام ا سهااام
ولايني جعواقة ههه حشمت نقول ليها غي بشوية
شوية و هي تخرج سهام من الكوزينة و كاتقاد ف شالها
هاي هاي شكون جا عندي ... مرحبا ب الضياف هههع
بقات كتعنق ف صاحبتها تقول ماشافوش بعضياتهم شي شهر و هوما غي البارح كانو بجوج
بقيت كنشوف ف سهام و هي كضحك و فرحانة .. عندها ابتسامة جميلة كتخليك تنسا كلشي .. قلبها بيض واخا باقة مقلقة مني ولكن كون مادرتش هاكا كون دابا راه مامزوجينش
(..................)
جلست مع صفاء و بقيت كنسولها.. كفاش حتى تلاقيتي بياسين
اه لقيتو جا للشركة و لصقت فيه
هه عفريتة .. يلاه نوضي نوضي نتغداو .. جاب الله جيتي منباقش مني ليه شوف فيا نشوف فيك
صفاء بواحد الصوت منخافض .. علاش ماتصالحتوش .. تحت صقف واحد و ماكتهدروش
ماشي ماكانهدروش و لكن هضرة قليلة و المهم نوضي خلينا من الهدرة الخاوية 

‪ الجزء السادس و العشرون

عاوناتني صفاء باش حطينا الغدا
و انا صفاء كركركركر حلفنا مانسكتو فين ما كانهز عيني ف ياسين كنلقاه ساهي وغي كيخمم و ماكلته قليلة
نغزت صفاء باش تسولو مالو .. شاعة عباس الفرطة ف الذمة ,, يلاه نغزتها ااااو واصاحبتي اش بغيتي
بقيت كنشوف فيها زعما الله يعطيك الغرق .. مالك علاش كاتغوتي
بلاصت ماتفهم راسها و تجمع و طوي قالت نغزتيني بالجهد اصاحبتي .. غرقت ف بلاصتي و انا نسمع ياسين كيضحك
اودي اصفاء راه غي صاحبتك باقا حشمانا و مامولفاش.. انا ماعجبنيش الحال و قلت ليهم و كولو راه ماشي وقت الهدرة هادي
سالينا و جمعت الطابلة و صفاء مشات الخدمة يلاه كنت غادة نوض و هو يعيط لي ياسين سهام جلسي بغيت نهدر معاك
جلست و بقيت كنلعب فيدي زعما مامسوقاش
واش باقة مقلقة مني .. امم .. جاوبي مالك ساكتة
و انا غي حادرة راسي ماكنهدرش
سهام حرام عليك ماتخلينيش هاكة عرفتي مية مطرقة و مطرقة كضرب فوق راسي نتي اكثر حاجة هاماني دابا و قلبي كيتقطع عليك من الداخل و انتي ماحاساش بيا
انتا اللي ماحاسش بيا .. نتا اللي درتي هادشي كامل .. فاش كنتي كتفكر ملي ديك الأفكار المسخة كانت ف عقلك ااه .. جاوبني
ما فكرتيش فيا انا .. كنتي اناني غي رفضتك و نتا تلجأ لوسائل اخرى باش تضغط عليا ..انا عمري مانسا هاد الشي اللي درتي فيا ا ياسين
لا ا سهام ماتقوليش هاكا .. انا درت هاد شي حيت ,,
حيت اش .. مالك سكتي .. كمل حيت اش
لا والو صافي نساي
نتا ديما هاكا .. ديما كتهرب من الجواب واخا اسيدي انا نسا و من الأحسن ما تبقاش تهدرمعايا و عتابرني ماكايناش فهاد الدار
نضت و انا كنبكي يلاه جيت ندخل البيت و هو يشدني بلاتي تسناي
اشنو عاوتاني طلق من يدي
كنت باغة نمشي و هو يحبسني ودار يده على الحيط

‪الجزء السابع و العشرون

كنت باغة نمشي و هو يحبسني ودار يده على الحيط جيت نمشي للجيهة الاخرى و دار يده الاخرى .. كان قريب ليا بزااف و بقا قلبي كيضرب بالزربة حدرت راسي و شبكت يدي بجوج اللي كانو كيرجفو خايفة من ردة فعله و خايفة نقوله شي حاجة ماتعجبوش
بقا ساكت و هو يقول لي ..سهام واش عرفتي ياا سهام اش كديري فيا .. فاش كتبقاي كتصرفي بحال هاكا واش عرفتيني باش كنحس .. بقيت ساكتة و معا انا بكايا ماحسيتش بدموعي امتى نزلو ليا ...اول مرة جيتي فيها الشركة .. جيتي كادافعي على واحد السيد اللي ماكاتعرفيهش .. ما هماتكش نفسك واش غادة تخدمي و لا لا بقدر ما همك داك السيد .. بداك التصرف ثرت ليا انتباهي .. وثاني نهار فاش جيت و لقيتك كتسناي دخلي المقابلة عجبني الحال و دخلت وصيت عليك فؤاد باش تخدمي معانا أو بالأحرى باش نبقى نشوفك كل نهار ... (هزيت راسي كنلقى ياسين كيعاود ليا و كايبتاسم كيعاود على ذكريات زوينة كانت ف حياتو) .. و كنت كنكثر عليك الخدمة غي باش كل مرة تجي عندي البيرو ..و باقي ماكملتش فاش فقت و لقيت راسي ف السبيطار ماعرفتش شكون جابني و مشيت سولت ف الريسيبسيون و هاكاك عرفت باللي نتي اللي جبتيني فرحت بزاف و زدتي كبرتي في عيني و لكن ماعرفتش علاش مابغيتينيش نعرف باللي نتي اللي جبتيني و فالوقيتة اللي بغيت نشكرك نتي كنتي كتهربي مني ... و للاسف نهار اللي طلبتك للزواج رفضتيني و ماعطيتينيش فرصة غي باش نعرف علاش و لقيت باللي الوسيلة الوحيدة اللي تخليك تقبلي بيا هو خوك ... ماكذبتيش فاش قلتي باللي هو ماكايخدش الرشوة .. حيت انا سيفطت واحد السيد عنده و قاليه باللي لقا واحد البرا فيها شي وراق ديال شي حد و باللي جابهم ليه باش الى سول عليهم شي حد يلقاوها عند البوليس و فالوقيتة اللي خوك خدا البرا صورته و جبت ليك الفيديو باش تشوفيه و هاكا نجحت الخطة ديالي .. انا ما ندمتش على هاد الشي اللي درت واخا كون رجع بيا الزمان اللور كنت غادي نعاود نفس الشيء .. مجرد التفكير بانك تقدر تكوني لشي حد من غيري كان كان كيخنقني ... بقيت مندهشة من الهدرة اللي قالي ياسين و جرني لعنده و عنقني و قالي سمحي لي.. بلا مانشعر قلته سامحتك.. حسيت بالحب ديالو ..حسيت بانه كان صادق ف كل كلمة قالها ليا .. ماكنتش باغة نقوليه السبب ورا الرفض ديالي خليتو بين نفسي وبين صفاء..قالي صافي تصالحنا و كيضحااك و انا حابسة الضحكة و كاتبغي تخرج ليا من الجنب هههه اه تصالحنا و لكن عمرك دير معايا بحال هاكا .. لا صافي اصلا دابا نتي معايا و هاد اللشي اللي كنت باغي ..يلاه دابا غنخرجو و ماتقوليش لا .. لاماغانقولهاش .. خرجنا و دوزا عشية غزااالة و كنت فرحانة حيت رجعات المياه لمجاريها .. و لكن باقي الحزن ف عينين ياسين و انا مافخباري والو 

الجزء الثامن و العشرون

رجعنا للدار بدلت حوايجي و دخلت نوجد العصير وجيت جلست حدا لقيته ساهي و كيخمم
ياسين اياسين
ااه .. كنت كتهدري معايا ..
اه مالك .. كاينة شي حاجة و مخبي عليا
لا والو ماكاينا حتا حاجة
متأكد ؟
اه متأكد
(حتى الكذوب ماكتعرفش تكذب) خليته على خاطره و عطيته العصير بقيت كنقلب ف التلفازة عالله و عاسى نلقى شي حاجة تحمر الوجه و والو .. شوية هو يقولي ياسين
اه فكرتيني خاصك تخرجي من الخدمة
تصدمت و بزاف .. خصوصا انه ياسين ماعندوش ديك العقلية ديال تجلسي و ماتخرجيش بلا خباري .. ياك لاباس علاش ..واش غادي يضايقك الخروج ديالي
لا ماشي هاكاك .. انا ما بغيتش نمنعك من شي حاجة نتي باغاها و لكن . .
ولكن شنو ياك لاباس
الصراحة اسهام انا خرجت من الخدمة ديال الواليد بلاش ماتسوليني علاش اللي نقدر نقول ليك هو اني ماكنتش مرتاح تم و صافي
و الى بغيتي نشوف ليك شي بلاصة اخرى عندها علاقة بالدومين ديالك خدمي فيها
بقيت ساكتة .. واخا ان شاء الله و انت دابا شنو درتي فاش غادي تخدم ..
شوفي انا شاف ليا فؤاد واحد البوسط زوين فواحد الشركة وبحكم اني كنت رئيس الادارة عطاوني بوسط مزيان .. غادي نشد فيه 12000 درهم واخا قليلة .. قاطعته
لا الله يجعل البركة المهم نعيشو مستورين .. راح حنا حسن من الف واحد غيرنا ..الواحد يحمد الله على نعمه و كل واحد ما خلقه الله الا و هو برزقه
جا باس ليا راسي الله يخليك ليا امراتي العزيزة .. مراتي اللي غادي تصبر معايا على الحلوة و المرة .. ايوا قولي ليا حنا تزوجنا ومازال مامشينا حتى شي بلاصة .. امم ختاري فين بغيتي تمشي .. نمشيو فرنسا و لا تركيا
ههه اش خاصك يا العريان خاتم امولاي .. دابا نتا مزلوط و بانت ليك غي فرنسا .. جمعنا راسنا بكري .. امم ايوا اسيدي انا منلقاش حسن من بلادي ماكرهتش نمشي لأصيلة و لا السعيدية .. المهم أي مدينة تكون زوينة
اهاه علاش لا .. خليني غي نرسي ف هاد الخدمة و نقاد مسائلي و انا معاك .. المهم بقينا سهرانين حتى لشمن وقت بالضحك و الهدرة
الغد ليه مشا ياسين للخدمة الجديدة و انا مشيت نجيب الوثائق ديالي من الشركة
فاش كنت راجعة كيعيطو عليا شي ناس
السلام عليكم لالة مدام اليوسفي هادي

‪
الجزء التاسع و العشرون

و عليكم السلام وي هي هادي
سمحي ليا الالة نخبروك باللي الزوج ديالك دار حادثة و حالته حرجة هو حاليا ف كلينيك الشيخ زايد
دارت بيا دنيا تصدمت و تخلعت و بقيت كنبكي ... لا لا عاد قلت بسم الله .. عاد قلت ضحكت ليا الدنيا .. حبيبي اللي كنبغيه ما يمكنش طرا له شي حاجة .. انا غادة وعقلي ماشي معايا .. شحال من مرة كنت غادة وكانت اضربني طموبيل .. شديت طاكسي مشيت للكلينيك كنسول عليه قالو ليا باللي يلاه دخلوه العمليات .. هزيت عيني لقيت ديك البولة الحمرا تشعلات زعما راهم بداو العملية .. بقيت كندور و نبكي جلست فالارض و كانتنخصص ما عقلتش على راسي حتى غيبت و لقيت حدايا ماما و خوتي و صافاء
ياك لاباس اش وقع
ماما : لا والو ابنتي غي رتاحي ..
غي هي قالت هاكا و هو يدرني راسي غمضت عيني بسرعة كتجيني صورة ياسين ف بالي .. كتفكر السيد اللي عيط ليا .. كنتفكر غرفة العمليات ... حليت عيني و انا نغوت ياسييييين
بسم الله عليك ابنتي .. عنقتني ماما و بقيت كنبكي و هي كتبكي معايا .. صفاء ما استحملاتش الوضع و هي تخرج .. طلبت ماما قلت ليها غي خليني نخرج برا و مانبقاش جالسة هنا
خرجت لقيت فؤاد
كفااش طرا هادشي جاوبني اخويا .. بقا ساكت و انا بديت نبكي .. عافاك غي قوليا شنو طرا .. مازال فهاد جوج كلمات جا حمزة و خويا سعيد
سعيد : سمعي اختي و تهدني راه بابات ياسين شديناه بتهمة غسل الأموال و التزوير و كان كيهرب الفلوس لبرا
و فاش تاصل السي العميد ب ياسين باش يخبره هو ما استحملش الخبر و جا كيسوق بالزربة و الحادثة لقيناها وقعات ف الطريق اللي كاتجيب الكوميسارية

‪
 ‎الجزء الثلاثون

شديت راسي و طحت الارض .. بغيت نبكي فين هما الدموع بغين نغوت فين هو الجهد .. جمعت الوقفة مشيت توضيت و صليت ما بقيتش عاقلة شحال من ركعة صليت و لا شحال بقيت هازة كفوفي للسما و كندعي الله يشافيه .. شوية جات عندي صفاء قالت لي باللي خرجوه من العمليات و لكن راه ف الأنعاش و ماعرفوش امتى غادي يفيق
مشيت لعنده و دخلت بقيت شادة له ف يدبه و كنشوف فيه .. الدمعة ما بغاتش تنزل عينيا نشفو من الدموع .. وليت كتنفس بصعوبة .. حاجة طبيعة و انا الشخص اللي كتنفس بوجوده ماعرفته غادي يعيش و لا يموت .. جات ماما بغات تديني قلت ليها لا ماغنمشيش
كلشي مشا الا انا بقيت كتسناه يفيق ف كل لحظة كنهز فيه عينيا كنقول غادي يحل عينيه و يشوف فيا و لكن بدون جدوى دازت ثلاثة أيام و انا نعاسة و شادة فيد ياسين كنحس يشي يد كتمسح لي على راسي نضت و قلت ماما .. ولكن لا ماشي ماما ..هاد المرة ياسين فاق من الغيبوبة .. ماقدرتش نهدر ثقال عليا لساني تحنيت و عنقته بقيت كنبكي بحرقة
علاش درتي فيا هاكا اياسين علاش .. لوهلة كنت كنقول غادي نخسرك ... علاش ديما كتبغي تبكيني
قالي بواحد الصوت جد منخفض شششش و حط ليا راسي على صدره و بقيت كنبكي و لكن الابتسامة ما فارقتش ليا وجهي .. كنت كنبكي بكثرت الفرحة .. دازت 7 يام و كل نهار ياسين كيتحسن .. خرج ياسين من الكلينيك .. و اللي خصاته كنحضرها ليه ... عمري ما غبت عليه ولا دقيقة دازت شي 4 ايام هاكاك و كانت الجلسة ديال باباه كانت حاضرا اخت ياسين أمنية و كنت انا و ياسين.. حكمه على السي اليوسفي ب 5 سنين و هادشي غي حيت كاين المحامي .. اما الشركة تصابت بالافلاس حيت السمعة ديالها طاحت للارض .. صفاء و حمزة دارو العرس و مشينا كاملين للسعيدية ههه دوزنا يام غزالة
فاش رجعنا.. فؤاد و ياسين قررو يديرو مقاولة صغيرة ديال لانفورماتيك بداو من الصفر و لكن بالحلال .. و الحاجة ديال الحلال ربي كيبارك فيها .. انا و صفاء خدمنا معاهم و لكن بدون مقابلة ههه و كات هاذي ثاني مرة كنخدم بدون ميطرحو عليا ديك الأسئلة اللي لا علاقة ... حملت و ما الوقت عرفت باللي عندي وليد .. وثقلت بزاف ولا مسكين ياسين داير ليا الخاطر و انا فارعة ليه راسو بيت هادي و بيت هادي ههه
بعد مرور 5 سنوات
ياسين شد لينا بلاصة هنا القدام .. و ياسين فين غادي وا هنا هنا
الله على راحة .. ياسين شتك جلستي فين خليتي معاذ
راهو لهيه مع المأطرين .. و لا لا نوض شوف فين هو
هاهو نايض بقيت انا كنتسنا المسابقة تبدا .. مسابقة تجويد القران
و هاااهو معاذ طلع المنصة .. الله على صوت عنده ف التجويد واخا هو القليول فيهم و هو الصغير ههه و لكن غزال بحال باه .. كنشوف ياسين مشا عنده كيجري و باسه و هزه فوق كتافه .. الله يحفظ لي أسرتي الصغيرة
صبرت بزاف و ربي جاب لي خدمة .. بعدما كنت كنترفض فاي بلاصة مشيت ليها و لكن كيفما قلت القدر كانت عنده ليا خطط أخرى
كان باغي يلاقيني براجلي الحبيب و توجنا هاد العلاقة ف الحلال فعلا فعلا صبرت و ربي دار لي اللي فيها الخير
النهــــــــــــــــــــاية

اقرأ المزيد