قصة مخلفات سن المراهقة

الجزء الأول

قصة حقيقية ولكن بأسماء مستعارة بالضبط بمدينة أكادير ياسمين حاصلة على الباكالوريا في العلوم الاقتصادية (غير بنقيل )بنت متوسطة القامة بيضة وعينها كبار ماشاء الله لشافهم كيعجبوه وجهها فحال الأطفال براءة ومنور كتبان فحال الملاك بصفة بشر وخلاص كملاتها بلحجاب زادها النور حوايجها كتلبسهم فحال توركيات خجووولة معندهاش مع لبنات بزااف المستوى ديالها فلقريا ضغيف بززاف ولكن بحكم الأخلاق ديالها الاساتدة كينجحوها المهم منطولش عليكم نخليكم مع ياسمين هي لتحكي ليكم

تحكي وتقول
كيف كتعرفو ملي كتسليو من الاعدادية وكتنتقلو ليسي إحساس زويين بأنك كبرتي وأول مرة تقرا مع بنات ودراري كبار منك والأجواء صاخبة مع 12 و 6 قدام ليسي كنت مشوقة نجرب هاد الشعور واخا كيف كتعرفو انا بنت حشومية ومعنديش مع هاد الأجواء ولكن ملي كتنتقلو ليسي كتحسو بلي كبرتو المهم صيف كاملو وانا كنتسناه اسالي دغيا اول مرة منحملش العطلة كنتسنا بفارغ الصبر اجي نهار لندخل فيه ليسي وبالفعل بقات لعطلة أسبوع وتسالي ونبداو دخول المدرسي مكنعسش كل ليلة كنفكر كيفاش غادي ندخل واشنو غادي نلبس ولبنات واش غادي اتقبلو طبعي شعور دلفرحة ولخلعا وصل اليوم المنتظر لغادي نمشي فيه ليسي فقت بكري دوشت وجدات لي ماما لفطور فطرت لبست حوايجي وصلات 8:00 بست ماما على راسها ودعات معيا كتساؤلو علاش مبستش بابا ( بابا مات الله ارحمو بسرطان فاش كنت كنقرا فسادس ابتدائي ) صافي مشيت بوحدي فطريق كنسمع شي واحد كيعيط لي ياسمين

الجزء 2

مشيت بوحدي فطريق كنسمع شي واحد كيعيط لي ياسمين درت لقيت لبنات دجيران بحالي فلعمر وحتى هما اول يوم ليهم فليسي طريق كامل وهوما كيهضرو على دراري دليسي و حدة فيهم تعرفات على بزاف دراري دنفس ليسي لغنقراو فيه من خلال لإنترنت بيني وبينكم سمعة ديال داك ليسي خايبة لكن ماما كتقول بلي لداخل سوق راسو داخلو وحتى حد مغدي اغيرو بالحكم أنني تربيت ف عائلة متوسطة المهم وصلنا لحدا ليسي لبنات غير وصلو وخلاوني بوحدي كولهم مشاو كيسلمو على صحباتهم المهم بقيت واقفا حدا واحد شجرة كنشوف و كنتسنا الجرس تفتح الباب الجرس صونا وبقيت كنتسنا حتى دخلو كاملين حيت حسيت براسي فشكل محملتش دوك الأجواء أنني بوحدي المهم دخلت القسم دخلو تلاميذ كنحس بلي كولشي كايشوف فيا حيت جالسة بوحدي هو غير إحساس فصراحة تواحد مداها فيا المهم كنتسنى 12 توصل بمشقة نفس وخا انا مكلخة ولكن منضبطة معمرني غيبت ولا جلست حدا ليسي ملي كتكون عندنا ساعة خاوية كنمشي كنجري لدار ونرجع باش نقرا ساعة تانية ولكن ناس لكيقراو معيا كيبقاو جالسين بنات ودراري قدام ليسي ويضحكو بقيت على هاد الحال شدينا عطلة ديال دورة الأولى ومشينا سافرنا لعند خالتي كيعجبني نمشي عندهم حيت كنلقا لبنات لقدي دلعائلة مهم كولهم كيهضرو على "الفايسبوك" وكيفاش تقدري تهضري فيه مع لبغيتي المهم قلت لوحدا فيهم تصاوب ليا واحد حتى انا وتعلمو ليا بالفعل داكشي لوقع حتى انا ولا عندي فايسبوك وليت كنفكر كيفاش نتعرف فيه على دراري ولبنات دليسي.. ( اااه نسيت كان واحد دري سميتو عمر هو بقوص دليسي مكيجيش بزاف نهار كيجي مكيدخلوش لبنات كيغيبو باش ابقاو جالسين حداه ) صافي سلات دورة تانية ودخلنا بدينا كنقراو المهم معمرني دخلت باقي لفايسبوك دغيا داز لعام نجحت ب 10:00 غير بسبب أخلاقي اما قرايتي ههه منعاودش ليكم كنت كنحطم رقم لقياسي ف 5 و 4 و 1 حتى دفاتر ديالى نقيين كنكتب دروس ديالى شدينا العطلة عاود مشينا عند خالتي وحنا لبنات كنتجمعو بداو كيسولوني اش درت ف الفيسبوك معامن تعرفت

الجزء 3

فاجأتهم بمعمرني حليتو ونسيت على كود قررات هاد المرة اقادو ليا واحد مصحوب بسميتي وصوري قادو ليا حالتي كانت أول مرة ندير ماكياج فتصاور صوروني كلهم عجبتهم وافقت باش احطوهم ليا كنتصدمو كاملين يداك العدد ديال les invitations لوصلوني بواحد سرعة ولميساجات فرحت بزاااف وكنتصدم مرة تانية عمر لبوقوص دليسي صراحة كان كيعجبني معمرني قلتها لشي حد وعاودت لبنت خالتي عليه سلمى لقدات لي فيسبوك عحبها لحال قاتلي غادي نقبل طلب صداقة ديالو انا مبغيتش حيت كيفاش انا ياسمين لمكيعرفني حد فليسي نوقف نهضر مع عمر هي بقات كتقنعني وافقت باش تقبل طلب صداقة كيف قبلات طلب صداقة وكتب ليا قلبي كان كيضرب

Omar: salam cv

Yassmin: hmd wnta

Oman: hta ana smhi lia ila bereztk

Yassmin : non machi mochkil

omar: yak nti hia yassmin lhchoumia likatb9a wa9fa boheditha hda chejra

Yassmin : oui ana هديك


( منعاودش ليكم لفرحة ليكنت فيها وقلبي كيضرب حيت عمري كنت نتخيل بلي اكيعرفني واش كاينة فوق الكرة الأرضية المهم بقينا أسبوع وحنا هكا كنهضرو واحد نهار نلقا ميساج مخليه ليا فليل

Omar: yassmin saraha ma3erftch ach ghadi ngolik sbrt bzff 3am w ana sabr wdb mab9itech 9adr nethml ktr mn haka mn nhar lwl lijiti fih lycée wana rad lik lbal khtfti lia 9lbi mn b3id wakha maknach knhdro walakin dima kanchofk ba9i 3a9l bdebt nhar lwel jiti fih knti labsa keswa b noire katbani fiha fhal Chi 9amar w hadi nmerti ila 9eriti lmsg kntmna tjawbini f téléphone

ف ديك لحظة بقيت مصدومة من لميساج من لبستي لبقا عاقل عليها من هضرتو وبديت كنغوط سلمى سلمى ! بصداعي فيقتها جات كتجري لعندي لبيسي قرات وبدات كتضحك وكتقولي ارا ليا بنت خالتي طيحات عمر وقلت أيها ناري اش غاندير دابا كون غير مقبلتش نهار لول طلب صداقة كنقول ليها كيفاش دابا غادي نمشي ليسي كيفاش غادي نشوف فيه وهي بدات كتضحك وكتقولي يهاد لهبيلة هزي تلفونك و قولي ليه حتى انا كتعجبني
مقدرتش المهم بقات كتزعم فيا حتى هزيت تلفون وقتلو فميساج شكرا ولكن ...

الجزء 4

هزيت تلفون وقتلو فميساج شكرا ولكن منقدرش نهضر معاك باقي وانا ماشي من داك نوع لكتعرف عيط ليا مجاوبتوش مرة لولا مرة تانية وهي تحيد ليا تلفون مرة تالتا سلمى وهي تجاوب وحطات ليا تلفون على ودني غير قال الو تخلطات عليا لخلعة قلبي بدا كيضرب عرقات ليا ايدي قتلو الو وهو اقول لي كيفاش داك لميساج حشومة عليك عمري عترفت لشي وحدة بشي حاجة ولحسيت بهاد الإحساس ونتي كتقولي ليا منبقاوش نهضرو انا عارفك حتى نتي كتحسي بشي حاجة من جهتي هادا إحساس كنحسوه بلا متقوليها انا حسيتو وصراحة هدرتو خلاتني نقول ليه "اه" ولكن انا فشكل ...قالي دابا صافي متقولي والو نتي وليتي ديالى ومحسوبة عليا من هاد ليلةا ونتي ياسمينت حياتي (ناري ناري ملي قالي هاكا كنحس براسي بغا نغوط بلفرحة بغا نطير ) وبقيت ساكتة قالي سكوت علامة رضا ضحكت بشوية قالي نموت ونشوف ضحكتك المهم مع أول مرة نهضر فتلفون مع دري وبهاد طريقة قتلو صبح على خير غد ليه فقت صيفط لي ميساج ديال صباح هضرتو حلوة كتدوخ وكل دقيقة كيسيفط ليا وانا مكنجاوبوش على لميساجات من غير إلى هضرنا ف الفايسبوك ولا عيط لي فليل المهم بقينا هاكا حتى سلات العطلة ورجعنا ليسي ولييت كنمشي فطاكسي ونجيي فيها باش منتلقاش معاه وداز أسبوع هاكا بعد مدخلت نقرا فسيزيام و ديما كيقولي شوفي شي وقت نتلاقاو فيه رآه توحشتك واحد نهار هبط من طاكسي مشيت لحانوت لحدا ليسي ن نشري حيت داك نهار ماما عطلات لغدا ومشيت لحانوت كنتصدم بلي واقف تماك مع لبنات فصراحة شداتني لغيرة مكرهتش نصرفقو ولكن خديت اش بغيت وهو اتبعني لبنات مافهمو والو باينة كيسولو فين كيعرفو بعضياتهم!؟ وعلاش تبعها !؟ وشنو كتجيه !!.... انا ملي خلاهم وتبعني فرحت ولكن منسيتش بلي واقف مع لبنات المهم مع ختكوم عويطة جريت دغيا دخلت ليسي ودخلت لقسم مقدرش اشدني كنت خارجة مع 6 ولكن جا عدنا الأستاذ قال لينا بلي حصة ديالو من 4 ل 6 تلغات وصافي كيف ديما خرجت كنتسنا طاكسي ...

الجزء 5

خرجت كنتسنا طاكسي حتى كنحس بشي حد شدني من يدي وجرني اكيد عمر هو الوحيد لقدر ادير هكا بدا كيقولي مالك هربتي مني مبغيتيش تشوفيني واش انا حبيبك ولا عدوك هو كيهضر وانا كنعرق ووجهي حمر كنفكر ناري ناس كيشوفو وانا لأول مرة اشدني ش واحد من يدي كلمة منو نساتني فكولشي ونساتني حتى ف لوقت بقيت جالسة انا وياه ها ياسمين بدات كتولي بنت ليسي المهم وصلت لدار معطلة ماما مقالت لي والو حيت اول مرة وليت ديما كنجلس انا وياه حتى تشهرت فليسي كولشي تصدم "صاحبت عمر" المهم علاقتنا بديت كنولفها وكانت كلها إحترام صراحة لشافنا كيحسدنا المهم نسيت معودت ليكم على بنات ليسي ضاسرين بزاااف وكيركبو مع شارفين كيسهرو مكيخلو ميديرو "عمر" حتى هو بحالي فلقرايا ضعيف كان داخل لشي نادي دلكرة وقررو اسافرو لفرانسا 15يوم وكان من بين دوك لتختارو مهم تعرفت فالفايسبوك على بنات ليسي وبالضبط الرئيسة ديالهم سميتها جنات وليت كنجلس معها حدا ليسي حيت ولفت لجلسا فيه أما عمر مشا لفرنسا كنهضر دايما انا وياه تيقولي توحشتك بزاااف بغيت نشوفك حدايا ...جنات وصحابتها ديما كيقولو لي نتي زوينة ولا درتي مكياج غدي تولي تحمقي تواحدة مكرهات تكون كتحمق واحد نهار هزيت ماكياج لماما ودرتو وكولشي كيشوف فيا عجبني لحال وليت كندير مكياج ولكن منعاودش ليكم لحرب لدزت منها باش ماما توافق على أنني نديرو شوية قاتلي نبدا نخرج معاها نتعشاو وهي لكتخلص عليا وكانت كتشكا ديما على المصروف ديال دارهم واحد نهار سولتها كيفاش نتي ديما عندك فلوس و باباك مخدامش وماماك حتى هي قاتلي الله يخلي لبركة فلفاكاتيم المهم جا عمر تعجب كيفاش كندير مكياج فلول مابغاش ولكن قنعتو كان كيقولي حيديه حتى نتزوجو وديريه ليا بوحدي المهم انا وعمر الحمد لله علاقتنا مزيانة بزاااف كنتفهمو بزاااف عيطو ليه عاوتني باش اسافر لاسبانيا ولكن هاد لمرة شهر ديال تدريب وافق صافي مشا ورجعت انا وجنات كنجلسو حدا ليسي وكتعمر لي راسي نتي زوينة ومضيعة حياتك مع برهوش ديما كتعمر لي راسي

الجزء 6 الأخير

ورجعت انا وجنات كنجلسو حدا ليسي وكتعمر لي راسي نتي زوينة ومضيعة حياتك مع برهوش ديما كتعمر لي راسي ولكن انا مكنديهاش فهدرتها شوية بدأت كتقولي شوفي عمر رآه ضاسر و سولي أي واحد غادي اقوليك ااه غادي اكون تعرف تماك على شي بنت وخلاك نتي هنا دخلني لوسواس وبداو لمشاكل مع عمر شوية بديت كنخرجو انا وياها نتعشاو ولكن هاد المرة مختلفة ماشي هي لكتخلص كانت كتجلسني مع شارفين اعشيونا على حسابهم حتى انا وليت كنطلع فطوموبيلات معاها وكيعطونا لفلوس غير هكاك جا عمر عرفني شنو كندير مشا ليا وضربني أول مرة اضربني عمر حيت كان عارفني كيفاش كنت وكيفاش وليت من ياسمين ل جاسمين هادا دلع كانت كتعيطت ليا بيه جنات صافي دوزنا لجيهاوي وعقلي خاوي جبت فيه 8 غير بنقيل تفارقت مع عمر ومحسيتش بفراقو وخا هكاك كان دايما تابعني وكيطلبني نرجعو ونسمح ليه ولكن انا عماني طمع دقت فلوس وبقيت هاكا جا لباك وبقيت على حال جاسمين انا وجنات دوزت لباك نجحت فيه بنقيل ولكن بديت كنحس بالفراغ ديال عمر وبلي طريق لغادا فيها غادي نخرج على راسي بديت كنقص شوية بشوية من خريج معاها حتى مابقيناش كنخرجو تخاسمت معاها حيت طلبات مني ندير شي حوايج (.)المهم دفعت لفاك وبقيت كنفكر فعمر تفكيري كامل فعمر من داك نهار معرفتش شنو كايدير ولا فين كاين حاولت نقلب عليه بزززاف وملقيتش فين والآن انا الحمد لله رجعت ياسمين ونسيت جاسمين ولكن نادمة بزاااف على عمر حيت ضيعتو من ايدي صعب نلقا واحد ابغيني فحالو واحترمني و دابا كنحاول نركز فقرايتي فقط ونمشي فيها بعيد وعندي آمل أنني غادي نتلاقاو شي نهار.