نحاس مطلي بالذهب

خودي لي يبغيك وماشي لي تبغيه ....
ديما كنت نسمع هاد الهدرة من جدة الله يرحمها فاش تايطير ليها الفريخ

وتبدا علي بالنصائح والمواعظ فاش كنت باقا صغيرة بعض المرات كانديرلها الخاطر ونجلس حداها نتصنت ليها وبعض المرات ملي كانكون تانفرج في المسلسل ديالي كانقولها تسكت الله يسمحلي منها واخا هاكاك فاش ماتت شحال بكيت عليها.
أنا سميتي لمياء بنت في عمري 18 عام خرجت من القراية العام لي داز ختكم مكلخة شويا ومكررة عامين والواليد طلع ليه الدم وحلف علي لا عاودت عتبت تما وأنا نيت لقيتها سبة تهنيت من الفياق بكري ومن معيور الأساتذة واخا هاكداك مابغيتش نبين طيحت واحد جوج دمعات ودرت راسي مضربة على الطعام واحد نص نهار كنت مخبية سقاطة تحت الناموسية.
ماعلينا خرجت من القراية و ولا همي الوحيد هو السريط النعاس والدوران كنت نحماق على التسركيل واخا الوالد عيا يسلخ في وحتى الواليدة والله ماقصرت نخرج نخرج واخا نضرب غير دورة في الحومة ولا والو...

مانكدبش عليكم كنت خفيفة مع راسي كنت نبغي نعيش نلبس لقصير نطلق شعري ندير ماكياج ولولا الواليد لي كان مزيرني وكان درت العجب كنت زوينة بلا ما تقولو شكار راسو حيت بصح مع كانو الخطاب ديما يجيو عندي وبدون مبالغة وأنا كنت نغيفوسيهم كاملين حيت في نظري مازال ماجاش فارس أحلامي لي كانتسنى.
كنت نحلم بحال جميع البنات بشي راجل يكون طويل وسيم تكون عندي لحية خفيفة وعينيه عسليين ويكون لاباس عليه الحاصول كانو خارجين علي الأفلام التركية...
حومتنا كانت حومة شعبية ماشي بزاف ولكن كان كولشي كايعرف بعضياته البنات فيها كيما يقولو المصريين زي الهم على القلب وغير لي تلقايها فرفارة وقليل لي جالسة في دارهم مثبتة ومرزنة وليني ديك المرزنة غالبا ماتلقايها مسكينة مافيها مايتشاف الله يسمحلي..ماتلومويش ولكن كانعاودليكم الواقع لي حنا عايشين فيه وحنا الزوينات ماشي ذنبنا نعانيو ديما امن حسد لي زينهم على قدهم.. الهم نرجعو لموضوعنا كيما قلت كنت بحال جميع البنات نحلم بالزواج لي غادي يخرجني من ديك الحومة لي دارت لي القوق في الراس نفس الكمامر كل نهار نصبح عليهم لمدة 18 عام تاوليت شي مرات نسى كمارتي ونتفكر ديالهم واخا كنت راسمة فارس أحلامي في خيالي ولكن كنت عارفة ماغاديش نلقاه مية في المية ختكم مكلخة ولكن واقعية واقولو سبحان الله.. 

حياتي كانت عادية بالنسبة لي ماكلة نعاس تسركيل عصا و قصص الحب كنت نشوفهم غا في الأفلام
أصلا الواليدة الله يسمحليها مامخلياني نتنفس ومرات فاش نهرب ليها ونمشي نتسكع مع بنات الحومة في الكورنيش نلقاها تبعاتني وتبدا تسلخ في في الزنقة واحد النهار كيما عادتي معمرة ودنيا بليكيت وجالسة في عتبة الدار وكانتصنت لتامر حسني سادة عيني وماجايبة للدنيا خبار شويا جات مريم بنت جارتنا وصاحبتي تاهي الله يعفو عليها فريفرة وكبيرة علي مخطوبة من عمر لي تصاحبات معاه خمس سنين ولولا خوتها لي كانو غايفلقوه كون راه تسلت شحال هادي جات عندي كاتجري وحيداتلي لي كيت من ودني
تي مالكي جايا كيف القدر المستعجل طيرتيها مني خلعة
مريم:وتي نوضي تكعدي بقيتي لي هنا كاتصنتي في الأغاني غاتخرجي على راسك
أنا:شمن نخرج على راسي سيري عطيني اليساع خليني نتكونسونطرا في الكلمات راني بغيت نحفظها
مريم:أويلي على مرضة كيف دايرة بغيتي تفقسيني نوضي تكعدي راه خالتي الزوهرة جات من الرباط ومعاها ولدها داك الأستاذ
عرفتي فاش شفتو نعلت زهري المكفس بحال كمارتك والنهار لي تلاقيت فيه بعمر
أنآ: شمن أستاذ تانتي؟واش داك السمين لي كنا نضربوه بالحجر فاش كان صغير
مريم: وايييه هو ولوكان تشوفيه وكيف ولا ياصحبتي تحوالي
أنا:حلفي لا لا مانتيقش تانشوف بعيني
مريم:إيوا زيدي قدامي تشوفي بعينيك يا حبة عيني
بالطبع هادا كان خبر مايتفلتش وختكم ناضت طايرة باش تشوف رضى السمين بو 4 عيون وكيفاش ولا
خالتي الزوهرة كانت جارتنا تاهي في الحومة عندها جوج بنات عوانس الله يستر عليهم وولد واحد لي هو هاد رضى السمين فاش وصل خمس طاشر عام صيفتاتو مو عند خالتو في الرباط وتما كمل قرايتو و عمرو ماعاود عتب في الحومة حتى لهاد النهار لي غادي يجي فيه وغادي تبدل فيه حياتي بشكل جذري.

مشينا أنا ومريم باش شوف رضى الدبدوب وفكرنا نوقفو حدا دار خالتي حليمة (تاهي جارتنا) والمصيبة لقينا البلاصة عامرة !! على زهري جيت لقيت نهاد ورباعتها شادين داك الحيط ولنفس النوايا ديالنا سبحان باش تعرفو مستوى يأس بنات حومتي
الحاصول شدينا الدور في قنت آخر وبقينا مجمهرين تما تقول شادين النوبة في سبيطار الحومة حتى خرج رضى الدبدوب كانت المفاجأة التي أبكت الملايين ..نعم عزيزي القارئ..
رضى كان كيما تخيلت فارس أحلامي تماما الخالق الناطق كيفا جرات أنا بنفسي مافاهماش المهم كنت نسمع ديك كلمة حب من النظرة الأولى في الأفلام وماكنتش نفهمها يعني كنت نعرف كين الإعجاب بالشكل عامة وحتى تعرفي على الشخصية وتعاشريها عاد يكون الحب (شفتو راني مرة مرة نولي حكيمة وكانتفلسف تبارك الله علي) ولكن عمري فكرت بلي كاين الحب زعما الحووووب ديال بصاح تاليوم فاش ششفت فارس أحلامي
خرج السي رضا ودار كرسي حدا الباب وحط رجل فوق الأخرى وبدا يقرا واحد الكتاب في ديك اللحظة البنات الطايحة فيهم كثر من النايضة ...أنا بقيت غير كانشوف كانشوف فيه وهو فاش هز راسو وشاف في دغيا حدرت راسي وماقدرتش نشوف في عينيه
داك النهار رجعت فيه للدار فاش دخلت تلقاتلي الوالدة بنفس السنفونية
فين كنتي يابنت الحرام الله يعطيك الخلا شي نهار تجيبلي شي مصيبة إيمتا نتهنا منك وتجوجي وتعطيني التيساع الناس تخرخ من كرشها الولاد وأنا نخرج الزمر و الفقايس .. بقيت كانشوف فيها بحال يلا كانتصت لشي أغنية من أغاني عبد الحليم حافظ هديك ديال: حاجة غريبة حاجة غريبة الدنيا لها طعم جديد.. ماعلينا دخلت بيتي سديت الباب وتلاحيت فوق ناموسيتي المحفرة من كثرة النعاس وبديت نحلم برضى والعرس ديالنا وشهر العسل والدخلة...تقزدرت ياكو ؟مالنا مانحلموش أنا زينة وهو زين والله يوقف راسين في الحلال قولو آمين.

فقت الصباح مع العشرة بكرت على غير العادة ماعرفت كيدرتلها مشيت للكوزينة لقيت الوالدة كاتغسل في الماعن ديال الفطور
وأنا نبوسها في حناكها ونحيدليها الماعن من يديها وقتليها غير خليني أنا نغسلهم الواليدة ماتصوروش النظرة لي كانت على وجهها
فبعد ماكنت نهز القشوع لي حنجرت فيهوم بضربات متتالية بسلاح الشطابة(الوالدة عندي شوية عنيفة دعيو معايا) كانوض بكري وكانبدا نغسل في الماعن مسحات يديها وبدات تقلب لي في راسي لا تكون في شي سخانة ولا شي عجب
السخانة مافيكش ياكما شي زبلة زبلتيها هادي؟
أنا:حشومة عليك امي جرحتي مشاعري في عوض ما تفرحي و اتشجعيني وتشدي بيدي وتزيدي بي القدام ...
الواليدة:لاوه ماطلبتي غير الساهل و نجيبلك الدقة الراكشية وندبح ليك شي عجل
أنا:إيوا هانتي بديتي تفكري الميمة يخليك ليلي
الواليدة: يخليك بالخلا أنا شامة شي ريحة ماشي هي هاديك
أنا:والله ما أنا الميمة
شافت في الواليدة واحد النظرة بحال هاديك ديال سوبيرمان لا عقلتو عليها فاش كايخرج اللايزر من عينيه وخلاتني ومشات
المهم كملت الماعن وبقيت كانضحك في خاطري وكانتفكر حبيب القلب وأنا كانشير ليه وأنا في العمارية وضربت تجفيفة فاعلة تاركة للدار وخملت بيتي كاع هادشي درو بواحد النشاط عجيب ياسلام ملي ساليت دوشت قاديت الحالة لبست واحد الكسوة مخبياها ليام الحزة بحال هاد النهار قصيرة حد الركبة درت بغوشينك وماكياج خفيف وتسنيت الواليدة حتى خرجات تقدى وأنا نسلت صيفت ميساج لمريم وقتلها نتلاقاو في المكان المعلوم... فاش تلاقينا قاتلي
هاي هاي هاي على التبوكيصة لي شافك يقول ماشي هي هادي لمياء لي الدبانة ملي دور عليها تحصل في شعكاكتها
أنا:تي سكتينا الله يعطيك الخلا طفرتيها نتي بشعكاكتك راكي غير منعساها بالترطيبات أوف باراكا علي من المعيور الصباح لله خسرتيلي المود
مريم:خسرتلك المود؟ الله يعطينا وجهك ياوجه الحديدة
بقينا واقفين وكي العادة خرج رضى حط الكرسي وبدا يقرا في الكتاب وأنا حالة في فمي على مصراعيه
شحال كان يبان كوووول فاش كان يجلس يقرا خطار وصافي ومرة مرة كان يطلع عينيه في وفاش يقشعني كانتخبا زعما واخا خفيفة حشومية, المهم بقينا سيمانة هاكدا وبدا يخرج واحد الخبر ديال خالتي الزوهرة كاتقلب على المرة لولدها داكشي علاش جات من الرباط وجابتو معاها تما أنا فشلو ركابي و فكرت فارس أحلامي غادي يطير من يدي الحومة عامرة بنات وخالتي الزوهرة ماعندهاش مع الواليدة بزاف مشيت فيها وضاعمن يدي حب حياتي.

داك النهار ماخرجتش من الدار بديت ناعسة في بيتي وسادة علي كانتصت في أغاني عبد الحليم حافظ
هاد المرة في ديك الأغنية ديال قال ايه جاى الزمان يداوينا من إييييه جاي يازمان يا زمان تداوييينا ...
تنهيدة مورا تنهيدة وأنا مجبدة من فوق الناموسية وحاسة زماني كايتسلت من يدي شوية كانسمع الدقان في الباب تقول بوليس الآداب حليت لقيت خويا الصغير أسامة غوت عليه قتلو
مالك نتا جاي فارع علي الباب يخ كي قالت مي كرشها تخرج غير الزمر
أسامة:ياك هي مابغيتيش تعرفي شكون جا عندنا
أنا:شكون غادي يجي مثلا براد بيت وتريكته تكون غير خالتي حليمة باقي غا تهز قشها وتجي تسكن عندنا
أسامة: وا لا خالتي الزووووووهرة
أنا:عاود عاود شكون؟خالتي الزوهرة؟!!!!!
فاش سمعت خالتي الزوهرة ردعت الباب في وجه أسامة ومشيت كانجري حتى ضربت صبع رجلي الصغير مع رجل الناموسية
ولكن ماعنديش الوقت للآه والآخ بديت نقاد راسي ولبس وماكييت كولشي درته في 10 الدقايق خرجت ضارباها بجرية حتى الصالون تقلت راسي وجيت داخلة بحال شي طاووس بلاتي كانحسب في نحط رجلي سلمت على الواليدة بحال يلا ست سنين ماشافتني و دزت سلمت على خالتي الزهرة بواحد الحشمة والرقة
فاش شافتني قالت:تبارك الله تبارك الله على العزبة كبرتي وزيانتي العفريتة
وأنا نجي خارجة حادرة راسي في الأرض وغير خرجت حطيت ودني حدا الباب وبديت كانتصت
داك شي ديال الثرثرة دخلتو من ودن وخرجتو من لوخرى حتى وصلت المقطع لي سمعت فيه سميت رضى حليت ودني مزيآآان
وفاش سمعت بلي رضى شافني وعجبتو وبغا يتزوجني غوت مرة وحدة
حسيت براسي وحطيت يدي فوق فمي الواليدة وخالتي زهور خرجو يجريو و شافوني لاصقة حدا الباب مالقيت مانقول
بقيت غير حالة فمي فكرت في كذبة سريعة وقتليهم بلي طوبا دازت من حدايا. 

خالتي الزوهرة بدات تضحك وقالت: ههههه وييه دوك الطوبات الله يقطع لباباهوم الجذر كايخلعو
مي بقات تخنزر في وتغدد تما عرفت راسي ديك العشية واكلة وموزعة ..مشاو رجعو للصالون وأنا مشيت طايرة للكوزينا كانوجد في آتاي وأنا فرحانة وكانغني ماتصوروش درجة فرحتي كنت غانطير ونرفرف في الفضاء
جات الوالدة دخلات لقاتني كانوجد في آتاي تخلعت وتزعزعت قاتلي
آش تاديري؟!!
هانتي كاتشوفي يا الميمة الحبيبة كانوجد آتاي لجارتنا العزيزة
الواليدة: من إيمتا ونتي كاتوجدي آتاي لشي حد!!!تي أصلا كاتعرفي ليه
أنا:وهانتي أمي ماتحبطينيش تاني تاواحد مازاد معلم
المهم غير بالسياسة والفن جريت على مي وبقيت كانوجد بقششت الكوزينة كلها زنكة زنكة قصدي باب باب وبواطة وبواطة ويالهول ماوجدت هاللوز هالبيستاش مخبي جابتو خالتي من فرنسا من الصيف لي داز ومي مخبعاه!يا ربي السلامة ..المهم صايبت كولشي وجبدت الميعنات الخاصين بل في أي بي يعني غير الشخصيات المهمة أكيد عدوزتي المستقبلية ضروري
حطيت داكشي وسط ذهول الواليدة جلست حداها كانفرغ في أتاي وأنا نحس بالقريص طالع معايا وهي تاتقول بطرف فمها:واخا يوا بنت الحرام حسابنا من بعد...
وأنا نغوت:آآآح آمي قسحتيني
الواليدة بدات تصفار وتخضار وتضحك بحال ديك الضحة تاع راس الحولي فاش تايكون يتشوط و أنا بقيت كانجهز نفسي نفسيا وجسمانيا للعصا هاد الليلة
جلسنا شربنا أتاي وبقيت أنا ساكتة وحادرة راسي شوية هدرات خالتي الزوهرة: تبارك الله تبارك الله على الزين والتباتة عرفتيني آبنتي لاش جيت هنا ياك؟
أنا بديت نتزنك ونحشم
خالتي الزوهرة: إيوا راني داكرت مع ميمتك قاتلي ضروري نسولو البنت قتليها ماقلتي عيب إيوا شنو قلتي يا ب نتي موافقة ولا ..
أنا: آه آه موافقة موآآآفقة أخالتي ...
خالتي الزوهرة سكتات وبقات تضحك وأنا عقت براسي كحلتها الخفة ديالي بانت وخرجت أصلا كانت هاديك أطول مدة نخبي فيها خفتي ماعرفت منين جاني هاد العقل...
المهم أنا نضت وكملت على برا وخليتهم يتافقو إيمتا يجي حبيبي يشوفني ويخطبوني رسميا من عند الواليد
فاش مشات خالتي زهور يمكن ليكم تخيلو مي آش دارت لي بقيت نطلبها غير وجهي ماتقربوش خفت لا تبان زروقية العين في تصور العرس.

 

كليت لي قسم الله ديك العشية وحمدت الله وشكرتو حتى خرجت منها بدون عاهات مستديمة وكاع داك العصا لي كليت فاش سخفت الواليدة قتليها :
والله آمي حتى ضرب الحبيب زي أكل الزبيب وخليها تهاوش مع راسها ودخلت بيتي ورجعت تاني نحلم بفتى أحلامي
تخيلت راسي لابسة غوب دو سواغي كحل وشيك بزاف ورافعة شعري ورضى لابس كوستيم ومع هو طويل جا يحمق
وأنا دايرة يدي في دراعه وداخلين ريسطو ياباني رآآآقي و فاش جا السرباي عطانا المينو أنا قلت للسرباي: عافاك جيبليا salade chinoise au poulet pour l'entrée و les sushis avec la sauce soja و le dessert بلاش je suis au régime ورضى فاش شافني تانكوموندي بالفرونسي زاد تزعط في وقال واووو مراتي شحال مثقفة شدلي في يدي وباسها وفاش حطولنا الماكلة هز رضى بدوك الخشبات شوية لاسالاد باش يوكلني وقالي :حبيبة قولي آآآآآآه وأنا نقول آآآآآآه ....َآآآآآآآآآآآآآآآخخخ
حسيت بالركلة طالعة معا جنابي حليت عيني لقيت البزقول ديال خويا أسامة تايركل في
تي مالكي طراشيتي نص ساعة وأنا نقولك نوضي بّا بغا يهدر معاك
أنا: تعرف دابا يا وليدي يا أسامة وكان نلحق عليك تانردك كفتة
نضت كانجري عليه وهو تايهرب وفاش شديتو سلختو بالعصا (عندن العنف في العائلة حاجة طبيعية دابا تولفو معاه)
وهو تايغوت واّمي !وا بّا! خرج الواليد لقاني تاندقدق فيه وغوت تغويتة وحدة خلاني جامدة في في بلاصتي
باراكا!!!! واش نتي باقا مابغيتيش ديري عقلك !!واش الناس كايخطبو فيك ونتي مازال كاطيري في المقلاة
دار عند الواليدة وقالها :واش هادي تصلاح لشي زواج الله يهديك.. زيدي تحركي قدامي بغيت نهدر معاك
الواليد كانت عليه الهيبة كيما نقولو يعني هدرة وحدة مايزيدش فوقها ماشي بحال الواليدة سلخيي غوتي دعي نتاحري كاع شكون داها فيك ..فاش قالي بغيت نهدر معاك تما عرفت القضية فيها محاضرة ومواعظ
دخلت جلست ساكتة وهو يهدر:
شوف آبنتي نتي راك باقا صغيرة وحتى العقل الله يجيب ماعندك حتى غرام والزواج راه مسؤوليه كبيرة ماشي غير آجي وتزوج راه تابعو شلا حوايج وخاصه الصبر والحكمة و..
مانكدبش عليكم بقيت كانتصنت حتى لكلمة الزواج راه مسؤوولية تما درت لمخي atteindre حبس
الواليد زاد في الهرود وأنا مشيييت نسرح في شي كوكب آخر حتى وصل: واش متأكدة راكي موافقة على هاد الزواج؟
أنا:آه؟ آه أبا آه والله تامتأكدة
الواليد:إيوا ملاعندي مانزيدك غير الله يكمل عليك بالخير آبنتي والله يهديك
هزيت يدي للسما وقلت:آميييييين. 

صونات خالتي الزوهرة على الواليدة باش تشد موعد باش يجيو يخطبوني رسميا؛ شتو الناس الكلاص 2 دروبا بيناتنا وتاتصوني في التيليفون الصراحة خالتي الزوهرة غاتحولات للرباط تكلاصآآات
المهم بداو التجهيزات على قدم وساق الواليدة بدات تجمع في ال ك راكيب وترمي فوق السطاح وبدات حملة النظافة والتخمال والتوجاد للشهيوات وزيد وزيد وأنا سادة على راسي في بيتي مع مريم تاتوريني الثقافة الزوجية مع هي عندها خبرة في داكشي بقات تشرحلي كيفاش...ويلي ويلي حشمت
جات مي تاتهرس علينا الباب بالدقان
توما خرجو من تما آش تاديرو نتي وياها
مريم:أوالو أخالتي غير تانوريلها كيدير للكسكسو
بقينا كانضحكو شوية خرجات مريم مشات لدارهم وبقيت أنا في بيتي كانوجد راسي لبست واحد القفطان بيض خفيف ودرت واحد المشطة سامبل و مادرت غير فوندوتان وكحل زعما بغيتو يشوفني على طبيعتي أنا أأصلا بماكياج ولا بلا بيه زينة زينة خرجت ومشيت عند مي في الكوزينة قتليها :نعاونك في شي حاجة أميمتي الحبيبة؟
الواليدة: ميمتي الحبيبة ...خلاوها المصريين اسمع كلامك اصدقك اشوف امورك استعجب‏
سمعت الصونات في الباب وجيت كانجري والواليدة تشنق علي من العنق ديال القفطان
ويلي واش كاين شي وحدة تمشي تحل للخطابها ؟!! لا لا نتي موحال واش يكملو عليك
أنا:أووووف آمي ماهنا فال عندك الله يستر يلا مشاو هادو والله لا تزوجتلك والله تانبورليك هنا
مشا الواليد يحل الباب وبقيت أنا كانشوف فيهم من ورا الباب ديال الكوزينة وأنا نقشع حب حياتي كنت غاندوب أعباد الله واش هاد الزين كامل غايتزوج بي أنا
آآآآآآآه صراحة سطاني آش ندير هاد شي غير من البعيد وعمرنا هدرنا آه يآآاني
بقاو كايهدرو في أمور العرس والصداق و داكشي أنا دخلت البلاطو ديال العصير وأنا خاشيا راسي فيه فاش وصلت الطبلة طلعت فيه عيني لقيتو تايشوف في دخلت في الطبلة ديريكت وقلبت الكيسان كلهم بالعصير لي فيهوم فوقها !!!!النص جا فوق الواليد والنص فوق خالتي الزوهرة
في لحظة تبدل لوني وليت بحال شي ماطيشة ووحشمت بزاف ولكن ماعليش غير حبيبي ماقاستو حتى قطرة وماضيعتش ليه الحطة..في ديك الساعة ماعرفت ماندير غير خرجت كانجري للكوزينة وخالتي الزوهرة كاضحاك وتقول ماعليش آبنتي ماطرا باس والواليد وكان ماحشم وكان زرقلي عيني.

 

هربت للكوزينة وأنا بغيت نموت حشمت راسي قدام فتى أحلامي وعدوزتي فاش شافتني الواليدة داخلة ماتانشوفش قدامي قالتي:درتي شي مصيبة ياك أنا عارفة ديك الخفة ديالك
وهو يدخل الواليد يغوت: زيدي مسحي وجمعي داكشي لي دارت بنتك لا حول ولا قوة إلا بالله واش حتى بلاطو ماعرفتي تهزيه نيشان والله ماعرفت آش بغاو فيك هاد الناس
مشات الواليدة جمعات الروينة ومسحات وأنا بقيت في الكوزينة شوية عيطو علي ومشيت جلست معاهم وكانت هاديك أول مرة نسمع فيها صوت محبوبي فاش سلمت عليه وقالي لاباس عليك ماتخيلوش إحساسي رائع رائع رائع جلست وبقيت ساكتة وهدرات خالتي الزوهرة: إيوا مالها عروستنا ساكتة ههههه
أنا زدت غرقت في حوايجي المهم بقينا هاكداك ورضى حتى هو بقا ساكت وماهدرش كان كالم بزاف
تافقو على كولشي حدايا على تلباس الخواتم والعرس لي كان بعد 15 يوم حيت رضى بغا يرجع لخدمته قبل ماتسالي العطلة أنا كنت فرحانة بزاف حيت ماغاديش طول الخطبة ... وفاش سالاو وجاو خارجين بقيت كانتسنا منه يطلب مني نمرة التيليفون ولكن ماطلبهاش قلت ماعليش يمكن حشم من الواليد..
هاديك الليلة بت فايقة وماقدرتش نعس من الفرحة ربي كمل علي بلي بغاه قلبي وبلا عذاب ولا هم يحزنون
حسيت راسي عندي واحد الزهر يهرس الحجر ملي عجبتو والحومة عامرة بنات يمكن ديك السيمانة لي كنت حاضياه فيها من بعيد كان يشوفني وتما تغرم بي ..المهم مانقدرش نوصفليكم إحساسي وغير لي مجربة غادي تفهمني...
في الغد وجدت راسي باش نخرجو أنا والواليدة للسوق 15 يوم راه مدة قصيرة وخاصني نزرب باش نوجد جهازي في 2 سيمانات ماشي ساهلة مشينا تقدينا ورجعنا في حالنا وفاش رجعنا قلت للواليدة:
عافاك أمي خلينا ندوزو على خالتي الزوهرة
الواليدة:واش تسطيتي واش البارح جاو خطبوك واليوم بغيتينا نمشي عندهم بغيتي يقولو علينا ماتيقنا إيمتا خطبوك!
أنا:عافاك آمي عافاك عافاك عافاك
الواليدة: تشعل فيك عافية زيدي تحركي قدامي ماتخلينيش نتفك قدام عباد الله
مشينا للدار وتما خليت الواليدة حتى دخلات توضى أنا طلقت المسجلة وسديت باب بيتي وتسلتت على برا.

 

مشيت وأنا كانفرفر على دار محبوبي ومالقيتوش جالس قدام الباب كيما ديما يقرا في الكتاب قربت ودقيت في الباب وحلات عليا خالتي الزوهرة فاش شافتني حسيت بيها بحال لا استغربت سلمت عليها وقاتلي :نعام آبنتي بغيتي شي حاجة؟أنا ديك الساعة تربط لساني أيييه لسآآني لي كاتقول عليه الواليدة لسانك ولا طويل وخاصو يتقطع .بقيت غير كانفرنس وتزنكت تما فاش حسات بي وقاتلي:زيدي زيدي دخلي آبنتي سمحيلي ماعرفت فين كان بالي سرحان ماعرضتش عليك... دخلت للدار وجلسنا في الصالون وأنا جلست حدا الباب وبقيت كانطل من هنا ومن هناك بحثا عن محبوبي والو مالقيتوش هدرات خالتي الزوهرة قاتلي :اليووم بقيت بوحدي في الدار رضى مشا للسوق يتقدا لي مزيان لي جيتي آبنتي تونسيني
أنا:رضى ماكاينش!
خالتي الزوهرة: واراني قتليك خرج يتقدى هههههههه
أنا:آآآآه ومزيان...
خالتي الزوهرة: نوض ندير كويس آتاي نجمعو عليه
أنا غوتت وجمعت الوقفة: لا آخالتي الزوهرة!!! أنا غير جيت نطل عليك ونشوفك واش لاباس وصآافي خاصني نمشي للدار
خالتي الزوهرة: إيوا يالله جيتي آبنتي مالك مزروبة
أنا: لا لا خاصني نمشي يالله خليتك على خير
جيت بغيت نسلم عليها وأنا نسمع الباب يتحل وحزر فزر مين ياترى؟ محبوبي وفتى أحلامي هاز الخناشي والمصروف وداخل وآاو فاش شفتو هاز الميكات كياني تقلب وتشقلب يعني حتى وهو هاز الميكة بوكوص شكون دعا لي بيه شكون والواليدة كاتدعي علي غير بالخلا بغيت غا نعرف شكون
فاش شفتو خارج رجعت جلست
خالتي الزوهرة: ماشي كنتي مزروبة آبنتي
أنا: آه؟... لا غير...آآآي كرشي وجعاتني
خالتي الزوهرة: ياك لاباس آبنتي
أنا: لا والو باس آخالتي غير المصران كايديرلي هاكا بعض المرات
خالتي الزوهرة شافت واحد النظرة غريبة وتمتمت شي حاجة ماسمعتهاش وقالت:
باقا صغيرة على المصارن أبنتي ياك بعدا ماشي شي حاجة صعيبة
أنا:لا لا آخالتي ماتخافيش صحتي بحال الحلوفة كوني هانية
مع ديك الحلوفة دخل محبوبي ناريييي تخيلو دخل لقاني كانقول على راسي حلوفة الحاصول نيت لساني خاصو القطع على قولة الواليدة
بقا قلبي كايضرب كايضرب فاش سلم علي وجلس بقا كايعاود لمو على السوق وأنا كانشوووف فيه
خالتي الزوهرة فهمات راسها وناضت وخلاتنا بوحدنا وأنا ححشمت الصراحة ماعرفت منين جاني الحيا بقيت جالسة كانتسناه يهدر معايا ولكن والو السيد فات الحيا لهيه تما هدرت أنا
عاودلي على الرباط زوينة؟
رضى:آه كبيرة وزوينة
أنا:نتا أستاذ ياك شمن مادة؟
رضى: المات
أنا:واو كانحماق على المات(أكثر مادة كنت زرقة فيها)
بديت نثرثر وسولتو على الخدمة سولتو على فين ساكن سولتو آش يعجبو ياكل سولتو آش مايعجبوش السيد بقا كايجاوب بحال يلا راه في إستجواب شوية حسيت براسي عيقت وأنا نسكت شوية كانسمع الدقان في الباب فاش حلات خالتي الزوهرة عيطات لي قاتلي صاحبتك تاتسول عليك فاش شفت مريم نارييي عرفتها الواليدة لي مصيفتاها قفآارت علي. 

أنا: مريم ؟آآآآه تكون مي موجدا الغدا وسيفطاتها تعيط علي(الغدا؟هههآآاي قولي العمود ديال الشطابة قولي السلك ديال الضو)
المهم مابغيت نفرش راسي قدام محبوبي نضت بكل هدوء أعصاب ومديت يدي وسلمت عليه وأنا كانتفرنس وكانرمش في عيني سلمت على خالتي الزوهرة وخرجت
مريم:ويلي على الفريفرة واش تي البارح لي خطبوك آش جاية كاديري هنا
أنا:أوف يا مريم لاتزيدينيش تانتي ماقدرتش نصبر ومانشوفوش أصاحبتي كانحبو فهميني عفاك زعما راكي مجربة
مريم:يعطيك حبة في اللسان وكان أنا في بلاصتو ولله لا كملت عليك
أنا:زعما راكي مطفراه مع داك خطيبك بو سنادر وكان ماشي خوتك لي كانو غايطحنوه وكان راه زهق شحال هادي
مريم:بزاف عليك عمر تايحماق علي و خمس سنيييين يالالة وحنا مع بعضياتنا مايقدرش يعيش بلا بي
أنا: تي واش كاضحكي على راسك ولا علي ولا شكون باز وصافي
المهم من تما وحنا نتناكرو حتى وصلنا الدار وبلا مانعاودلكم نفس القصة كليت لي قسم الله وسمعت الأسطوانة المشروخة دخلتها من ودن وخرجتها من الأخرى ودخلت بيتي عمرت ودني وبديت نحلم بنهار لي غادي نتجمعو أنا وحبيبي..
ماعرفتش واش غير أنا ولا ؟كاع البنات تايكونو مخلوعات من نهار عرسهم ولكن أنا بالعكس كنت مستنياه على نار ياك مافيها والو بعدا؟وشنو فيها كاع إيلا البنت كانت تسنا نهار عرسها ياك المفروض هاديك أجمل ليلة في حياتها علاش نتخلع ونخاف أصلا مريم قاتلي غير بحال الشوكة.. ويلي ويلي والله تاتقزدرت
نبدلو الموضوع حسن مايلبسونا الكري
دازو دوك الزوج سيمانات بحال عامين بالنسبة لي كنت كانبغي نهرب نطل على محبوبي ساعا الواليدة ولات طرق علي الباب بالساروت عييت نحتج عييت ندير إضرابات هددت بالإنتحار قاتلي:
وكان غاديريها نيت نتهنا من همك 4 طباسل كسكسو يقضيو الغرض
المرة الوحيدة قبل العرس لي شفت فيها رضى نهار درنا العقد ولبسنا الخواتم وعرضت علينا خالتي الزوهرة للعشا واخا هاكداك ما متعتش بيه عويناتي حيت كنا مجموعين ومّي كل مرة طلع معايا بقرصة
وصل نهار العرس داوني البنات للحمام وسط الزغارت والشطيح والرديح درت تدويشة فاعلة تاركة ورجعت للدار قاداتلي الكافورة وصايبآت لي نقشت جاو البنات وداز جو رائع وفي الليل جات النكافة وصايبت لي التكشيطة المهم تعاملت معاملة الأميرة شحال كنت فرحانة وشحال عجبني الحال
من بعد العشا جا مولاي السلطان أنا فاش شفتو كنت غانسخف تخيلو معايا كيفاش كنت مزعوطة فيه وهو هاز الميكات ديال المصروف ودابا ضارب الحطة الكوستيم بلو ماغين الكرافاط حتى هي والكوبة ديال الشعر ...قلبي الصغير لا يتحمل
دازت ديك الليلة بحال الحلم بالنسبة لي وكانت فرحتي كبيرة لدرجة خفت على راسي منها واخا ختكم هبيلة وماعندها عقل ولكن كنت مخلوعة من ديك السعادة لي كنت فيها.

 

دخلنا البيت وسط الزغارت والفرحة وأنا كنت جلست فوق ناموسيتي و قلبي كايضرب بواحد السرعة ماشي طبيعية وقد ماكنت فرحانة قد ماوليت مخلوعة بقيت خاشية راسي في الأرض ورضى كايحيد حوايجو حشمت بزاف لبس بيجامتو طلع للناموسية ونعس!
أنا مافهمت والو واش هي هادي ليلة العرس؟واش العريس كاينعس بلاما يقول حتى كلمة ويخلي العروسة حالة فهما كاتشوف فيه؟
كاع الخفة لي كانت في وكثرة الهدرة ماقدرت نقول حتى حاجة أصلا آش غانقول نقولو مالك خليتني ونعست..بدلت حوايجي ولبست حوايج النعاس مسحت كاع المكياج لي كان في وجهي ودخلت حتى أنا في الناموسية بلا مانقول حتى كلمة ديك الليلة كانت غريبة بزاف نعست فيها حدا الراجل لي كنت نتسنا النهار لي نتجمعو فيه بفارغ الصبر وملي جا حسيت راسي ناعسة بوحدي في الفراش وكأني مع خشبة
عيت نتقلب عييت ندير حركة والو كيف مانعس وعطاني ضهره بقينا هاكداك ... أنا ما تغمضوش لي العينين الليلة كاملة حتى صبح الحال داني النعاس وكاع الأفكار كايدورو في مخي حاولت نلقى الأسباب والو ماقدرتش منين ضرباتني الفيقة مالقيتوش حدايا بغيت نخرج بالزربة تفكرت راسي راني بحوايج النعاس لبست قفطاني الأبيض وخرجت كانو الناس باقيين كايدورو عندنا تما فاش شافوني بداو الزغارت أنا ماعرفت باش تبليت قربات عندي خالتي الزوهرة وسولاتني:
أمدرا كيداز داكشي؟
آه شنو.. خالتي الزوهرة بقات تشوف في وكاضحك وأنا بالزربة فهمت وقلت لي طاح لي في بالي
مزيان آخالتي الحمد لله
تما فرحات وبدات تضحك وتزغرت وأنا ربي لي عالم بي ...مشيت غسلت وقاديت حالتي ورضىى دخل للبيت فاش كنت كانقاد هدرت معاه قتليه:صباح الخير
شاف في وجاوبني:آه صباح الخير.. هز الفيستا ديالو وجا خارج ...حسيت بالخنقة واش هادا راجلي ولا كيفاش علاش كاع هاد البرود ماشي هاد شي لي كنت متخيلة! جاو دارنا جاوبو لي الفطور وسط فرحة وزغارت الكل فاش لقات مي الفرصة جراتني وسولتني نفس السؤال سبحان الله و أنا كنت موجدة راسي ليه وجاوبتها بنفس الجواب لي جاوبت بيه خالتي الزوهرة.. شوية جريت مريم معايا للبيت وهي تقول لي:
ويلي فين مدخلاني دابا يجي راجلك يبغي يدخل يلقاني هنا
أنا:راه خارج ماراهش هنا..
مريم:ونتي مالكي بنتي لي مسخسخة باينا فيك هاد الليلة بقيتي فايقة تالصباح ههههههه
أنا:أه بقيت فايقة تالصباح ولكن ماشي لي في بالك
مريم:كيفاش مافهمتش؟
أنا:راه ماوقع بيناتنا والو
مريم:كيفاش؟! وعلاش
عاودتليها كولشي وحلفتها ماتقول لحتى مخلوق تما قالت لي:آويلي ياكما يكون...
أنا:لا لا أكيد كان عيان وصافي
مريم :كيفاش عيان واش كاين شي حد ينعس في ليلة عرسه؟! لا لا هادشي في شكل ضروري تفهمي منو مالو
أنا:ماعرفت آش ندير أصاحبتي وحق الله.

 

بقيت كآتمة داكشي في قلبي أنا بنفسي ماعرفتش مني جاني هاد العقل وهاد الصبر وصل الليل قاديت حالتي وماكييت وفاش دخل نفس لي وقع في ليلة العرس!بدل حوايجو ونعس وأنا بقيت كانشوف فيه وعاودتاني ماقدرت نقول والو واش ممكن داكشي لي قاتلي مريم؟ خاصني نسول ونفهم مالو ولكن ماقدرتش نهدر ماعرفتش علاش
كانو الحوارات مابيناتنا مايفوتوش صباح الخير والسلام عليكم ومع دارهم وباقي الناس كايضحك وكايجمع عادي كانبقا غير نشوف فيه فاش كايضحك بحال إيلا ماشي هو لي كايدخل البيت يولي بحال الجماد بقينا على هاد الحال ديك السيمانة كلها في اليوم السابع قاديت حالتي كيما ديما بقيت كانتسنا فيه وفاش دخل وقفت قلت ليه : بغيت نهدر معاك
شاف في وقال:عيان بغيت نعس..
تما تعصصصصبت وتفركعت عليه لدرجة خلعتو بقا واقف وكايشوف في :
علاش كاتعاملني هاكا بغيت نفهم مالك ؟واش حنا مزوجين ولاغالطة؟ واش كاين شي راجل يخلي عروسته وينعس السيمانة الأولى من زواجهم بغيت ك تفهمني مالك !!
شاف في مزيان حتى خويت المزيودة وفرغت قلبي لي كان عامر السيمانة كاملة حيد الفيستا بكل برود أعصاب وقال: أنا هاد الزواج كله من أساسه ماكنتش باغيه
تخيلو كيفاش حسيت ديك الساعة ديك الهدرة لي قالي خلاتني نغلي ونفور ونتعصب رديت عليه : كيفاش!!!!عاود عاود؟مافهمتش
رضى:كيما سمعتي أنا الزواج ماكانش في راسي هاد الساعة ولكن النكير ديال خواتاتي والواليدة باش نتزوج هو لي خلاني نوافق داكشي علاش رجعت معاها لهاد الحومة المبهدلة وطلبات مني نختار البنت لـي بغيت ولا هي غاتخطبلي وتحطني قدام الأمر الواقع ونتي شفتك كل نهار كاتجي توقفي حدا الحيط بالساعات تتفرجي في سولت عليك فاش عرفتك باقيا صغيرة صيفت الواليدة عندك
أنا بقيت غير حالة فمي فيه وهو كايهدر كانت هادي أول مرة نسمع منو خطاب طويل عريض تما أنا زدت جعرت: حطوك قدام الأمر الواقع ؟مالك وليتي ولية وبززوك على الزواج ..ولله تاقالوها مابقا رجال في هاد الزمان
ضحك واحد الضحكة ديال السخرية وقالي:هههههه هادشي لي كنت باغي نيت وحدة صغيرة وخفيفة ندوز معاها شي شهورة ونتحجج بخفتها فاش سمعت أنا هاد الهدرة حسيت بحال يلا الدم كايطبخ في عروقي كان يقولي واحد البال غانهز الطباسل لي جاولي في الكادووات ونهرس باباهم واحد مورا الءآخر فوق راسو ولكن خسارة الطباسل في داك راس الطارو آآآآآآيه راس الطارو بعد ماكنت نقول ليه محبوبي وفتى أحلامي ولا راس الطارو بو القنانف بوزليف(بوراص بالشلحة) بردت أعصابي وقلت:بزاف عليك تادوز بي الوقت وترميني تحسابليك راني شايطة عند دارنا يا عرة الرجالة ..بعد ماقلت هاد الهدرة فكرت الزرواطة ديال مي وتفكرت الهدرة لي قالي الواليد وهي توحلي في الحلقوم.

 

ولكن لا وألف لا أنا لمياء الفنة الزوينة الحادكة(هادي غير كدبتها) أنالي كانو الخطاب يجيو يطلبوني فاش كنت في الإبتدائي(حتى هادي زعتة) يجي هاد راس الطارو يدوز بي شهرين ويرميني؟!!!والله ماحزرت
والله لا طلقت منه أما دارنا أنا عارفة لا رجعت تما كولشي غايرد في الغلط فاش كان يهدر معاي الواليد ماكنتش نسمع منو آآآآآخ يالشمتة ولكن كلو منك يامي عمري سمعت منك شي دعوة ديال الخير غا سيري الله يعطيك الخلا سيري الله يمسخك سيري يعطيك غمة ها الغمة جات بقاي لي على خاطرك...
خلاني راس الطارو كانتهاوش مع راسي ولبس بيجامته ونعس وأنا تايقول لي واحد البال غاحطي المخدة فوق راسو وبركي عليه(ختكم مهبرة شوية بصح والله تازوينة)
جلست ديك الليلة نفكر آش غاندير قد ماكنت غانسطا عليه قد ماوليت كارهاه ولا يجيني بحال شي بوبريص ناعس حدايا
يع على نيف شحال طويل وهاديك لحية لحية العنزي ودنيه مالهم كبار هاكدا بفف ماعرفت فين كنت تنشوف
بقيت تانتمعن فيه وأنا نقول:والله تاغزال...غزال ينطحك ويخرج مصارنك ألمياء واش بنيتك مازال عاجبك..المهم قررت نبدا الحرب عليه ويا بي يا بيه وعلي وعلى أعدائي والله تانخليه يطلب الشرع على ديك الهدرة لي قال
نعست ديك الليلة وكل لي في بالي الإنتقام ولا شيئ غير الإنتقام بديت نتصرف عادي نضحك نهدر ندور في الدار بحال يلا ماواقع والو ولي يسولني واش ولفت نقوله بيخييير ونبدا نعاود عليه شاحل مهلي في وزيد وزيد هو كان يستغرب ويتعجب علاش كاندير هاكا وعلاش مامشيت لدارنا وغضبت حيت ديما كان يبقا تيشوف في فاش كانضحك ونجمع مع الجميع وفاش ندخل للبيت نتغوبش وماكانكلموش أساسا واخا امعرفت آش يوقع كنت ديما مقادة مصايبة حالتي بعض المرات كايدخل كايلقاني ناعسة وفاش كايسولني على شي حاجة كانجاوبو بلا مانشوف فيه
المهم بقينا هاكا تاسالات العطلة وجا الوقت لي خاصو يرجع فيه للرباط وٱكيد حتى أنا معاه جمعت حوايجي وجدت راسي للسفر وداك النهار بكيت فيه بزآآاف وكانت هاديك أول مرة نعرف فيها قيمة الميمة ديالي
سافرت معا راس الطارو وخالتي الزوهرة لمستعمرتي الجديدة لي منها غانبدا الحرب الضارية صراحة مانكدبش عليكم عجباتني الرباط وديما كنت نحلم نمشي ليها وهاني عشت فيها كاع
مشيت للدار الجديدة لي كنت غانعيش فيها بوحدي أنا وراس الطارو هو كان كاري دار وعايش بوحدو قبل مايتزوج بي واخا مو عيات فيه مابغاش يبقى معاهم علم الله آش كان تايخدم فيها بوحدو
فاش دخلت تصدمت من مستوى العفن الدار دايرة بحال دفتر الوساخ تاع التحضيري دخلنا وماقلت حتى كلمة كنا مازال متعاديين ومانتهادروش المهم أنا بقيت غا مصدومة من كمية القاذورات زعما هادا أستاذ ولا زبال مابقيتش عارفة صدق من قال من برا الله الله ومن جوا يعلم الله
دخلت حطيت حوايجي في وسط الروينة وهو حط صاكه وعلق لا فيست وتسرح فوق ناموسيتو ونعس
وأنا بقيت كانشوف في العفن وأنا مصدومة من داك الجنس لي ناعس وبالو هاني ...شمرت على كتافي وبديت نخمل زعما مرة وحدة ربي طيح علي واحد الحداكة وواحد العزيمة باش نقي داري يمكن كنت كانتكل على الواليدة ودابا ملي وليت بوحدي خرجت حداكتي لي كانت مخبية ماعرفت فين المهم بديت نخمل ونرمي في الزبل لي لقيتها ماصالحاش نرميها قلت على الصابون وجافيل مالقيتش وأنا نخرج نقلب على الحانوت ... غاتقولو يالله واصلة لمدينة عمرك شتيها وخارجة بوحدك ماتخافوش علي ختم مرا ونص
خرجت ودغيا لقيت الحانوت تقديت لي بغيت ورجعت خليت الباب محلول ودرت فيه صندالتي باش مايتسدش
بديت حك ياما تحك وراس الطارو ناعس ماجايب للدنيا خبار. 

فقسني ونوض في العصب بداك الهدوء والنعاس ديالو بديت تانقرقب في الماعن نهز السطل ونضربه مع الأرض نحل الباب ونسدو نحل ونسد حسيت بيه كايتقلب و كايصبر راسو باش ماينوضش تما أنا زدت وبديت نغني :هي هي جايا تصفار وتخضار..هي هي طالقة السالف على ليزار ...
بقيت غادية وكانجهد حتى ناض عندي وغوت:بغيت نعرف آش كاديري ولاش كاع هاد الصداع
رديت عليه بلا مانطلع فيه عيني:كاتشوف كانقي عفنك تقول عايش في كوري
راس الطارو وهو معصب: يالالة ماقلتلكش نقي ولا ديري شي حاجة غير هنينا
أنا:شكون قالك كانخمل ونقي على حسابك ههههآاي مسكين أنا كانقي داري فين غاديا نعيش إلى الأبددددد
راس الطارو سكت وبقا غير يشوف نظرة إحباط شوية هدر وقال:منين جبتي الصابون وداك التخربيق
أنا :ولا مانطلع فيه كيما العادة:خرجت وشريتو
راس الطارو:إيمتا هادشي
أنا: فاش كنتي تشخر أراس... أراجلي العزيز
بقا تايهزز في راسو ورجع للبيت وردع الباب موراه وأنا بقيت كانضحآآاك ضحكتي الشريرة أخيرا قدرت نعصبو كملت الشقا ديالي وكملت على الغنا:سالينا سالينا من هادا الحب سالينا... المهم المزاج كان عال العال أول مرة كانشقا وأنا فرحانة
شوية شفتو لبس وخرج وأنا بقيت في الدار نكمل عملية التنظيف صراحة سخفت فاش ساليت ولكن الله على راحة حسيت بيها فاش شفت مستعمرتي نقية إيوا دابا نقدر نجاهد فيها وقلبي مرتاح جلست مسخسخة فوق الناموسية وفاش سمعت ليه كايحل الباب جيت واقفة وبديت ندير راسي بلي راني مازال نشيطة ومازال في الجهد عيط علي وقال:
آجي تغداي.. السيد خرج باش يجيب سندويش وفريت أنا كنت ميتة بالجوع ولكن كرامتي لا تسمح قتليه:
مافي ماياكل غير كول
راس الطارو:دبراسك..
أنا:تاكل فيه جغديد
راس الطارو :شنو قلتي؟
أنا:لا والو قتلك بالصحة أزماني
بقا كاياكل وأنا كانشوف فيه وكانبلع في ريقي الله يستر كلا السندويش ديالو وزاد حتى ديالي ماتقولوش لي ياك نتي لي مابغيتيش ونتي لي كرامتك فوق كرشك غانقوليكم الله يقطع للباباها الجذر كرشي فوق كل إعتبار خليته حتى خرج وأنا راقبته من السرجم حتى درق درت الصندالة في الباب وأنا نخرج للحانوت كانجري
قلت لمول الحانوت يعطيني خبزة ويديرلي فيها 2 طون و2بيضات مسلوقين و يعطيني 2 رايبييات
(لي ضحك نهجرو ليه) بقيت كانقز بحال شي واحد فيه الإسهال دارلي داك شي لي بغيت ومشيت كانجري حتى وصلت الباب جيت ندفعو وأنا نلقاه مسدود.

 

ناري على حصلة حصلتها آش غاندير دابا وكيندير حتى ندخل الدار تفكرت ديك اللعيبة لي كايديرو الشفارة في الأفلام
وحيدت واحد المساك من شعري وحليتو وبديت نخور في الباب ساعا والله لا بغا يتحل
قررت نجلس في الأرض ونتسنى راس الطارو حتا يجي ونقوليه شي كذبة مثلا خرجت نشطب حدا الباب ولكن تفكرت هديك الخبزة لي في يدي
موشكيييلة ويجي يشوفها عندي قررت نضربها تما بالزربة ونرمي الميكة توكلت على الله وبديت سرط ياما تسرط كل شدg قد راسي حتى مشا يوحلي وبديت نكح وهو يتحل الباب و أنا مدابزا مع داك الخبز باش يدوز وراس الطارو واقف على راسي
آش كاديري نتي هنا؟
أنا وفمي عامر بالخبز:آه؟
شفت فيه وشفت في داك الخير لي في يدي و أنا نسد عيني بالفقسة والإحراج جمعت داكشي بالزربة ودخلت كانجري وسديت علي باب البيت
وآآآآاع علاش آزهري علاش فاش جابلي السندويش وعرض علي قلت ليه مافي ماياكل ودابا شافني جالسة في عتبة الباب بحال السعاية خاشيا راسي في الخبزة و2 رابيات حدايا علاش علآآاش...بقيت كانتغدد مع راسي في البيت و مازال باقي لي نص خبزة قلت مع راسي ماعندو ماينفعني الندم نكمل ديك النص خبزة حرام النعمة ضيع ومن بعد ندم على خاطري
ساليت الماكلة وخرجت من البيت حادرة راسي لقيتو كايتفرج في الصالون تما هدر وقالي:
ياك مافيكش الجوع
بقيت ساكتة ومارديتش عليه وزاد:نوض نزيدلك شي خبزة أخرى هههههههههه
بقا يضحاك وأنا بديت نتغدد وناكل في راسي غبية آلمياء غبيييية كيفاش عطيتيه الفرصة يضحك عليك
شوية رجع تاني هدر وقال: هاهو الساروت فوق الطبلة خليه عندك لوكان ماكنتش هنا وكان بتي في الزنقة
أنا الصراحة مارضييييتش ومابغيتش نهزو حتى ناض دخل لللبيت وأنا نمشي نهزو
قلت مع راسي:ماعليش ألمياء هادي غير معركة وخسرتيها مازال الطريق طويلة قدامك باش تخرجي لباباه العينين ...
فاش دخلت ولقيتو ناعس بقيت نفكر شحال نعاسو خفيف وغير يحط راسو على المخدة أكيد راس الطارو ماعندو لاش يخمم كيتي أنا لي بليت راسي بواحد ماباغنيش.

 

نعست وفقت داك الصباح مع التسعة ومالقيتوش حدايا دخلت للكوزينة لقيت البراد ديال آتاي فوق الطبلة وتفكرت أنه بدا الخدمة اليوم قلبت في حوايجو ولقيت استعمال الزمان وعرفت الأوقات فاش يخدم وفاش مايخدمش
بديت كانخمل في الكوزينة حليت الثلاجة ولقيتها عامرة ماكلة إيمتا جاب كاع هاد الشي وصايبو في الثلاجة بديت نبتاسم مع راسي حيت عجبني الحال وأنا نتفكر تاني الكلام لي قالي
تي فيقي ألمياء عمر ليك الثلاجة بالسريط صافي بغيتي تزعطي فيه عاوتاني يالجيعانة
فطرت وجمعت كولشي وجلست نرتاح وجاني قنط كبير عييت نقلب فاش نلتاهى والو بديت نخمم شنو نوجد للغدا خاص فاش يجي راس الطارو يكون موجود مستحيل نخليله الفرصة باش يتهنا مني
واخا كان جابلي المصروف ولكن الخضرة ماكانتش عندي ولكن بطبيعة الحال ختكم ماينخافش عليها خرجت سولت مول الحانوت ودلني على واحد السويقة قريبة بزاف مشيت وبدوك الفلوس لي كانو عندي قضيت بيهم وتقديت خضيرة وحوت رجعت للدار نقيت ديك الحوتة قلبت على شي طاجين مالقيتش وأنا نجبد مقلات ونصبت فيها طاجيني تخيلو شحال كنت فرحانة وفخورة براسي ملي درت كاع هادشي بلا مساعدة أي واحد أييه راني خفيفة وليني حتى مخي خفيف
ريحة الطاجين ياسلام قالبة الدار وأنا جالسة متربعة على عرش مملكتي حسيت راسي ربة بيت ديال بصاح وجد الطاجين وبقيت كانتسنا راس الطارو يرجع وديت نتخيل ردة فعله فاش يلقا الغدا موجود
دازت الوحدة وماجاش مع ذلك بقيت كانتسنا دازت الزوج الثلاثة وحتى الربعة والو ماجاش.. حسيت بمصارني كايتقطعو بالجوع ولكن حلفت ماناكل حتى يجي مابغيتش نخسر منظر أول طاجين نديرو وجا غزال خاصو يشوفو ويعترف بحداكتي .. داني النعاس وأنا كانتسنا فاش سمعت للباب تحل فقت ولقيت الدنيا مظلمة شفت فيه وسولتو: علاش تعطلت وعلاش ماجيتش تغدى شحال تسنيت فيك ماحسيت براسي حتى خرجت دوك الكلمات ماعرفت منين جاوني هو بقا مستغرب من أسئلتي وبقا يشوف في ودخل للبيت وهو تيقول:أنا ماكاناكلش في الدار ماتبقايش تسنايني فاش قالي هاكا حسيت بالإحباط وحبست الدموع بزز مني حاولت نكتم أعصابي ماقدرتش ودخلت عليه للبيت وهو كان تيبدل وبديت كانغوت عليه:شكون يحسابلك راسك كاع باش تعاملني بحال هاكدا
رضى: علاش كيفاش عاملتك.. زعما على الغدا ملي مارجعتش للدار؟أنا قتليك من الأول هاد الزواج ماكنتش باغيه واش ماكاتفهميش ؟!إيلا ماعجبكش الحال هزي حوايجك ورجعي داركم
أنا ماقدرتش نزيد نهدر تبلوكيت حيت عرفت عندو الحق هو قالهالي ولكن أنا لي قررت نلصق فيه فاش خرجت جلست في الصالون بقيت كانفر في كلام جدة الله يرحمها فاش قالتلي واحد النهار :سمعيني يابنتي وهاد الزوج كلمات بغيتك ديريهم حلقات في ودنيك الزين يابنتي مايدوم لايغرك الذهب البراق شحال من ذهب يغوي في شوفتو وهو غير نحاس مشلل.. الذهب يابنتي هو لي يصبر على الزمان وشحال ماطول معاك وتهليتي فيه تزيد قيمته حيت طول عمره غايبقا ذهب حر ...
ديك الساعة ماكنتش نفهم كلام جدة كان يجيني غير خزعبلات من الزهايمر لي كان فيها ولكن دابا وليت فاهمة كل كلمة وفهمت المعنى من بحال يلا كانت عارفة شنو غايوقع لي.

 

حسيت براسي بغيت نبكي لأول مرة حتى فاش قالي في الأول أنا تزوجتك بزز ماجانيش هاد الإحساس ديال الإحباط يمكن اليوم حيت درت مجهود على غير عادتي وصايبت طاجين لأول مرة..آه الطاجين نسيتو
نضت كانجري للكوزينة سخنتو وخرجتو للصالون وجلست جبد ياما تجبد وأنا نتبنن في ديك الحوتة بووووحدي
شكون هاد رضى كاع باش نجوع راسي على قبلو غير راس الطارو لهلا يوكل باباه أنا بغيتله الإسهال إنشاء الله في ديك الماكلة لي راه ياكل على برا لا الإسهال ماشي شي حاجة بغيتلو إنفلونزا العصافير يا رب آمين
بالغدايد لي كانو في بقيت ناكل ناكل حتى لقيت المقلاة خوات وأنا ضرتبها بوحدي خرج باش يمشي للطواليت وشاف في واحد النظرة بحال لا كايشوف في شي ضبع 6 شهور ماكلا ولقا حولي محمر ومشا أنا ساليت وجمعت الماعن وغسلتهم بالزعاف وأنا معصصصبة وكرشي كاتوجعنيييي من الطاجين لي ضربت بوحدي ودخلت نعس وكيما ديما راس الطارو كان نعس
دخلت تانا تخشيت في الناموسية وماقدرتش نعس بقيت نتقلب حيت نيت وجعاتني كرشي وتقلت علي بزاف
بقيت هاكداك وراس الطارو ولله ماتحرك ولا فاق حتى نضت للطواليت ورديت كولشي حسيت الروح بغات تخرج مني فاش ساليت لقيتو ناض وسولني:مالكي واش مريضة؟
أنا مارديتش عليه وتما شدني من يدي وقال:هدرت معاك جاوبيني أكثر نوع كانكرهو هو لي كايتجاهل هدرتي
هزيت فيه عيني وحيدت يدو لي كان شاد بيها يدي:وأنا أكثر نوع كانكرهو هو لي المنافق لي كايتخبا مورا بنت باش يتهرب من مسؤولياتو خليتو واقف هاكداك ودخلت تكمشت في فراشي وهو يدخل هز المخدة ديالو وخرج ردع الباب حتى تزعزت البيت ومشا ينعس في الصالون
أنا:سير أراس الطارو درتي في خير أصلا تما خاصك تنعس لاش مزاحم معايا هنا
ملي رديت حسيت بالراحة داني النعاس مافقت تاصبح الحال فاش سمعت صوت الساعة تفكرت بلي عمرتها البارح باش نوض نوجدلو الفطور وقلت مع راسي شمن فطور ديري نعسي نعسي الله يهديك
فكرت شوية وماعرفتش شنو ليخلاني نوض نضت بزز علي وجدت ليه الفطور وعمرت ليه آتاي وخرجت لقيتو بغا يدخل للكوزينة قلت ليه:ماعرفتش باش كاتفطر واش القهوة ولا آتاي أنا عمرتهم بزوج شرب لي بغيت وأنا غانشرب لاخر خليتو ورجعت البيت كملت على نعاسي فاش فقت دخلت للكوزينة لقيتو فطر وكتبلي ورقة حطهالي كتبلي فيها:هادا هو رقمي قيديه عندك
استغربت علاش زعما عطاني نمرته من نهار تزوجنا وهو يتجاهلني علاش دابا؟!

 

علاش زعما خلالي نمرتو؟أوووف شحال وليت نحلل ونفكر بزاف خلاها وصافي .. لا لا فكرو معايا علاش زعما؟علاش؟علاش؟ علآآآش؟
خملت الدار وأنا نفكر علاش حسيت بالقنطة فاش ساليت عاودتاني مالقيت ماندير حليت باب الدار و وقفت فيها و بديت نطل على الغادي والبادي شوية شفت واحد البنت جاية وكاتحل في الدار لي حدانا بتاسمت لي وسلمات علي وسولاتني:واش نتي هي مرات الأستاذ
أنا:آه أنا مرت راس الطارو
هي:شنو؟
أنا:قتليك آه زعما أنا مرات الأستاذ رضى
هي:مبروك عليك أختي كانت قالت لينا خالتي الزوهرة بلي غاتمشي تخطبله من بلادهم..أنا سميتي إيمان ونتي؟
أنا:أنا سميتي لمياء
متشرفين الزين شحال في عمرك لمياء جيتيني صغيرة
أنا:18 علاين ندخل 19
واو حتى أنا 18 سعداتك تزوجتي وتهنيتي من القراية أنا ولله ماكرهت نتزوج ونتهنى
أنا: شمن زواجه وشمن هنا الله يهديك كملي قرايتك آختي وعيشي حياتك حسن ماتندمي
إيمان:علاش آحبيبة ماعجبكش الزواج
أنا:آه؟ لا زعما بغيت نقولك مسؤوولية الزواج صعيبة بزاف
بقينا كانهدرو بحال يلا كنا صحابات من مدة طويلة أنا فرحت بزاف حيت لقيت معامن نتوانس ونهدر مرة مرة
بقات الحالة ديالنا هاكداك أنا وراس الطارو ماكان حتى تقدم في علاقتنا مانكدبش كان تيجيب لي المصروف ماكانت تخصني حتى حاجة وكان تيخلي الفلوس في الماريو ويقولي نهز منهوم لا حتاجيت في هاد المدة ماكانش يرجع للدار نهائيا كان يخرج للخدمة الصباح ومايرجع حتى للعشية وفي الويكيند مايفيقش حتى يقرب الظهر ويخرج أنا كنت نقنط بزاف بوحدي ولولا إيمان لي كانت تجي لعندي كون راني تسطيت كنا كانهدرو بالساعات بحكم الأعمار ديالنا متقاربة كنا نتافقو بزآآآف
واحد النهار في الويكيند عرضات علي إيمان نخرجو نتساراو وتوريني المدينة وأنا فرحت وتحمست بزاف
فاش ناض هدرت معاه وقلت ليه:إيمان بنت جيرانا عرضت علي نخرجو ندورو واش نمشي؟
راس الطارو:علاش كاتسوليني سيري فين مابغيتي نتي حرة...
أنا:حرة؟ إذن نبقى نخرج إيمتا مابغيت بلا مانقولك؟
سكت شوية وقال:آه ...
أنا:واخا مزيان بزاف كاع شكرا
راس الطارو: العفو..
خليتو هاكداك ومشيت دخلت وجدت راسي باش نخرج لبست وقاديت شعري مزيان ودرت ماكياج وخرجت وهو كايخنزر في وحتى أنا خنزرت فيه لبست الطالون ديالي بدي نعوج في المشية وردعت الباب ومشيت لقيت إيمان كاتسناني حدا الباب
مشينا وقررت داك النهار نستمتع بالخرجة ومانخممش كاع في داك راس الطارو خداتني إيمان لشي بلايص واعرين وشي محلات فيهوم حوايج يحمقو دوزنا النهار كاندورو وفاش جانا الجوع جلسنا كلينا بانيني شحال جاني بنين وزوين المهم الخرجة كانت من أروع مايكون شوية وحنا نتمشاو دزنا حدا واحد القهوة شيك بزاف وغزالة وحنا دايزين شفت راس الطارو نازل من الطوموبيل ومعاه بنت زوينة بزاف وطويلة ودخلو لديك القهوة أنا بقيت مصدومة جريت مورايا إيمان وتبعتهم ودخلت وشفته جالس وكايضحك معاها بواحد الطريقة عمري شفتو كايضحك بيها تما عرفت علاش كايتعامل معايا بداك البرود.

 

بقيت كانشوف فيه هاكداك وحتى إيمان شافتت وقالت:ماشي هاداك هو الأستاذ؟وشكون هاديك لي معاه؟ شوية عاقت وبدات تشوف في وقالت:يالله ألمياء نمشيو تكون غير شي زميلته في الخدمة
أنا تسمرت ومابغيتش نتحرك شوية بدا يعيط على السرباي وشافني تما عينينا تلاقاو شاف في مزيان ودار راسو ماشافنيش وكمل هدرتو وضحكو مع ديك البنت
جراتني إيمان وبزز باش خرجاتني وأنا كنت في صدمة حاولت تهدر معايا وتقولي ماتسرعيش بلا ماتعرفي شنو كاين ولكن أنا لي كنت عارفاه النظرة لي كانت فوجه عمرني شفتها
طلبت من إيمان تسمحلي وشديت تاكسي رجعت فيه للدار جلست تنستناه حتى رجع معطل كيما ديما ملي دخل دار راسو بحال لا ماعارف والو جا يدخل للبيت وأنا نوقف ليه في الطريق
أناشكون هاديك
رضى حيدي خليني ندخل نرتاح
أنا سولتك شكون هاديك لي كنتي معاها
حازني و مشا بغا يدخل للبيت وأنا نجري سديتها بالساروت وشديتو في يدي تما حسيت بيه تعصب
أنا:ماغاديش تخليني كيما ديما واقفة بلا مانفهم فهمني ولا والله لا عطيتك المفتاح
رضى:هاديك حياتي الشخصية ماشي سوقك فيها
أنا:كيفاش حياتك الشخصية !!أنا مراتك بغيتي ولا كرهتي وخاصك تحتارمني واخا ماكتاملش الزواج ديالنا ولكن حنا مزوجين على سنة الله ورسوله وأنا بغيت نعرف آش كايوقع
رضى تعصب و بدا يغوت في وجهي:بغيتي تعرفي آش واقع ؟!!!واخا الالة أنا نفهمك هاديك أستاذة خدامة معايا وبغيتها بزاف ولكن مطلقة وعندها ولد مانقدرش نتزوج بيها ونظلمها من بعد
أنا:شنو؟!!!! ماتقدرش تزوج بيها وتظلمها !!!وأنا ؟؟؟ ماعليش ؟؟طمعني وتصدمني بعد ما بغيتك من قلبي لا بعد ماكنت غانتسطى عليك!!! عرفتي نتا أكبر منافق عرفتو في حياتي..كانكرهك بزاف ومانحملش نعاود نشوف وجهك
رميت ليه المفتاح في الأرض دفعتو ودخلت للطواليت سديت علي من الداخل وجلست كانبكي بحال يلا عمري بكيت في حياتي حسيت راسي غايطرطق علي ندمت على النهار لي جمعت فيه حوايجي وتبعت إنسان ماباغينيش لمدينة لا حنين فيها ولا رحيم فكرت نهدر مع خالتي الزوهرة ولكن ماعرفتش آش غانقول ليها ...فكرت نجمع حوايجي ونزيد لأي بلاصة المهم مانبقاش جالسة...بكيت حتى عييت وخرجت دخلت للبيت ونعست وعيني ماكانوش ينشفو وكملت الليلة وبأنا ندمع بصمت
كيفاش حياتي ولات بهاد التعاسة علاش آربي تنبلا برجل كايبغي بنت أخرى وأنا الطرف الثالث في هاد العلاقة عييت من التفكير ولكن مالقيتش الحل وقررت نخلي الأمور على حالها
الصباح صاوبت الفطور كيما ديما رجعت نعست ومافقتش بكري حالتي كانت حالة شعري مشعكك وعيني منفوخين وماقدرت نحرك والو في الدار رجعت تكمشت في بلاصتي شوية نسمع الباب تحلات وشي صوت ديال التخرشيش والميكات في الكوزينة بديت كانتصنت عرفت بلي هاداك صوت حركة رضى دخل علي البيت وأنا خشيت راسي كله تحت الكاشة حيد الكاشة على وجهي وحط يدو على جبهتي وقال:واش مريضة؟
أنا تفاجأت أول مرة يلمسني شفت فيه وقلت :لا..
رضى :إيوا نوضي أنا جبت الغدا من برا طايب وماتقوليش لي مافي ماناكل وتخرجي تجيبي الخبز والطون
مشا وخلاني مازال مافقت من ديك الصدمة لي كنت فيها.

 

مافهمتش مالو تغير هاكا في ليلة وحدة شهر كمل عمرو رجع يتغدى في الدار شنو زعما دابا بقيت فيه فاش حصلتو مع صاحبتو؟ دابا كيندير واش نتصرف معاه عادي ولا كيفاش؟شنو غاديرو وكان كنتو في بلاصتي زعما واش تزيدو تشعلو العافية وتحيحو ولا تحاولو تحلو الأمور غي بلاتي؟
نضت بالزربة مشطت شعكاكتي وبدلت بيجامتي درت ريحة حيت كنت تاندوخ بريحة النعاس دخلت للكوزينة لقيتو كايحط الغدا في الطباسل وكايصايب شلادة بقيت كانحك في عيني وكانقول مع راسي هادا مالو آش كايدير ماهدرتش معاه مازال معصبة ومصدومة من البارح خدا داكشي حطو فوق الطبلة وأنا بقيت واقفة حتى قالي: لآش واقفة تاتسناي آجي تغداي
أنا ماقدرتش هاد المرة نحبس جنوني حيت هادا دجاج محمر ولايعوض بالخبز والطون عفطت على كرامتي وبركت على باباها وجلست كاناكل معاه بهدوء وبلا حتى كلمة سالينا وجيت نوض نجمع الماعن وقالي :غير جلسي أنا غانجمعهم ... أنا ديك الساعة مانكدبش عليكم تبورش لحمي تقولو هزيتو راس الطارو وحطيتو راس طارو آاخر
ماعلينا خليتو يجمع داكشي ودخلت درت راسي مسخسخة وتكمشت في بلاصتي فاش سالا دخل عندي وقالي :أنا غادي للخدمة إيلا حسيتي راسك عيانة عيطي على مي تجي عندك بينما ساليت الخدمة بسلامة.. فاش قالي هاكا أنا تزعزت أول مرة يقولي بسلامة وهو خارج زعما تبدل بزاف بعد ما انفجرت عليه البارح وكان يحسابلي هاكا وكان درتها شحال هادي
المهم قررت ماندير والو هاد الساعة وندير راسي ماكاين حتى حاجة ونتبعو الكذاب حتى لباب الدار
مشيت للكوزينة نشوف آش دار لقيت عرام الماعن في لافابو والروينة
تررررررر على سيري ترتاحي أنا غانجمع هادا هو الجميع
عريت على كتافي وخملت الكوزينة وحتى الدار كانت مقلوبة خملتها..شوية كانسمع الدقان في الباب لقيت خالتي الزوهرة جات طل علي عمرت آتاي وجلسنا كانهدرو قالت لي بلي رضى هو لي مصيفتها وقالها راني عيانة ضحكت وقلت ليها بلي والو غير عيا بسيط هدرات وقالت:ياكمآا تما شي حاجة
أنا:بحالاش أخالتي
خالتي الزوهرة:شي مومو شي نونو شي كتكوت
أنا: شمن مومو خالتي والله مافهمتك
خالتي الزوهرة:أاويلي مالكي مخك ثقيل زعما واش ماحاملاش
أنا:إيييييييه ههههه يالله فهمت ...
خالتي الزوهرة:إيوا
أنا:إيوا شنو
خالتي الزوهرة:واش بغيتي تفقسيني واش ماحاملاش آوعدي ومكتوبي
أنا: لا خالتي مازال ماكتاب ههيي....
خالتي الزوهرة: ممم تحسابلي.. وعدناك وياك تاكلي شي فانيد
أنا:الله ياودي ياخلتي لا توصي حريص
سالينا داك الكويس ديال آتاي وهي تنوض حمدت الله وشكرتو ... فاش بغات تخرج قالت لي :آه نسيت نقولك غدا معروضين للعشا عند شي ناس وقالولي جيبي عروستك معاك رضى قلتهاليه مابغاش يمشي قالي مشغول المهم نتي عاودي قوليهالو بغا يجي مزيان مابغاش آجي غير نتي عندي للدار ونديك معايا واخا؟
أنا: صافي خالتي كوني هانية.

 

فاش دخل في العشية لقاني جالسة في الصالون سلم علي وقالي: اليوم ماكليت والو على برا وفي الجوع يلا ممكن توجدي لي شي حاجة
أنا:علاه ماعرضتش على صاحبتك الأستاذة للعشا
شاف في مزيان وماقال والو ودخل لبيت أنا ماعرفتش علاش بقا في الحال ملي قتلو ديك الهدرة زعما هو الخائن والمخادع زعما علاش مافرحتش وأنا كانقولو هاكا...
مشيت للكوزينة وطيبت ليه العشا دقيت عليه باب البيت ودخلت لقيتو ناعس أووووف هلكني قتلني بالنعاس ديالو بغيت نخليه ناعس ولكن هو قالي في الجوع بقا في نخليه بايت بلا ماكلة ماعرفتش دابا واش كانكرهو ولا نبغيه ولكن لي عارفا ومتأكدة منو أنه فاش تايكون ناعس كايعجبني بزاف نشوف فيه حاولت نفيقو
رضى..رضى نوض تعشى
فاق مخلوع وشد لي في يدي
أنا: باسم الله مالك كنت تحلم؟
رضى:آه.. هاناي نايض غير سيري ..
خرجت وفاش ناض تاهو جا يتعشى تعشينا بزوج شوية بغا يفتح معايا حوار
كيدوزتي النهار اليوم
أنا:كيغادي يدوز زعما بحال خوتو..
رضى: ماخرجتيش؟
أنا :لا..
تقلبت الأمور من بعد ماكنت أنا لي نعصر منو الهدرة ولا هو كايحاول يعصرها مني
رضى :ماجاتش الواليدة اليوم؟
أنا:آه جات..حقا قالت لي بلي راحنا معروضين
رضى:أنا ماغاديش ماكانحملش دوك الناس
أنا:علاش؟
رضى: معيقين..
أنا:المهم دبراسك أنا غاديا..
رضى:معامن غادية ياك قتليك أنا ماغاديش
أنا:داك النهار قلتي لي نتي حرة عقلتي ياك؟ إيوا سيدي أنا حرة يلا نتا مامشيتش ماشي معناتو أنا ماخاصنيش نمشي
بقا ساكت شوية وهو ينوض بلا مايكمل العشا ومشا هز البيسي للصالون وبدا يخدم
حسيت بيه بحال يلا تكهرب ولا وجهو في شكل فاش قتليه هاد الهدرة أنا جمعت الكوزينة ومشيت جلست حداه شعلت التلفازة وبديت نضحآآاك مع الفيلم وهو مرة مرة كايخنزر فيا في الآخر طفا البيسي وناض بالزعاف للبيت.

 

في الغد صاوبتلو الفطرو كيما ديما ورجعت نعست فاش فقت لقيتو مافطرش راس الطارو غضب على الفطور
ومالو هادا تاني وعلاش غايتقلق ياك ماقلت حتى عيب هو لي قالي نتي حرة ياك بعدا؟
المهم داك النهار كنت عارفاه مايرجعش للغدا زعما راه غضبان ومعصب مشيت كانوجد راسي باش نمشي عند خالتي الزوهره
دوشت ودرت بغوشينك قاديت راسي لبست كسوة طويلة وخفيفة كمامها قصار ودرت ماكياج كيما موالفه بديت كانوجد راسي وهو يدخل راس الطارو
فاش شافني كانماكيي وكانقاد راسي شاف في حيد لافيست ولاحها فوق الناموسيه دخل الكوزينة مالقا والو جا لعندي وقال: واش ماكانش الغدا؟
أنا كانسالي المكياج ديالي :مادرت والو كايحسابلي ماراجعش
راس الطارو حسيت بيه ماعاجبوش الحال المهم أنا تجاهلتو وماديتهاش كاع فيه وكانقول مع راسي
هاكا ألمياء فقسي لي العديان ...خرجت لبست الصباط وهزيت الصاك وهو كان في الصالون قلتليه:
هانا غادية
ناض وقف وقال:واش من دابا راه مازال غير الزوج
أنا:ماعليش نمشي نضرب دورة في المدينة عاد ندوز عند خالتي الزوهرة
تما حسيت بيه بحال إيلا تزنك وتعصب وزاد قال:واش ما عندك ماتلبسي غير داكشي وداك المكياج مسحيه راه معيق
أنا:مالو لبسي كيجاك أولا أنا ديما كانلبس هاكدا ثانيا أنا حرة ثالثا ماعندكش الحق تحاسبني وتحكم في
راس الطارو:كيفاش ماعنديش الحق واش نسيتي راسك آلالة راه راجلك أنا!!!!!
أنا: صراحة ماقدرتش نفهمك مرة تقولي هاد الزواج ماكنتيش باغيه مرة تقولي مادخليش في حياتي الشخصية ومرة نتي حرة سيري فين بغيتي وديري لي بغيتي دابا كاتقول لي أنا راجلك والله تاتلفتني!
تما بقا ساكت وحسيت راسي حشرتو بحال شي طوبة في القنت أححح يا راس الطارو إيلا مامرمدتكش مانكونش أنا لمياء الفريفرة
شوية وهدر: نتي مراتي قدام الناس وصافي وخاصنا نبانو متفاهمين و..
أنا: علاش خاصنا نبانو متفاهمين ياك نت باغي دوز معايا شهرين وطلقني علاش باغي الناس يشوفونا فرحانين؟
راس الطارو:عرفتي شنو نتي راكي أعجب خليقة شفتها في حياتي ومافي مانزيد نعصب راسي في نقاش عقيم معاك
دخلل للبيت وسد عليه الباب وأنا نسمع شي حاجة تضرب مع الأرض من كثرة ماعصبتو ماعرفتش فاش برد غدايدو أنا فاش تانعصبو كانفرحح ونحس براسي قدرت نحرك فيه شي مشاعر ولو كان الغضب ماشي مهم
بديت كانغني وأنا خارجة وفرحانة ومشيت ديريكت لدار خالتي الزوهرة ومامشيتش كاندور كيما قلت لو بقيت جالسة معاهم حتى العشية ومشينا عند دوك الناس فاش دخلت تبهرت بديك الدار لي عندهم باينة لاباس عليهم سولت خالتي الزوهرة كيف تايجيوها قالتلي بلي مولات الدار بنت خالة أمها وعزيزة عليها
دخلنا سلمنا وداكشي كان مخلط عندهم رجال وعيالات زعما عادي بقيت أنا جالسة شويا سولاتني مولات الدار:فين هو رضى أبنتي ؟
أنا:آه؟ رضى.. ما..
ماجيت نكمل الهدرة وأنا نسمع الصوت ديالو في الباب كايسلم. 

تصدمت فاش هو قالي بلي ماكايحملش دوك الناس علاش جا المهم سلم على آلجميع وجلس حدا الحاج مول الدار كيما قلتلكم جلسنا مجموعين الرجال والعيالات واكولشي كان تايجمع وحتى أنا أكيد مابقيتش ساكتة جمعت وضحكت مع الجميع وراس الطارو حاضيني واحد ولدهم هدر وقال :خالتي الزوهرة منين دبرتي على هاد العروسة دمها شحال خفيف هههههه قولي آختي لمياء ماعندكش شي ختك بحالك هاكا زوينة وضحوكية هههههه بقيت كانضحك وعجبني الحال أما راس الطارو مانعاودش ليكم بدا يتقلا ويتشوا حطولنا العشا وختكم فاش شافت البساطل والمشوي والمحمر عيني بداو يدورو وبقيت كاناكل بحال لا عمري شفت النعمة وهو بقا غير حال فمو في
سالينا العشا وجاو يحطولينا الديسير يمميي تارت كلاصي واعرة بالشكلاط والكركاع وهو ينوض راس الطارو راس البرمة راس البالة بقيت لي يفقلو بيها إنشاء الله
يالله خليتكم على خير
الحاج:جلس آولدي مازال ماسالينا العشا
راس الطارو:لا الحاج غدا عندي الخدمة بكري ضروري نمشي.. المهم عياو فيه والو مابغاش يريح وإنا حالة فمي في لا كلاص وأنا نسمع
نوضي نمشيو ألمياء..
أنا مازال تانشوف في لاكلاص :آه؟فين نمشيو؟
راس الطارو: لدارنا أحبيبة فين غانمشيو
أنا مالقيت مانقول بقيت تانشوف فيه وفي لا كلاص والبشر لي جالس كايشوفو في ...في الأخير مالقيت ماندير هزيت الصاك سلمت عليهم وخرجت معاه..
طلعت معاه للطوموبيل وردعت الباب ودرت السطمة وأنا مغوبشة دخل ديمارا الطوموبيل وقال: مالكي ؟عجبك الحال تما ياك
أنا:آه عجبني وبزاف ومن بعد
راس الطارو : مزيان تبارك الله خليتي كولشي حال فيك فمو الضحك والتجماع تقول راكي باقا درية صغيرة
أنا: آه درية وكنتي عارف عقلي عقل الدراري من النهار الأول داك شي لي قلتي لي ونتا لي بغيتني هاكا باش ...
في ديك اللحضة حبس الطوموبيل على جنب الطريق وبدا يغوت علي حتى خلعني عمري ماشفتو معصب بحال هاكا
صافي!!!!باراكا!!!ماتبقايش كل نهار تعاوديلي نفس الهدرا!!! قلتلي قلتلي صافي نساي شنو قلتلك ومحيه من مخك!!!
أنا ماقلت والو بقيت ساكتة شوية رجع ديمارا الطوموبيل ومشينا الدار
مقدرتش نزيد نهدر صراحة مانكدبش عليكم أول مرة نحس بالخوف ونحس راسي محكومة من راجلي زعما باز لي راجلها عاطيها الحرية المطلقة الله يعز الحكام كاتحسي براسك مهمة
دخلنا للدار في واحد الجو مكهررررب أنا مشيت بدلت حوايجي في الحمام وهو في البيت دخلت لقيتو لابس بيجامتو وجالس فوق الناموسية جاني عجب مالقيتوش ناعس كيما ديما دخلت في بلاصتي وهو هدر وقال:سمحيلي...
وهز المخدة والكاشا وخرج للصالون.

 

آآآه على ديك سمحيلي شحال خرجات من فم محبوبي وفتى أحلامي حلوة آآآآيه فتى أحلامي ولي نسمعها تعايرو لي ولا تقول علي راس الطارو نتفها قالك المثل أدعي على ولدي وأكره لي يقول آمين
ولكن علآآش أفتى أحلامي تمش تنعس في الصالون علآآش
فرحت بزاف وحسيت راسي مزوجة ورجعت كانحماق عليه نضت بقت كانطل من باب البيت وأنا كانشوف فيه
الله على محبوبي شحال غزال و...قولو تبارك الله ونتوما مخرجين في عينيكم
دخلت سديت الباب ونعست وأنا فرحانة والفراشات ترفرف في معدتي ...لا واقيلا غير الكاز ديال العشا المضخم هاداك
فقت الصباح وجدت الفطور وتسنيتو حتى خرج وجلست نفطر معاه فطرنا في هدوء شوية بغيت نكسر داك الصمت وقلتلو:اليوم ترجع تغدى؟
محبوبي: يمكن..
أنا حطيت الكاس ديال آتاي وعوجت فمي عليه وهو يقول :غادي نرجع ولكن شنو غاطيبي
أنا:بصاح؟
محبوبي:آه بصاح هههه
أنا:ممم خليلي الفلوس ولا عليك غندير ليك غدا معتبر
محبوبي:واخا هزي لي خاصك راهوم في بلاصتهم كيما ديما..يالله بسلامة خاصني نمشي
نضت معاه ووصلتو للباب وأنا كانتفرنس عليه المهم مارجعتش داك النهار نعس خملت وخرجت نتقدى ودرت بحال شي نحلة من زهرة لزهرة تقديت كاع لي خاصني خديت طاجين تاهو ورجعت للدار وأنا كانغني:
وقتاش تغني يا قلبي إيلا مآغنيتيش اليوم
صايب لمحبوبي أحلى طاجين لحم بالبرقوق ومشيت تقزبت وتعكرت وتعطرت وجلست كانتسنى فيه يجي
حليت البيسي بقيت كانتلاها فيه وأنا نقرا واحد الموضوع سميتو(كيف تجعلين كبورك يطيح على زنافره) وهادا ماكنا نبغي دخلت وقريت داكشي كآآامل وحفظته عن ظهر قلب واخا كنت زرقة في القراية ولكن هادشي دغيا حفضتو قولو سبحان الله
عجباتني واحد القضية ديال لبسي قاميجتو وملي يدخل قوليلو توحشت ريحتك وأنا نقول هي لوولى
مشيت جبت واحد القاميجة بيضا عجباتني ولبستها وهو يدخل فاش نضت نسلم عليه شاف في شوفة في شكل وبدا يضحآآآآك هدرت أنا وقلت:مالك كاضحك ياك لاباس
راسو الطارو(ششش تاوحدة ماتهدر):لا والو غير جيتيني في شكل مع نتي قصيرة تفكرت واحد الفرملية طبوزة في السبيطار
أنا:فرملية طبوزة؟!! بقيت كانشوف فيه هاكداك ودخلت بالزعاف حيدتها ولبست بيجامتي وخرجت وأنا مانقشعش قدامي
محبوبي:ياكما عصبتك راه والله ماقصدت
أنا:شمن ماقصدتش ونتا تشبهني بفرملية طبوزة وقصيرة
محبوبي وهو شابع ضحك: لا ولله حتى نتي زوينة عليها شوية ههههههههههه
جلسنا نتغداو وهو كايضحك وراشقا ليه وأنا منفوخة وبغيت نطرطق. 

محبوبي تغدا معايا وهو فرحان بزاف وكايضحك واخا مانجحتش خطة الإغراء المهم فرحتو ماشي مشكيل فاش سالينا الغدا وجمعت الماعن قالي: لبسي نخرجو اليوم عندي العشية خاوية
أنا:بصاح؟
محبوبي:واش نتي لي نقولك عليها تقولي لي بصاح سيري تلبسي قتلك
أنا:واخا سمعا وطاعة مشيت كانفرفر وخليتو كايضحك مع راسو في الصالون لبست وقاديت الحطة وخرجت لقيتو كايتسناني شاف في وقرب مني تزنكت نحساب راسي بهرتو بجمالي وماعرفت آش غايدير ساعا جبد كلينيكس من جيبو ومسح لي الماكياج من وجهي
كانقولك ماتبقايش ديري كاع هاد المكياج راه معيق وسيري لبسي شي قاميجة ولا شي حاجة فوق هادشي مانحملش نعاود نشوف يديك معريين
أنا ماعترضتش بالعكس فرحححت أنه لقيت لي يربيني زعما كنت موالفة النكير على هاد شي ولكن من فم راجلي طلعت غيييير
دخلت لبس بوليرو وخرجنا خداني لواحد الريسطو كايحمق وطلب لي لا كلاص وقالي: باقي عاقل عليك داك النهار كيفاش كنتي كاتنحنززي في داك لا كلاص
أنا حشمت وقلت ليه:آه وشنو فيها شحال كان كايبان غزال ساعا نتا ماخليتنيش حتى ندوق
محبوبي:هاديك الليلة وكان لقيت وكان خويت ليك داكشي فوق راسك
أنا:وعلاش مالي آش درتليك
محبوبي:آش درتيـ ونتي ديك الليلة شبعتي فيها تفرنيس مع دوك المعيقين
أنا:إوا نتا لي قتلي...
شاف في واحد الشوفة خلاني نحبس الهدرة وبديت نسرط في لاكلاص حتى جمدلي مخي خرجنا وبدينا نتساراو حتى وصل الليل عاد رجعنا للدار ومادرتش العشا حيت كنا شبعانين النها كولو وحنا كاناكلو
قلت هاديك هي الليلة الموعودة دخلت تآآاني وتالت ورابع قاديت راسي تقزبت تعكرت وتعطرت وجلست نتسناه فوق الناموسية دخل لقاني هاكداك شاف في وقالي تصبحي على خير وهز المخدة والكاشا وخرج للصالون
وآآآآع ياربي آاش هاد الموصيبة الكحلة مالو هادا حجرة خشبة طوبيا؟ بقيت حاضياه من الباب وهو كايتقلب في الصالون شحال وأنا حاضياه باش نعس تسلتت بلاتي وهزيت التيليفون على الله نفهم منو شي حاجة قلبت ليه في الميساجات ولقيت ميساجات ديال وحدة كاتقول مالك تبدلت علي؟ علاش ماكاتجاوبنيش أرضى بقششت فيه مزيان وحطيته ودخلت تما فهمت بلي مابقاش كايرد على ديك خيتي المسلوتة ماعرفت آش كان عاجبه فيها قدها قد بوطو ديال الضو لا إنحنائات و لا معالم الأنوثة الحاصول زي القدام زي الورا..
دخلت لبيتي وبالي مرتاح بلي محبوبي بدا يبعد على عمود الإنارة.

 

مازال الوسواس قاتلني مافهمتش هو علاقتنا تحسن ولينا كانهدرو ولا كايرجع للدار بعد ما كان ياكل غير في الزنقة ولكن علآآآآش ينعس في الصالون..وكان ماحشمت وكان أنا لي... ولكن كرامتي لا تسمح ماتقولوش لي ديك كرامتك ديما عافطا عليها في خاطر كرشك آه في خاطر كرشي نبرك عليها ولكن الكسكس لا وألف لا..
الصباح فقت نوجدت ليه الفطور وفطرنا بزوج بينا لبستو لا فيست ديالو وهو يضحك لي مانقولكمش وصلت للسما السابعة ورجعت
مشيت نجمع البيت والبلاصة فين نعس في الصالون ولقيت التيليفون ديالو نساه مشيت نجري باش نعطيه ليه لقيتو مشا وحطيتو..شويا بقا تايصوني هزيتو قريت فيه سميت شيماء.. بقييت كانشووف فيه وترددت بزاف وأنا نجاوب.. بقيت ساكتة وأنا نسمع ألو رضى مالك مابقيتش كاتجاوبني...ألو...ألو... وأنا نقطع عليها
زعما ممكن تكون هي البوطو ديال الضو ؟أكيد هي ..لا لا خاصني نتأكد شديت البورطابل ونقلت النمرة وأنا نتاصل بيها
ألو...ألوووو
بقيت ساكتة ماقدرتش نهدر شووية وهي تقطع علي المفروحة وأنا نعاود
ألو..واش ماكاتحشموش باراكا ماتبسلو علي
أنا: فعلا آختي الله ينعل لي مايحشم
بوطو ديال الضو:باغدون؟
أنا: دوغيان آختي
بوطو ديال الضو:شكون معايا؟
أنا: عيشة قنديشة..واش نتي أستاذة شيماء لي مطلقة وعندك ولد ؟
بوطو ديال الضو:شكون نتي آختي وفين كاتعرفيني؟
أنا تمتمت بشوية:أنا لي غانتفك لا مابعدتي على زماني وفتى أحلامي
بوطو ديال الضو:شنو قلتي ماسمعتكش
أنا:بغيت نتلاقا بيك وبغيت نهدر معاك بخصوص الأستاذ رضى
بوطو ديال الضو:شكون نتي بعدا وشنو علاقتك برضى؟
أنا:حتى نتلاقاو ونفهمك.. بقات ساكتة شوية وهدرت:
أوكي ماشي موشكيل فين نتلاقاو وإيمتا؟
أنا:كاتعرفي واحد القهوة سميتها لاس بالماس حدى البنك التجاري
بوطو ديال الضو:ماكانعرفهاش ولكن باينة شعبية ..غانسول
أنا:شعبية...الله يحرق دمك يابعيدة
بوطو ديال الضو: شنو!
أنا:والو أحبيبتي نتلاقاو من هنا ساعة ونص
وأنا نقطع عليها ماعرفتش هادشي لي كاندير شنو العواقب دياله ولكن ساسوفي عييت مانصبر واه راجلي كايعشق في مرا خرى وأنا حاطة يدي فوق حنكي والله لاخليته ليها وإما أن يكون لي أو لن يكون لأي واحدة أخرى...
ساليت شغالي بالزربة ووجدت راسي للقاء الحاسم وخرجت مشيت لديك القهوة الشعبية على قولة بوطو ديال الضو ولقيتها تما كاتسناني زعما باز وجه الحديدة وجاية قبل الوقت بقيت كانشوف فيها كاتشرب في قهوة كحلة بحال شي كلوشار واش كاين شي أنثى كاتشرب قهوة كحلة البشر
قربت منها وجلست بلا سلام ولا كلام وبقات تتشوف في وهدرت: واش نتي لي تاصلتي بي هاد الصباح؟
أنا:آه هي أنا
بوطو ديال الضو:شكون نتي وفين كاتعرفيني ومنين جبتي نمرتي وشنو علاقتك برضى
أنا:غير بلاتي عليك آزين لا تسوطا لينا الضو والحومة تبات مضلمة
بوطو ديال الضو:مافهمتش آش تتخربقي
أنا:أنا تنخربق؟مقبولة منك آزين... أنا هي مرات السي رضى لي راكي لاصقة فيه
شافت في مزيان وضحكات وهزات القوة وبدات تشرب وهي تشوف في.

 

أنا:علاش كاضحكي جيتك كلون ولا
بوطو ديال الضو: لا حاشا آختي غير جيتيني كيما تخيلتك تماما
أنا:وكيفاش تخيلتيني بالسلامة
بوطو ديال الضو كملت على الضحك تاعها وأنا بقيت كانتفقسسسس ولكن قلت لا ألمياء ماتخليهاش تلعب بأعصابك..
أنا: واش ماحشمتيش تخرجي مع راجل مزوج على قلة الرجال
بوطو ديال الضو: أنا عارفة كولشي على علاقتكم وعارفة زواجكم غير حبر على ورق وعلاقتنا أنا ورضى مايمكنش ليك تفهميها
أنا: شنو عارفة وكيفاش مانقدرش نفهمها ياك ما كبور والشعيبية ولا عنطر وعبلة
بوطو ديال الضو: ههههه بحال داكشي
أنا:أصلا نتي كيفاش قبلتي على راسك تبقاي معاه وهو قبل وتزوج غيرك
بوطو ديال الضو: أنا عارفة بلي زواجكم ماغاديش يستمر وهو تزوج بك غير بسبب الضغوطات من مو وماهي إلا مسألة وقت ويطلقك
أنا:..شوفي ياه غاتفرقي لي على راجلي ولا ماغايعجبك حال
بوطو ديال الضو بدات ضحك:هههههه والله حتى كيما كنت متخيلاك عاود لي عليك رضى وقالي عقلك صغير وللكن حتى تلاقيت بيك عاد فهمت معاناتو معاك الله يحسن عوانو
أنا في ديك اللحضة تعصصصبت والدم بدا يغلي في عروقي تفكرت ديك اللقطة ديال كاس ديال الماء في الأفلام التركية وأنا نهز الكاس لي كان حداها وطشششششش....
دوشت لباباها بداك الكاس وياسلام على إحساس بالإنتعاش خليت كولشي حال فمو في في القهوة واحد الشمكار بدا يصفق علي وأنا نخرج وخليها كاتسب بالفرونسي علم الله آش كانت تقول
رجعت للدار وأنا مازال معصبة جلست وبقيت نتسنا راس الطارو يجي وأنا معولة على خزيت زعما كيفاش قدر يقولها بلي أنا عقلي صغير وكيفاش قدر يعاودلها على علاقتنا وأنا لي كان يحسابلي ولينا سمن على عسل
المهم داك النهار ماطيبت الغدا وبقيت جالسةنتسنى حتى جا وقت باش نحيح عليه وهو يبدا يغوت:
شنو داكشي لي درتي ألمياء واش مابغيتيش تكبري عقلك
أنا:وصلات ليك حبيبة القلب آش وقع
راس الطارو:ماكنتش متوقع منك تصرف بحال هادا
أنآ: شمن تصرف بغيتي ندير واش بنيتك كاتهدر؟ واش بغيتيني نسكت بحال لحمارة ونخليك تعيش حياتك بيخير مع صاحبتك
بوطو ديال الضو: قلتلك ماشي سوقك!!!
أنا بديت نغوت حتى وصل غواتي للزنقة:كيفاش ماشي سوقي واش بغيت تحمقني؟!!!مرة تقولي أنا راجلك مرة تحسسني بلي ولينا قراب ودابا ماشي سوقك...
بوطو ديال الضو: شوفي..
أنا: صافيييييييي سكت علي !!!!صبرت حتى عييت 3 شهور كلها وأنا عايشة معاك ماعارفة فيها راسي من رجلي آش شد علي هاد العذاب وهاد الحياة المكفسة أنا غادي نهنيك مني في مرة وكيما كنتي باغي في الأول ونخليك تعيش كيما بغيت مع حبيبت قلبك
دخلت البيت ديالي وسديت الباب وبديت نبكي وهو خرج وردع الباب موراه
بكيت وبدوك الأعصاب لي كانو في جبدت باليزتي وجمعت فيها حوايجي وخرجت من الدار.

 

خرجت وأنا كانبكي ومقررة بلي هادي هي النهاية وماغديش نزيد حتى نهار نصبر على هاد الحال صافي واخا يقتلوني واخا يقطعوني ماشي سوقي ..شديت تاكسي فاش ركبت سولني الشوفور فين غادية أنا بقيت ساكتة فين غانمشي خالتي الزوهرة لا مشيت عندها أكيد غا تتصل بيه وغاديا تضغط عليه يديني للدار
ودارنا بعاد بزاف مايمكنش لي نسافر بوحدي من الرباط كاع عمري سافرت بوحدي ومانعرفش حتى فين نمشي بقيت هاكداك نفكر وفكرت في إيمان هي لي ممكن نجلس عندها واحد اليومين بينما عرفت آش غاندير
نزلت من التاكسي وجلست في واحد الجردة وصونيت على إيمان:
أنا:ألو إيمان لاباس عليك
إيمان:ألو حبيبة توحشتك مابقيتيش تباني كاع
أنا:حتى أنا والله غير مع الوقت
إيمان:مالو صوتك بنتيلي ماشي هي هاديك
أنا:والو غير شي مشاكيل وصافي
إيمان:ويلي شمن مشاكيل
أنا:حتى نتلاقا ونقولك إيمان بغيت نطلب منك واحد الطلب يلا ممكن
إيمان:شنو حبيبة قولي
أنا:واش ممكن نجلس عندك واحد اليومين؟
إيمان:وايلي على واش ممكن أكيد أصاحبتي غير آجي ولكن دابا راه عندي حصة في العشية منهنا ل2 سوايع تلقايني في الدار ٱأوكي؟
أنا:صافي أختي لهلا يخطيكي عليا وسمحيلي بزاف
إيمان:الدنيا هانية أحبيبتي مرحبا بيك في أي وقيتة
بقيت جالسة في الجريدة ومرة مرة كايطيحو لي الدموع من الفقسة لي كانت في بعد مادازو 2 سوايع مشيت عند إيمان ولقيتها في الدار دخلت عاودت ليها كولشي وبقينا أنا وياها تانعايرو ونسبو في راس الطارو مانكدبش عليكم حسيت راسي بحال لا رتاحيت من بعد كاع داك المعيور
إيمان كانت كارية هي و3 ديال البنات كاع جايين م مدن مختلفة باش يقراو في الرباط وماكانش عندهم مشكل نبقا معاهم دوك اليومين كاع ضريفات صراحة
بقيت جالسة تما وكاخمم في راس الطارو دابا يكون فرحان حيت تهنا مني وأنا بقيت مفقوسة وكانتغدد وكانفكر كيفاش نرجع لدارنا... قررت نتاصل بالواليد هو يجي يردني للدار جيت نهز تيليفوني لقيتو تقاداليه لا شارج ..قلبت على الشارجور في الحوايج مالقيتوش ياك مانسيتو في الدار ؟أوف على زهر سولت البنات على الله يكون شي وحدة عندها بحال شارجور تيليفوني ولكن والو وكان خاصني نبآت حتى الصباح فاش يخرج وندخل نهزو باش مانتلاقاش معاه المهم نعست ديك الليلة والدمعة في عيني والصباح شفت الوقت فاش كايمشي للخدمة وأنا نمشي حليت الباب غير بالشوية ماعرفت يقدر يكون باقي ماخرج ومشيت كانجري للبيت وهزيت الشارجور وجيت خارجة وأنا نتلاقا معاه داخل. 

دخل وشاف في واحد الشوفة تفلق بغل.. هدرت وقتليه:جيت غير باش نهز الشارجور وغاديا وعمرك تعاود تشوف كمارتي تما بدا تاني يغوت وأنا تخلعت وبقيت ساكتة:
واش نتي مريضة ولا شنو ؟فين كنتي!!!!!! واش عرفتي شنو درتي فيّ هادا لليلة!!! ماخليت فين قلبت عليك صبيطارات كوميساريات محطات واش بغيتي تسطيني وتخرجي لي مرارتي !!!! الليل كامل ماشفت فيه النعاس قلبت في دارنا وتاصلت بداركم ودرت راسي كانسول فيهوم وهوما يسولوني عليك عرفتك ممشيتيش تما بايت نقلب عليك ونتي علم الله فين كنتي!!! وكان ماحشمت وكان شديتك قجيتك دابا!!!!
أنا بديت نطيح في الدموع كنت مخلوعة بزاف من غواتو
:ومازال كاتبكي عاد هادي هي ضربني وبكا سبقني وشكا !!شوفي مرة خرى تعاودي تخرجي من الدار بلا خبار ولله تاندير فيك شي موصيبة فهمتي!!...قلتلك واش فهمتي ولا لا؟!!!
أنا كانوح ونشهق:آآآآه فهمت ..
حط يدو على جبهتو وساط وجلس فوق الكرسي وبقيت أنا كانوح ونبكي شوية ناض وجا عندي وعنقني وقال:صافي سكتي
أنا فاش عنقني جيت ساكتة فاش تهدنت شاف في وقال:راني كنت مخلوع عليك بزاف ماتعاوديهاش ألمياء الله يخليك
أنا شفت فيه وقلتلو:واخا والله عمري نعاودها
شفنا في بعضياتنا بحال شاروخان و كاجول و تما... تي حدري عينيك تي وياها وياها مابقات حياة في هاد الزمان آلطييييف...
المهم لكم أن تتخيلو ماذا وقع من بعد لي بغيت نقول لمريم سيري بغيتلك البّاسر...بحال الشوكة يابنت الحرام شوكة تعميك...
المهم من بعد ما دوزنا ليلة العمر (الصباح زعما ) ولينا كانحماقو على بعضياتنا وواعدني يبعد على عمود الإنارة حيت هو أصلا مابقاش يتلاقا معاها غير هي كانت لاصقاه بنت الحرام..
مانعاودليكمش حياتي ولات أحلى من الأفلام واخا كان يعجبني نتفرج فيهم دابا فاش جربت فرق كبييييير صراحة.. رجعت تفكرت هدرة جدة الله يرحمها ويوسع عليها ضيقات القبور تاع الذهب وداكشي..الله يهديك أجدة غير جدي كان زينو على قدو ونتي كنتي تبردي على راسك وتشيخي علي بدوك الزوج كلمات ومالو النحاس المشلل بالذهب ماعليهش الله تاهو لا تهليتي فيه وحضيتيه من أعين الحساد وأيادي اللصوص يبقا ديما يلمع كا ولا ما كا؟
هادي كانت هي قصتي مع محبوبي وفتى أحلامي لي ولينا اليوم بحال قيس وليلى إيوا دعيو معانا البنات بالثبات والذرية الصالحة ودعيو مع ختكم تعقل وتبت شوية حيت مازال فريفرة الله يهديني.
النهاية.

 

قصة من تأليف: أم أسووومة